လ္ဂုၚ်၊ ဖေဖဝ်ဝါရဳ (၂၀)
ပ္ဍဲကဵုအပိုၚ်အခြာဒေသကွတ်စက်ဍုၚ်လ္ဂုၚ် ကမၠောန်အဇာဍောတ် ကေုာံ အဇာဒေါဝ်ဂမၠိုၚ် ဒၟါနူဇြဟတ်ဓာတ်လလဳ မဟွံရုမ်ဂပ်ဂမၠိုၚ် မဒှ်ဒၟံၚ်ကြပ်ဒးဒေါအ်ဒေၚ်တံဂှ် ယဝ်ရရပ်စပ်ပၟတ်ဓာတ်လလဳ ဟွံလုပ်သၞောဝ်မ္ဂး ကေတ်အာဒုဟ်ရောၚ် ကဝ်ပဝ်ရေယှေန် ဇြဟတ်ဓာတ်လလဳလ္ဂုၚ် (YESC) သၟဝ်တဲကံၚ်ဇြဳပၞာန် လလောၚ်ပ္တိတ်လဝ်ရ။
ကဝ်ပဝ်ရေယှေန် ဇြဟတ်ဓာတ်လလဳလ္ဂုၚ် (YESC) ဂှ် ပ္ဍဲဂိတုဖေဖဝ်ဝါရဳ နူစၟတ်တ္ၚဲ (၁၅) စဵုကဵု (၁၇) ကြဴနူစၟဳစၟတ် ရုၚ်စက်အပံၚ် (၁၅၀) ပြၚ် နူကဵုအပိုၚ်အခြာဒေသစက်ယှိုဲပျဳတာတုဲဂှ် ယဝ်ရစၟဳစၟတ်ဂွံဆဵုကေတ် ဒဒှ်မရပ်စပ်ဒၟံၚ်ဇြဟတ်ဓာတ် ဟွံလုပ်သၞောဝ်တံဂှ်မ္ဂး ကေတ်အာဒုဟ် ကုညးတာလျိုၚ်ရုၚ်စက်တံ နကဵုသၞောဝ်ဥပဒေပၟတ်ဓာတ်လလဳရောၚ်ဂှ် ကဵုသမ္တီလလောၚ်ပ္တိတ်လဝ်ရ။
စၞးကေတ်ဒုဟ်သာ်ဏံဂှ် ယဝ်ရရေၚ်တၠုၚ်ပ္ညဳကဵု ရုၚ်စက်ဂမၠိုၚ် နူအပိုၚ်အခြာဒေသကွတ်စက် ဒၞါဲဇြဟတ်ဓာတ်လလဳ ဟွံရုမ်ဂပ်တံဂှ်မှဟေၚ် ဒှ်သွဟ် ပြသၞာတံရောၚ်ဂှ် တၠပိုန်ဒြပ်တံ ဟီုဂးဒၟံၚ်အိုတ်ရ။
“ပြသၞာအဓိကဂှ်တှ်ေ ကဵုပၟတ်ဓာတ်လလဳ ဟွံရုမ်ဂပ်ရဏောၚ်။ ကၠာတေံလေဝ် နွံလဝ်ရ။ ပံၚ်ကဵု EPC တုဲမှ ကၠောန်ဂွံဏောၚ်။ အေဇှ် ယဝ်ရကေတ်ဒုဟ်ဟီုမ္ဂး ကေတ်ဒုဟ် သီုကဵုမၞိဟ် နူကဵု EPC တေံဂှ်ကီုညိ။ ကေတ်ဒုဟ် လ္ပာ်ရုၚ်စက်တံသၟး ဟွံဂွံပုဟ်။ ဍာံဍာံဂှ် ကဵုပၟတ်ဓာတ်လလဳ ကုရုၚ်စက်တံဂှ် ဟွံမှာန်ဒၟံၚ် တၟာလအ်ယျ။ ကဵုပၟတ် ကုညးဍုၚ်ကွာန်ဒၟံၚ်အရာပ်တံဂးတုဲ အခိၚ်ထပိုတ်ပၟတ် လ္ပာ်ရုၚ်စက်တံဂှ် ဂလိုၚ်ပ္တိုန်တုဲ ကၠောန်ဒၟံၚ်ဂှ် လအ်ယျ” သာ်ဝွံ တၠကမၠောန်အဇာဒေါဝ် နူကဵုဍုၚ်လ္ဂုၚ်မွဲတၠ ဟီုရ။
နကဵုတၚ်စၞောန် ဥက္ကဌ YESC ဂှ် ဂကောံထပှ်ဂကောံ နူကဵုဂကောံကိုန်အစဳဇန် လ္ဂုၚ်သၟဝ်ကျာ နကဵုဇြဟတ်မၞိဟ် (၇၃) တၠ ဂှ် ဗက်စၟဳစၟတ်လဝ် ရုၚ်စက်ဂမၠိုၚ် နူကဵုအပိုၚ်အခြာဒေသကွတ်စက်တံရောၚ်ဂှ် လ္ပာ်ကံၚ်ဇြဳပၞာန် လလောၚ်ပ္တိတ်လဝ်ရ။
ပ္ဍဲကဵုစၟဳစၟတ်လဝ်သာ်ဏံဂှ် ဟိုတ်နူသုၚ်စောဲလဝ်ဇြဟတ်ဓာတ် ဟွံလုပ်သၞောဝ်တံဂှ်ရ ဇြဟတ်ဓာတ်ကၠေံခၞၚ်တံ က္တဵုဒှ်ဒၟံၚ်တုဲ သွက်ဂွံကေတ်ဒုဟ်ဂှ် ဒးကဵုလဝ်သမ္တီရောၚ်ဂှ်လေဝ် သ္ဂးလဝ်ရ။
ပ္ဍဲအရာစၟဳစၟတ်ကေတ်ဒုဟ် ကုပရေၚ်ရပ်စပ်ဒၟံၚ်ဇြဟတ်ဓာတ် အတိုၚ်လၟေၚ်ကမၠောန်တံဂှ် သွက်ဌာနဓာတ်လလဳ မ္ဒးဆောံလေၚ်အာတံဂှ် သွက်သ္ဂောံကလေၚ်ဂွံ သြန်လေဲ၊ သြန်ဒဏ်၊ သြန်ဂိတံဂှ်ကီု၊ ညံၚ်ယူနေတ်ကၠေံခၞၚ်တံ ဂွံယအ်စှ်ေအာဂှ် ကေတ်ဒုဟ်ရေၚ်တၠုၚ်အာ ဗွဲမညဳကဵု သၞောဝ်ဥပဒေဓာတ်လလဳတံရောၚ်။
ကဝ်ပဝ်ရေယှေန် ဇြဟတ်ဓာတ်လလဳလ္ဂုၚ် (YESC) ဂှ် ပ္ဍဲအရာဗလးကဵုဇြဟတ်ဓာတ်လလဳ ကုအပိုၚ်အခြာဒေသကွတ်စက်တံဂှ် အတိုၚ်သၞောတ်ကဵုပၟတ် နကဵုအလန်တံဂှ်မ္ဂး လေပ်ဗလးတဴဒၟံၚ်ပၟတ် ပ္ဍဲအခိၚ်ပယျာံဂယးတံရောၚ်ဂှ် YESC ဟီုဂးလဝ်ရ။
ပရိုၚ်−သြၚ်လောန်တိုၚ်(မ်)