ဗြဝတဳ၊ ဖေဖဝ်ဝါရဳ (၂၀)
ကောန်ကမၠောန်ဆုဲပြံၚ်ဍုၚ်ဗၟာ မလုပ်စိုပ်ကၠုၚ် အပ္ဍဲဍုၚ်သေံ နကဵုလိက်ကသုက်လုပ်သၞောဝ် MOU တံဝွံ မ္ၚးနူဟွံဂွံကလောန်ကၟိတ်၊ ဟွံဂွံသြန်ဂိတုဂှ် သီုကဵုဒးဂဗဒၟံၚ် ပြသၞာဟွံဂွံအခေါၚ်ကၠောန် အတိုၚ်ကမၠောန် မပါလုပ် ပ္ဍဲလိက်ကသုက်တံရောၚ်ဂှ် ဂကောံမရေၚ်တၠုၚ်ကဵုဒၟံၚ် အခေါၚ်အရာသၟာကမၠောန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဍုၚ်သေံ ကေုာံ ဍုၚ်ဗၟာ ၜါဍုၚ်ဝွံ စနူဂိတုမေ သၞာံ ၂၀၂၂ တေံတုဲ နကဵုသၞောတ် MOU နူကဵုဂၠံၚ်တရဴလုပ်သၞောဝ်တံမွဲကဆံၚ် ကလေၚ်ပလံၚ်ဗစိုပ်ကၠုၚ်လဝ် သၟာကမၠောန်ဆုဲပြံၚ်ဍုၚ်ဗၟာတံရ။
ဆ္ဂး ကောန်ကမၠောန်ဆုဲပြံၚ်ဍုၚ်ဗၟာ MOU မစိုပ်ကၠုၚ် အပ္ဍဲဍုၚ်သေံတံဂှ်ဝွံ အခါလၟုဟ်ဂှ် ပ္ဍဲကဵုရုၚ်စက်လ္ၚဵုတံဂှ် ဒးဆေၚ်ဒၟံၚ်မုက်ကဵု ပြသၞာအခက်အခုဲ ဟွံဂွံကလောန်ကၟိတ်၊ ဟွံဂွံသြန်ဂိတုတံ၊ လ္ပာ်တၠကမၠောန်တံ သီလဝ် လိက်ကၠောံဍုၚ်တံ၊ ဟွံကဵုအခေါၚ်ကၠောန်ကလောန် အတိုၚ်မပါလုပ် ပ္ဍဲလိက်ကသုက်တံ၊ လိက်ဆုဲပြံၚ်ကလောန်တံ ကေုာံ ဟွံကဵုသြန်လေဲတံ ဒှ်တမ်ရ။
စပ်ကဵုအကာဲအရာဏံတုဲ ဥူအံၚ်ကျဝ် ညးမကဵုကသပ် ဇာဇၞိက်အခေါၚ်အရာသၟာကမၠောန်ဆုဲပြံၚ် MWRN ဟီုလဝ် ဗီုဏံရ။
“အလဵုသၟာကမၠောန်တံဟီုဒၟံၚ်ဂှ်တှ်ေ ၜိုန်ရစိုပ်ဒၞါဲ မဟီုလဝ် အတိုၚ်ပ္ဍဲလိက်ကသုက်တံဂှ်ကီုလေဝ် ပ္ဍဲကဵုဒၞါဲပ္ဍဲလိက်ကသုက်ဂှ် ကမၠောန်ဟွံမွဲတုဲ ညအ်ဂှ် ဒှ်ဟိုတ်အေဂျေန်ဇြဳတံ သာသ္ပအ်ဂှ် ဟီုဂွံရ။ အေ ဂှ်တှ်ေ ရုၚ်ကလောန် အလဵုဇကုမပလံၚ်ဂှ် မုရုၚ်ကလောန်ရော၊ မုကၠောန်ပ္တိတ်ဒၟံၚ်ရော၊ ပ္ဍဲကဆံၚ် တြးပ္တိတ်သွံရာန် ဗၞိက်တံဂှ် နွံမံၚ်ဍာံဍာံဟာ။ ကဵုကလောန် ကုကောန်ကလောန်တံ ဍာံဍာံမာန်ဟာ ဟီုဂှ် လ္ၚတ်တုဲမှဟေၚ် ဒးပလံၚ်ဗစိုပ် သၟာကမၠောန်တံဏောၚ်။ ဂွံလိက်ကော်ကလောန်ဗက် သွက်ဇကုသ္ဂောံဂွံသၠုဲလွာဲလွာဲဂှ်သၟး ပလံၚ်ပ္တိုန်ဏာ လောဲလောဲသွာသွာဂှ် စိုပ်အဏံတှ်ေ ကမၠောန်ဟွံမွဲတုဲ ကမ္ပဏဳဂှ် ဒုၚ်လျိုၚ်တုဲ ဗက်ဂၠါဲကလောန်တၞဟ်ဟ်တံတုဲမှ မပလံၚ်ကဵုဒၟံၚ်တံဂှ် ဂွံမိက်ကေတ်ဒၟံၚ်ပရိုၚ်ရ။ လ္ၚဵု အဲဂွံမိၚ်ကေတ်ဂှ်တှ်ေ ဒဵုမူစိဂိတုလအ်တုဲ ဂၠါဲကဵုဒၟံၚ်ကလောန်ဖိုဟ်ဂးရ။ ညအ်ဂှ် ရိုၚ်ဇိုၚ်ကွေံကွေံ။ သၟာကလောန် မချုက်လဝ်လိက် MOU သေံ−ဗၟာ တံတုဲမှ ကၠုၚ်တံဂှ် စိုပ်အဏံမှ ကလောန်ဟွံမွဲတံ၊ ဒးဂၠါဲကလောန်တံ၊ ဒဵုကဵုမွဲဂိတု ဟွံဂွံကလောန်ပုဟ်ဟီုဂှ် ဒစဵုဒစးဒၟံၚ်ကဵု MOU ပေၚ်ၚ်တုဲ ဒှ်အရာဒှ်ဟွံထေက်တံရောၚ်ဂှ် အဲမိက်ဂွံဟီု အဓိကရ” သာ်ဝွံ သ္ဂးရ။
ကောန်ကလောန်ဆုဲပြံၚ်ဗၟာ MOU တံဝွံ ဒှ်ကောန်ကလောန် မပလံၚ်ပ္တိုန်ၚ် နူကဵုအေဂျေန်ဇြဳ မပ္တိုန်လဝ်စရၚ်လုပ်သၞောဝ်တံ ထ္ပက်စၟတ်တဲ လိက်ကသုက်တုပ်စိုတ် G to G သေံ−ဗၟာ ၜါဍုၚ်တုဲမှ ချုက်လဝ်လိက်ကသုက် ကုသၟာကလောန်လုပ်သၞောဝ်တံဂှ်မဒှ်တုဲ အခါလၟုဟ်ဂှ် စိုပ်ဍုၚ်သေံမှ ဒးဆေၚ်ဒၟံၚ်မုက်ကဵု ပြသၞာဟွံဂွံကလောန်ကၟိတ်တံရ။
နကဵုဌာနဝန်ဇၞော်သၟာကမၠောန် သေံ−ဗၟာၜါဍုၚ်ဂှ် နွံပၟိက် ဒးကၠောန်သ္ပ ရေၚ်တၠုၚ်ကေတ်ဒုဟ် မသ္ကာတ်မြဟ် လ္တူအေဂျေန်ဇြဳမဆက်စပ် ဟွံမွဲကဵုပရေၚ်ဒုၚ်လျိုၚ် ကေတ်လျိုၚ် ကုပြသၞာကောန်ကလောန်ဆုဲပြံၚ်ဍုၚ်ဗၟာ MOU တံဂှ် ဥူအံၚ်ကျဝ် သ္ဂးရ။
“သၟာကလောန် ချုက်လိက်ကသုက်တုဲ ပလံၚ်နၚ် နဒဒှ်သၟာကလောန်လုပ်သၞောဝ်ဂးတံဂှ်ဝွံ စိုပ်ဍုၚ်သေံမှ ကလောန်ကၟိတ်ဟွံမွဲပုဟ်ဟီုဂှ် ဒှ်ကိစ္စ ဟွံထေက်ကဵုဒှ်လးလး၊ ကၠာတေံလေဝ် ကေၚ်ဒှ်လဝ်ရ။ ဆ္ဂး အေတံဏံသီုဖအိုတ်ဂှ် ဂအုပ်ဂကောံအေဂျေန်ဇြဳဂမၠိုၚ်၊ သၞာဲဒဴကလုတ် သၟာကမၠောန်မဆေၚ်စပ်တံ၊ ဂကောံသၟာကမၠောန် မၞုံကဵုပရေၚ်ဒုၚ်လျိုၚ် တိဍာ်မဆေၚ်စပ်တံ ဟိုတ်နူပံၚ်တောဲသောၚ်ကလးထောံဂှ်ရ ဗွဲမဂၠိုၚ် ကၠေံအာကီုလေဝ် လၟုဟ်အလန်ဏံဂှ် ကလေၚ်မွဲဝါပၠန်တုဲမှ စိုပ်ကၠုၚ် နကဵုဒဒှ်မလုပ်သၞောဝ်ရ။ စိုပ်အဏံမှဟေၚ် ပ္ဍဲကဵုကမၠောန်ချုက်လဝ်လိက်ကသုက်ဂှ် ကမၠောန်ဟွံမွဲတုဲ ဒးအာအတေံ၊ ဒးအာအဏံဂှ် ဂွံမိၚ်ကေတ်ဒၟံၚ်ရ။ အဲအဓိက မိက်ဂွံဟီု ဍန်န်ဂၠေံဂၠေံဂှ်တှ်ေ နကဵုဌာနဝန်ဇၞော်သၟာကမၠောန်မဆေၚ်စပ်တံ ပ္ဍဲကဵုဂကောံဂှ် တာလျိုၚ်နွံဂၠိုၚ်အိုတ်တုဲ ယဝ်ရကၠောန်သ္ပကေတ်ဒုဟ်သ္ကာတ်တ်မြဟ်ဟ် မပ္တံကဵုပလီုထောံ၊ ကေတ်ဒုဟ်၊ ထ္မံက်ပ္တိတ် ကုအေဂျေန်ဇြဳ မဆေၚ်စပ်တံဂှ်မှဟေၚ် ကိစ္စဏံဂှ် ကၠေံဗ္ဒန်အာလးလးရောၚ်” ဂှ် သ္ဂးရ။
အကာဲအရာလၟုဟ်ဂှ် လၟိဟ်သၟာကမၠောန်ဍုၚ်ဗၟာ MOU မဒးဂဗဒၟံၚ် အခက်အခုဲပြသၞာ ဟွံဂွံအခေါၚ်ကၠောန် အတိုၚ်ကလောန်ကၟိတ် မဟီုလဝ် ပ္ဍဲလိက်ကသုက်တံ၊ ဟွံဂွံကလောန် ပ္ဍဲကဵုဒၞါဲကမၠောန်ဍုၚ်သေံတံ၊ ဟွံဂွံသြန်ဂိတုတံဂှ်ဝွံ ချိၚ်ခယျကေတ်ဂှ် နွံဒၟံၚ် စဵုကဵုဂၞန်ကဵုကၠံရောၚ် ဂွံတီကေတ်ရ။
အတိုၚ်တၚ်လလောၚ်တြး ဌာနဝန်ဇၞော်သၟာကမၠောန် အလဵုအသဳညဳသၟဟ်ဂကူဂှ်မ္ဂး သွက်ကောန်ကလောန်ဍုၚ်ဗၟာ MOU မ္ဒးဂဗဒၟံၚ်အခက်အခုဲတံဂှ် ပြသၞာအခက်အခုဲ မပ္တံကဵု သွက်သ္ဂောံဂွံလိက်ဆုဲပြံၚ်ကလောန် ကေုာံ သြန်ဂိတုတံကီု၊ သွက်သ္ဂောံဂွံအခေါၚ်ကလေၚ်ကၠောန်ကမၠောန်တံဂှ် သောၚ်ကလးရေၚ်တၠုၚ်ကဵုဒၟံၚ်တုဲ ကုအေဂျေန်ဇြဳ မဝးပ္ကဝ်ဒၟံၚ် အခေါၚ်အရာသၟာကမၠောန်၊ မဝးပ္ကဝ်ဒၟံၚ်စေဝ်ပၞောန်၊ မကေတ်တာလျိုၚ် ပလံၚ်ကဵု အတိုၚ်ကလောန်ကၟိတ် ကေုာံ ဒၞါဲကမၠောန် မပါလုပ် ပ္ဍဲလိက်ကသုက် MOU ဟွံမာန်တံဂှ် ကေတ်အာဒုဟ် သ္ကာတ်တ်မြဟ်ဟ်ရောၚ်ဂှ်လေဝ် ကဵုလဝ်သမ္တီရ။
ပရိုၚ်−သြၚ်လောန်တိုၚ်(မ်)