မိုဝ်ဗျာ – ဖေဖဝ်ဝါရဳ(၂၁)
ဒပ်ကံၚ်ဇြဳပၞာန် ပလံၚ်ဇွောံမ ပ္ဍဲဒၞာဲပယျဵုဒၞက် တွဵုရးဍုၚ်သေံကဵု တွဵုရးကရေၚ်ဍာဲဂှ် ဒပ်ပၞာန်ကရေၚ်ဍာဲပန်ဗတိုက်တုဲ ရပ်ဂွံလဝ် ကောန်ဒပ် (၅)တၠ ပါလုပ်သီုသ္ကိုပ်ဒပ်လ္ပာ် မွဲကရောံကဵုလွဟ်လက်နက်တအ် ဂျိုၚ််ၚရဂှ် KA လလောၚ်တြးလဝ် ပရိုၚ်ရ။
ပ္ဍဲဂိတုဖေဖဝ်ဝါရဳ တုဲကၠုၚ် စၟတ်တ္ၚဲ (၁၉) ဂှ် ဒပ်ကံၚ်ဇြဳပၞာန် ခလရ (၅၄) ဇြဟတ်မၞုံ (၃၀) ကၠုၚ်ပလံဇွောံမ ပ္ဍဲဒၞာဲပယျဵု တွဵုရးကရေၚ်ဍာဲ မွဲဒၞာဲဂှ် KA ကေုာံ KNDF တအ် ကြတ်ဗတိုက်လဝ် ပ္ဍဲအကြာကွာန်ဟွေအ်မာကဝ် ကဵုကွာန်ဟွေခေါန်မောၚ်ရ။
ဟိုတ်နူပရေၚ်ပန်ပှော်ဏံတုဲ သီကေတ်ဂွံလဝ် လွဟ်ဂကူ MA ဂကူစုၚ် နူလပါ်ကံၚ်ဇြဳပၞာန် (၁၀)ဒကိုအ် ကေုာံမကမ်တအ်တုဲ ဟိုတ်နူပေါဲဗတိုက်ဏံ လပါ်ကံၚ်ဇြဳပၞာန် ဒးချိုတ်လဝ် (၆)တၠရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ကြတ်ဗတိုက်လဝ် ဃောကံၚ်ဇြဳပၞာန် အာဒၟံၚ် သွက်ဂွံပလံၚ်ဗစိုပ် ဇွောံမ၊ လွဟ်လက်နက်မကမ် လပါ် ပယျဵု BP-12 ရဂှ် ဟီုသ္ဂးလဝ်ရ။
သ္အာၚ်နူဂှ်ပၠန် ပ္ဍဲဂိတုဖေဖဝ်ဝါရဳ တုဲကၠုၚ် စၟတ်တ္ၚဲ (၁၈)တေံဂှ်လေဝ် ဒပ်ကံၚ်ဇြဳပၞာန်တတ် ကၠောံဗ္ဒပ်သေံသၠုၚ်ကျာ Southern Shan State ( SSS )တုဲ ပ္တိတ်ဒၟံၚ်ဇြဟတ် သွက်ဂွံပလံၚ်ဗစိုပ်ဇွောံမဂှ် ဗတိုက်ပန်ပှ်ောလဝ်ဂှ်ရ (၃)တၠ ဒးချိုတ်အာရဂှ် ဂွံတီကေတ်ရ။
သုၚ်စောဲ တိဍာ Southern Shan State ( SSS )တုဲ ဒပ်ကံၚ်ဇြဳပၞာန် ပ္တိတ်ကၠုၚ်ဇြဟတ် သွက်ဂွံပလံၚ်ဗစိုပ်ဇွောံမ ပ္ဍဲဗ္ဒပ်ပယျဵုတအ်ရဂှ် ဒပ်ပၞာန်ကရေၚ်ဍာဲ (KA) ဓမံက်ထ္ၜးလဝ် ပ္ဍဲတၚ်လလောၚ်တြးရ။
အခိၚ်လၟုဟ်ဏံမ္ဂး ဂကောံ Southern Shan State ( SSS ) ဂှ် ဒှ်ဂကောံကေတ်လဝ်အယောၚ်အလာ ပၞာန်ညးဍုၚ်ကွာန် ကံၚ်ဇြဳပၞာန်တုဲ ညးတအ်ဂှ် ဒှ်ဂကောံထ္ပက်လဝ်စၟတ်တဲ လိက်ကသုက်ဒေါံပန်ပှော် နူသၞာံ ၁၉၉၄ တေံရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်(မ်)
ဗီုရုပ်- KA