ကဝ်တူလေဝ်၊ ဖေဖဝ်ဝါရဳ (၂၁)
အပ္ဍဲတိဍာ် ဗော်သွးကောန်ဂကူကရေၚ် KNU ဂှ် ဟိုတ်နူပရေၚ်ဗ္တိုက်ပန်ပှော် လွဟ်ဇၞော် ကေုာံ တရဴကျာ ဒပ်ကံၚ်ဇြဳပၞာန်တံဂှ်တုဲ အပ္ဍဲသၞာံဗ္တောန်ပညာ သၞာံဏံဂှ် ဘာဗ္တောန်လိက် (၁၂) မ ဇီုကပိုက်လီုလာ်အာလဝ်ရောၚ် ညးအုပ်ကာ နူကဵုဌာနပရေၚ်ပညာ ကေုာံ ယေန်သၞာၚ်ကရေၚ် KECD ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲပေါဲဗ္တိုက် မက္တဵုဒှ်လဝ် အကြာဒပ်ကံၚ်ဇြဳပၞာန် ကဵု KNLA, KNDO ပ္ဍဲတိဍာ်အုပ်ဓုပ်ကဝ်တူလေဝ် KNU ဂှ် ဒပ်ကံၚ်ဇြဳပၞာန်ဝွံ ကလိလောန်လဝ် ပွဗ္တိုက်ပန်ပှော်လွဟ်ဇၞော်တံ၊ ဗ္တိုက်ဂြာတ်ဗုမ် ကဵုက္ၜၚ်ကျာ မစွံလဝ်ပွန် လ္တူကောန်အရာပ်တံဂှ်ရ။
ဟိုတ်နူပရေၚ်ဗ္တိုက် ဒပ်ကံၚ်ဇြဳပၞာန်တံတုဲ ပ္ဍဲကဵုသၞာံဗ္တောန်ပညာဏံဂှ် ဘာဗ္တောန်လိက် (၁၂) မ လီုလာ်ဇီုကပိုက်လဝ်တုဲ ကွးဘာ ကေုာံ အ္စာ၊ အ္စာၝောံတံလေဝ် ဇီုကပိုက်ကလိဂွံဝပ်တံ နွံလဝ်ရ။
စပ်ကဵုအကာဲအရာဏံတုဲ ညးအုပ်ကာ ဌာနပရေၚ်ပညာ ကေုာံ ယေန်သၞာၚ်ကရေၚ် KECD ပဒိုဝ်သဝ်လဝ်အေဝ်လ်မူ ဟီုလဝ် ဗီုဏံရ။
“လိက်ဇုက်လောတ်သီုဖအိုတ်ဂှ် ပိုယ်တံ ဟွံဂွံပုဟ်လေဝ်ဏး။ တၚ်နၚ်ဂမၠိုၚ်ဂှ် ဟွံဂွံဖအိုတ်ပုဟ်။ ဆ္ဂး ၜိုတ်ပိုယ်တံတီဂှ်တှ်ေ သီုက္ၜၚ်ကျာ၊ သီုလွဟ်ဇၞော်။ လ္ၚဵုတံဂှ် လီုလာ်အာညိညလေဝ်နွံ။ ပရေၚ်ဇီုကပိုက်ဂှ်တှ်ေ အောန်ဒၟံၚ်ရ မုဒှ်ရောဟီုမ္ဂး ဂြိပ်တိတ်အာ၊ တိတ်အောပ်အာအိုတ်တုဲ ပ္ဍဲကွာန်ဂှ် မၞိဟ်ဟွံမွဲတုဲ ပွမဇီုကပိုက်ချိုတ်ဂျိုၚ်ဂှ် အောန်အာရ” သာ်ဝွံ သ္ဂးရ။
ဟိုတ်နူဒပ်ကံၚ်ဇြဳပၞာန် စွံပွန်ဗ္တိုက်သာ်ဏံဂှ်ရ အ္စာ၊ အ္စာၝောံ၊ ကွးဘာဂမၠိုၚ် မကတ်ဗ္တောန်ဒၟံၚ်ပညာ အပ္ဍဲတိဍာ်အုပ်ဓုပ်ကဝ်တူလေဝ် KNU တံဂှ်ဝွံ ဒးဂြိပ်ဒဴပါဲဒလေတ်ဒၟံၚ်တံ နွံဒၟံၚ်တုဲ သွက်ဂွံဆက်ဗ္တောန်လိက်ဂှ် ဒးဂဗဒၟံၚ်ကဵု အရာဟွံပြေပြံၚ်တံရ။
ဟိုတ်နူပရေၚ်ဗ္တိုက် ဒပ်ကံၚ်ဇြဳပၞာန်တံတုဲ ကွးဘာဂမၠိုၚ် မ္ဒးဂြိပ်ဒဴပါဲဒလေတ်ဒၟံၚ်တံဝွံ ဒးဆေၚ်ဒၟံၚ်မုက်ကဵု ပွမဇီုကပိုက် စပ်ကဵုလ္ပာ်စိုတ်တံ တၟာဂလိုၚ်ရောၚ်ဂှ် ပဒိုဝ်သဝ်လဝ်အေဝ်လ်မူ သ္ဂးရ။
“ဟွံဂွံဗ္တောန်လိက် ပ္ဍဲစမြိုၚ်တံကီုလေဝ် ဒးဗ္တောန်လဝ်လိက် ပ္ဍဲကဵုကတိုၚ်အောပ်မာဗုမ်တံ၊ ပ္ဍဲဂြိုပ်တံဂှ်တှ်ေ ခက်ခုဲတၟာဂလိုၚ်ရ။ ဗ္တောန်လိက် ချူလိက် ဟွံပြေပြံၚ် ညအ်လေဝ်နွံ။ လ္ပာ်စိုတ်ဂှ်တှ်ေ ဇီုကပိုက်ဒး တၟာဂလိုၚ်နွံဏောၚ်။ စိုတ်က္ဍန်ဂြက်တံရ။ ကောန်ၚာ်ဂမၠိုၚ် အခိၚ်တိတ်ကၠုၚ်ဂၠံၚ် သွက်ဂွံဗ္တောန်လိက်ဂှ်လေဝ် လွဟ်ဇၞော်ဂှ် အခိၚ်လဵုဒတုံစှ်ေရောဟီုဂှ် ဟွံတီတုဲ ဇၟာပ်အခိၚ် ဇၟာပ်တ္ၚဲ ဒးမံၚ်ဒၟံၚ် ကဵုသတိဟီုတှ်ေ ညအ်ဂှ် ပွမက္ဍန်ဂြက်တံ နွံရ။ တုဲတှ်ေ ဆုဲပြံၚ်တုဲမှ မံၚ်ဂွံဏောၚ်ဟီုတှ်ေ ကပေါတ်ကိရိယာစက်တံ၊ လီုလာ်စာ်ထောၚ်တံလေဝ် နွံတုဲ ဍာ်ဒကေဝ် စပ်ကဵုလ္ပာ်ပရေၚ်ဗ္တောန်တံဂှ် အရာမဇီုကပိုက်တံနွံရ။ ဇွောံမစၞစ အ္စာ၊ အ္စာၝောံတံဂှ် ဟွံလောဲသွာပုဟ်၊ ပရေၚ်စ ပရေၚ်သုၚ် ပရေၚ်မံၚ်စံၚ်တံဂှ်လေဝ် ဟွံဂွံခိုဟ်ဟ်ဂေါဝ်ဝ်ပုဟ်။ တၚ်ဝါတ်ဂါတ်တံ နွံရ” သာ်ဝွံ ဟီုရ။
မွဲလ္ပာ်ပၠန်ဂှ် ဒပ်ကံၚ်ဇြဳပၞာန်ဝွံ ပွမစွံပွန်ဗ္တိုက် လ္တူဘာဗ္တောန်လိက်၊ စမြိုၚ်သ္ၚိဒၟံၚ်၊ စမြိုၚ်သာသနာတံဂှ် သာကၠောန်သ္ပကၠုၚ်ဒၟံၚ်တုဲ လ္တူပွမဗ္တိုက်သာ်ဏံဂှ် ဖျေံကဝုဒစဵုဒစးရောၚ်ဂှ် ညးအုပ်ကာ KECD နူကဵုဌာန ဗော်သွးကောန်ဂကူကရေၚ် KNU မွဲ ဟီုဂးလဝ်ရ။
ပ္ဍဲသၟဝ်တဲ ဌာနပရေၚ်ပညာ ကေုာံ ယေန်သၞာၚ်ကရေၚ် KECD ဂှ် ဘာဗ္တောန်လိက် အပံၚ် (၁၂၀၀) ပြၚ် နွံတုဲ လၟိဟ်ကွးဘာ မွဲကိုဋ်ပြၚ် တိုန်စိုပ်ဗ္တောန်ဒၟံၚ်ပညာရ။
အတိုၚ်တၚ်လလောၚ်တြး ဌာနလလောၚ်ပရိုၚ်ဗဟဵု ဗော်သွးကောန်ဂကူကရေၚ် KNU ဂှ်မ္ဂး အပ္ဍဲဂိတုဂျာန္နဝါရဳ တုဲကၠုၚ်တေံဂှ် ဟိုတ်နူပရေၚ်ဗ္တိုက်တရဴကျာ ကေုာံ ပန်ပှော်လွဟ်ဇၞော် နူကဵုဒပ်ကံၚ်ဇြဳပၞာန်တံဂှ်တုဲ ပ္ဍဲကဵုညးမဒးဇီုကပိုက်ချိုတ်အာတံဂှ် ကွးဘာတံလေဝ် ပါလုပ်ဂှ်ကီု၊ ဆ္ဂး လၟိဟ်ဂၞန်ချိုတ်တ်ပၠိုတ်တ်ဂှ် လလောၚ်ပ္တိတ်လဝ် ဟွံမွဲရ။
သ္အာၚ်နူဂှ်ပၠန် အပ္ဍဲဂိတုဖေဖဝ်ဝါရဳ ဂိတုဏံဂှ်လေဝ် ဟိုတ်နူပရေၚ်ဗ္တိုက်တရဴကျာ ဒပ်ကံၚ်ဇြဳပၞာန်တံတုဲ အပ္ဍဲတိဍာ်ဒပ်မဟာ (၅) ခရိုၚ်ဘာပန် KNU ဂှ် သီုကဵုပါလုပ်ဘာဗ္တောန်လိက်ဂှ် စမြိုၚ်သ္ၚိဒၟံၚ်တံလေဝ် ဇီုကပိုက်လီုလာ်အာလဝ်တံ နွံလဝ်ဂှ် ဂွံတီကေတ် ဇရေၚ် KNU ရ။
ပရိုၚ်−သြၚ်လောန်တိုၚ်(မ်)