ၜၚ်ကံက်၊ ဖေဖဝ်ဝါရဳ (၂၀)
ညံၚ်ပၟတ်ဂြိုပ်တူ ကေုာံ ယက်ဂွိုအ်ပြး အပ္ဍဲဍုၚ်သေံတုဲ အိုဿီုကဵုဒေသန္တရတံဂှ် အလဵုအသဳသေံ စၟတ်လဝ် စေဝ်ပၞောန် ဒစုက်ပၟတ်ဟွံဂွံ လလအ်ပွိုၚ်ပိဂိတုဂှ် လလောၚ်ပ္တိတ်လဝ်ရ။
သၞောဝ်ဏံ မလလောၚ်ပ္တိတ်လဝ် ပ္ဍဲဂိတုဖေဖဝ်ဝါရဳ (၁) ဂှ်ဝွံ လအ်အာပိဂိတု စဵုကဵုဂိတုဨပရဴရောၚ် မဒှ်ရ။
ပ္ဍဲကဵုတၚ်လလောၚ်တြး မလလောၚ်ပ္တိတ်လဝ် ပ္ဍဲဂိတုဖေဖဝ်ဝါရဳ (၁၅) ဂှ် ညးမၞုံအခေါၚ်ဟီုဂး(ယာယဳ) အလဵုအသဳဂှ်ကဵု ဒုညးအုပ်ကာနာနာ သ္ကိုပ်ဝန်ဇၞော်တံဂှ် နကဵုသ္ကိုပ်ဝန်ဇၞော်ပရာယုတ်ချာန်အဵုချာ သွက်ဂွံသဳကၠဳ ကုအေဂျေန်ဇြဳ မဆေၚ်စပ်အိုဿီုဂှ်ကဵု သွက်ဂွံရေၚ်တၠုၚ် ပြဟ်ဒုဟ်စဵုဒၞါ သွက်ဂွံခၠေဝ်ပလန်တာဒၞါ ပၟတ်ဂြိုပ်တူတံဂှ် ပ္တိတ်လဝ်အမိၚ်ရောၚ် ဟီုဂးလဝ်ရ။
“ဟိုတ်နူပၟတ်ဂြိုပ် သၠဲလးကၠုၚ်ဂှ်ရ သ္ကဵုလီုလာ်ကၠေံ ပွဳပွူသဘာဝ၊ ဒၞါဲတိတဵုလွဳတံကဵု ပိုန်ဒြပ်အရပ်ရာ ညးဍုၚ်ကွာန်တံမာန်တုဲ သွက်ဂွံစဵုဒၞါ PM 2.5 မပြးထၞာန်ဒၟံၚ် ပ္ဍဲကျာတံဂှ် သွက်ဂွံကၠောန်သ္ပရေၚ်တၠုၚ်သ္ၚဳဂၠိပ်ကဵု အကာဲအရာပၟတ်ဂြိုပ်တူမွဲဂှ် စၞောန်လဝ် ညးတံရောၚ်” သာ်ဝွံ သ္ဂးရ။
PM 2.5 ဂှ်ဝွံ ဒှ်မၠိုက်အဇာဍောတ် သ္ကဵုကျာကၠိက္ဍက်ကၠေံမွဲဂကူတုဲ ဗ္ၜတ်ပါလုပ် ပ္ဍဲကျာ ဂၠိုၚ်တိုန်မ္ဂး သ္ကဵုဇီုကပိုက်ကၠေံ ပရေၚ်ထတ်ယုက်ညးဍုၚ်ကွာန်တံမာန်ရ။ မၠိုက်တံဏံဝွံ လုပ်စိုပ်ပ္ဍဲကသအ်မာန်တုဲ သီုကဵုစိုပ် ပ္ဍဲလတေၚ်ဆီမာန်ဂှ် ဂွံတီကေတ်ရ။
နကဵုသ္ကိုပ်ဝန်ဇၞော်ဂှ် မၚ်ကျောဝ်ဒၟံၚ် ပၟတ်ဂြိုပ်တူ ကေုာံ ယက် မက္တဵုဒှ်ဒၟံၚ် အလုံကၟိန်ဍုၚ်သေံတံ သီုကဵုဓဝိၚ်ဇၞော်ဇၞော်ရောၚ်ဂှ် သ္ဂးရ။
“သ္ကိုပ်ဝန်ဇၞော်ဂှ်ဝွံ ညံၚ်ဂွံထိၚ် ပၟတ်ဂြိုပ်တူမာန်ဂှ် ဗ္ၜတ်ဒှ်မာန်လဵုဟွံဟီု သွက်ဂွံထ္မံက်ရုပ်ရဴဂှ် ကဵုလဝ်အမိၚ်တုဲ နူဂိတုဖေဖဝ်ဝါရဳ (၁) စဵုကဵုဂိတုဨပရဴ (၃၀) သွက်ဂွံပံၚ်တောဲပါလုပ်ကဵုဂှ် အာတ်မိက်လဝ် ဇရေၚ်မိမညးဍုၚ်ကွာန်တံရ” သာ်ဝွံ ဟီုဂးလဝ်ရ။
ကုညးမဝးပ္ကဝ် သၞောဝ်တံဂှ်လေဝ် ကဵုအာဒုဟ်ဒဏ်ရောၚ်ဂှ် ညးမၞုံအခေါၚ်ဟီုဂး ဂကောံအလဵုအသဳသေံယာယဳဂှ် ဟီုဂးလဝ်ရ။
အတိုၚ်ဂလာန် ဌာနထိၚ်ဒက် ကျာကၠိခ္ဍက်ဟီုလဝ်ဂှ်မ္ဂး ဒေသဍုၚ်သေံသၟဝ်ကျာဂှ်ဝွံ သ္ဇက်ဂွံဒးဂဗ ကဆံၚ်ကျာကၠိခ္ဍက် မဟွံကိတ်ညဳကဵု ပရေၚ်ထတ်ယုက်တံဂှ်နွံတုဲ ဒဵုကဵုသတ္တာဟဏံအိုတ်ဂှ် နွံဒၟံၚ် ပ္ဍဲသၟဝ်ဒးမၚ်ကျောဝ်ကြပ်ပ်တံရောၚ် မဒှ်ရ။
သ္အာၚ်နူဂှ်ပၠန် သွက်ဂွံထိၚ်ဒက် ပၟတ်ဂြိုပ်တူတံဂှ် ဒဒှ်ရသၟိၚ်တၠအဝဵုတံ ကၟာတ်လဝ် ဥဒျာန်ကောန်ဂကူ (၈) ကဵု ဂြိုပ်ဗလးလဝ်တိရစ္ဆာန်အရိုၚ် (၈) မၞုံပ္ဍဲတွဵုရးသ္ကုတ်သၟဝ်ကျာ (၁၇) ဂှ် မဳဒဳယျာအပ္ဍဲဍုၚ်တံ ထ္မံက်ထ္ၜးလဝ်ရ။
Ref: CNA