မတ်မလီု – ဖေဖဝ်ဝါရဳ(၂၁)
သွက်ဂွံဗတိုက်သရိုဟ် ကုတ်ဗပိုတ်အာ ရိုဟ်ကၞက်သၞောတ်တၠအဝဵုပၞာန် ယုတ်ပရေံဂှ် ပံၚ်တောဲရေၚ်တၠုၚ်အာ မွဲစွံရောၚ်ဂှ် ဓမံက်ထ္ၜးလဝ် ပ္ဍဲလိက်သဝဏ် အလဵုအသဳပရေၚ်ညဳသၟဟ်ကောန်ဂကူ သွက်တ္ၚဲကောန်ဂကူချေၚ် ရတ်ဗိုတ် မရနုက်ကဵု (၇၅)ဝါရ။
ပ္ဍဲလိက်သဝဏ် ပလံၚ်ဗစိုပ်လဝ် တ္ၚဲစၟတ်သမ္တီသဘၚ်ရတ်ဗိုတ် တ္ၚဲကောန်ဂကူချေၚ် ကၠုၚ်စိုပ် ပ္ဍဲဂိတုဖေဖဝ်ဝါရဳ စၟတ်တ္ၚဲ (၂၀) တ္ၚဲဏံဂှ် ဓမံက်ထ္ၜးလဝ် သာ်ဏံရ။
သွက်ဂွံကုတ်ဗပိုတ် ရိုဟ်ကၞက်သၞောတ်တၠအဝဵုပၞာန် သၞဒ္တန်ကဝ်ဂှ် ပံၚ်တောဲအာမွဲစွံတုဲ သွက်ဂွံကွာ်ဗက်အာ အတိုၚ်ပိုဒ်မ္ဂး “ ညဳမွဲရမျှာၚ် က္ညာၚ်ရုန်မွဲစွံ” ဟီုဂှ် ဗတိုက်ဖ္အောဝ်လဝ် အလုံကောန်ဂကူချေၚ် သီုဖအိုတ်ရ။
သ္အာၚ်နူဂှ်ပၠန် အခေါၚ်ပိုၚ်ပြဳဇကု၊ အခေါၚ်ပျးဌာန်ဇကု၊ အခေါၚ်တုပ်သၟဟ် ကေုာံပ္ဍဲပရေၚ်ဒက်ပ္တန်ကၟိန်ဍုၚ်ဖေတ်ဒရေဝ်ဒဳမဝ်ကရေဇြဳတၟိ မၞုံကဵု ပွဗဗွဲဓဝ် ဍိုက်က်ပေၚ်ၚ် မဒှ်ပရေၚ်ပၠန်ဂတးညးဍုၚ်ကွာန် ကေုာံတိုၚ်ပ္ကဴရန်တၟံညးဍုၚ်ကွာန်ဂှ် ဒက်ပ္တန်အာရောၚ်ဂှ် ဌာနဝန်ဇၞော်ပရေၚ်စဵုဒၞာ ဟီုသ္ဂးလဝ်ရ။
ကောန်ဂကူချေၚ်ဂှ် ကိုပ်ကၠာနူဟွံစိုပ်အာသၟဝ်တဲကိုဝ်လိုဝ်နဳဏီ ဒှ်ညးမံၚ်တန်တဴကၠုၚ် နကဵုအခေါၚ်အုပ်ဓုပ်ပိုၚ်ပြဳဇကု၊ ယေန်သၞာၚ်ဇကု၊ အခိုက်ကၞာပြဝေဏဳဇကု ကေုာံရာဇာဝၚ်သၠုၚ်ပြဲတအ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
စတမ်နူ အခိၚ်ပၠန်ဂတးတဝ်စၞေဟ်ကဵု ကိုဝ်လိုဝ်နဳဗျိတိယှသၠဲတိဂှ် ထ္ပက်ကၠုၚ်စၟတ်တဲ ပ္ဍဲလိက်ကသုက်ပေန်လုၚ်တုဲ စဵုကဵုကေတ်ကၠုၚ်အခေါၚ်ဗၠးဗၠးၜး မွဲကရောံကဵုၝောံဍုၚ် ဒေသရေၚ်ဒဵုတအ်မာန် ပရေၚ်ဂံၚ်သ္ကာ၊ ပရေၚ်သၠးပွး ပရေၚ်ဒုၚ်ဂိကောန်ဂကူချေၚ်ဂှ် သှ်ေၜက်ဒၟံၚ် ပ္ဍဲဝၚ် ပြာကတ်ဂဵုလဟဵုဒၟံၚ်ရဂှ် ဌာနဝန်ဇၞော်ပရေၚ်စဵုဒၞာ NUG ဟီုသ္ဂးလဝ်ရ။
ပရိုၚ်-သြၚ်လောန်တိုၚ်(မ်)