တၚ်ဆက်စၠောံသၟာန်သွဟ်လဝ်ကဵု ဖဒိုဝ်သဝ်တဝ်နဳ။
အခိၚ်ဒပ်ပၞာန်သီုအဝဵု ပွိုၚ်(၁)သၞာံဂှ် ပ္ဍဲတိဍာ်ထိၚ်ဒဝ်ဗော်သွးကောန်ဂကူကရေၚ် KNU ဂှ် ပေါဲဗတိုက်ၜါလ္ပာ်က္တဵုဒှ်လဝ် ဗ္ဒာဲ ၈၀၀၀ ဝါကီု ဟိုတ်နူပေါဲဗတိုက်တုဲ လၟိဟ်ညးဍုၚ်ကွာန် ဒးဂြိပ်ဒဴပါဲဓလေတ်ဒၟံၚ်ပေါဲပၞာန်ဂှ်လေဝ် မၞုံကၠုၚ်စဵုကဵု (၄) ကိုတ်ပြၚ်ရ။ မွဲလပါ်ပၠန်ဂှ် ညးဍုၚ်ကွာန် ပါဲဒဴဘဲပၞာန် ပ္ဍဲတိဍာ် KNU အုပ်ဓုပ်လဝ်ဂှ် ဟိုတ်နူပရေၚ်ပန်ပှော်ဖျေံလွဟ်ဇၞော်၊ ပရေၚ်ဗတိုက်ပန်ဗတိုက် ကဵုက္ၜၚ်ကျာ ကေုာံပရေၚ်ဒးဒုၚ်ဖံက်ပ္ကဝ် အခေါၚ်အရာမၞိဟ် သ္ကာတ်တ်မြဟ်ဟ်တအ် ဒးဒုၚ်စဒၟံၚ်သိုၚ်ရ။
ဟိုတ်ဂှ်ရ ပ္ဍဲမွဲကာလပၞာန်သီအဝဵု စပ်ကဵုပရေၚ်ဒပ်ကံၚ်ဇြဳပၞာန် ဖံက်ပ္ကဝ်အခေါၚ်အရာမၞိဟ်၊ ညးဍုၚ်ကွာန်ပါဲဒဴဘဲပၞာန်တအ် ဒးဆေၚ်ဒၟံၚ်မုက်ကဵု တၚ်ခက်ခုဲတတုဲ ဆက်စၠောံသၟာန်သွဟ်လဝ်ကဵု ညးမၞုံအခေါၚ်ဟီုဂး KNU ပဒိုဝ်သဝ်တဝ်နဳရ။
-အလန်ကိုပ်ကၠာအိုတ်ဏံ အတိုၚ်တၚ်လလောၚ်တြး KNU ပ္ဍဲဂိတုဂျာန္နဝါရဳဂှ် အကာဲအရာ ပရေၚ်ကောန်အရာပ် ဒးဇီုကပိုက်ချိုတ်ဂျိုၚ်လဝ် ဂၠိုၚ်လောန်နူဂိတုတုဲကၠုၚ်တေံရ။
ယွံ။ ပ္ဍဲသၞာံဏံ ပရေၚ်ကံၚ်ဇြဳပၞာန်ဖံက်ပ္ကဝ်အခေါၚ်အရာမၞိဟ်လေဝ် ဌာနလလောၚ်ပရိုၚ် လလောၚ်ဒၟံၚ် အခိၚ်ဍာံဍာံရ။ ပိုဲဒးမၚ်ရံၚ်ဒၟံၚ် ဣဏံရ။ အကာဲအရာဂှ် ဍေံဟွံတၟေၚ်ကၠုဟ်ပုဟ်။ သာတုဲ သွက်ဂွံပရေံကၠုၚ်ရ နွံရဂှ် မိက်ဂွံဟီုရ။
-ပ္ဍဲသၞာံဏံ အကာဲအရာကံၚ်ဇြဳပၞာန် ဖံက်ပ္ကဝ်ဒၟံၚ်အခေါၚ်အရာမၞိဟ်ဂှ် ဗီုလဵုညာတ်ကေတ်ရော။ ပ္ဍဲတိဍာ် KNU အုပ်ဓုပ်လဝ် ညးဍုက်ကွာန်ပါဲဒဴဘဲပၞာန် မၞုံကၠုၚ်ဒၟံၚ် စဵုကဵု (၄)ကိုတ်ပြၚ်ရဂှ် ဂွံဆဵုကေတ်ရ။ ဟီုတှ်ေ အခိၚ်လၟုဟ်ပြဟ်ဟ်ဏံတှ်ေ သွက်ညးပါဲဘဲပၞာန် နွံဒၟံၚ်ပၟိက်ကဵု အရီုဗၚ်ဗီုလဵုရော။
ယွံ ဍာံမံၚ်ရ။ ညးဍုၚ်ကွာန်ပါဲဒဴဘဲပၞာန်တအ် ဂၠိုၚ်ကၠုၚ်ဒၟံၚ် ဗ္ဒာဲ(၄)ကိုတ်လေဝ် ဂွံတီကေတ် အတိုၚ်စရၚ်ဗလးတိရ။ ပါဲနူဂှ်ပၠန် ဇာနှိက်ဂကောံကဵုဒၟံၚ်အရီုဗၚ်ပိုဲ ဗွဲတၟေၚ်တှ်ေ အခိၚ်ညးတအ်ကလေၚ်ဂဇအ်ကောံဓရီု ကာလသ္ပဒ္တန်စရၚ်ဂှ် ပ္ဍဲစရၚ်ဗလးတိဂှ်လေဝ် စရၚ်ပိုဲတီလဝ်ဂှ်တှ်ေ ပေၚ်ဂွံအာ မသုန်ကိုတ်ယျ။ ပ္ဍဲတိဍာ် ပိုဲထိၚ်ဒဝ်လဝ်ဂှ်တှ်ေ လၟိဟ်မၞိဟ်ဂှ် ဂၠိုၚ်လောန်ဒၟံၚ်ရ။ မုဒှ်ရောတှ်ေ ကံၚ်ဇြဳပၞာန်ဂှ် တ္ၚဲနွံဟာရ ပ္တဝ်လဝ်ကဵု ညးဍုၚ်ကွာန်တုဲ ပန်ပှ်ောဒၟံၚ်ဂှ်ရ ညးဍုၚ်ကွာန် ဒးဂြိပ်ဒဴပါဲဓလေတ်ဒၟံၚ်ဟီုဂှ် ညိဟွံဒးဒှ်သၠေဟ်ပၟာရ။ ဟိုတ်ဂှ်ရ လၟိဟ်မၞိဟ်ဒးဂြိပ်ဒဴ ပါဲဓလေတ်ဒၟံၚ်ဂှ် ဂၠိုၚ်ရ။ ဂုဏ်နူဂှ်ရ။ လၟိဟ်မၞိဟ်ဂၠိုၚ်ဒၟံၚ် ဒဵုကဵုဂလိုၚ်ဏံဂှ်တှ်ေ သွက်ပိုဲ ဂွံဂၠာဲဗ္စဖျုၚ်ကဵုဂတာပ်ဂှ် ဝါတ်ဂါတ်လောန်ရ။ ဟိုတ်ဂှ်ရ တၚ်ဂၞၚ်ဌာနလလောၚ်ပရိုၚ်ပိုဲ လလောၚ်တြးပ္တိတ်လဝ်ဂှ် ဍာံဍာံဇေတ်တ်ရ။ ဓမံက်ထ္ၜးကဵုဒၟံၚ် တၚ်နွံပၟိက်ဇၞော်ဇၞော် နွံဒၟံၚ်ရ။ ပ္ဍဲလပါ်ပိုဲလေဝ် ညံၚ်ဂွံဂွံအရီုဗၚ်ကာတၟေၚ် လတူနူဏံဂှ် ဒှ်အခိၚ်ပၟိက်ဇၞော်ရ။ ကိစ္စဒှ်ဒၟံၚ်လၟုဟ်ဂှ် ပ္ဍဲကဵုတိဍာ်ပိုဲသၟး ဟွံသေၚ်ပုဟ်။ သီုအလုံဍုၚ် ဒှ်ကၠုၚ်ဒၟံၚ်ဗီုဏံဂှ်ရ အောန်အိုတ်တှ်ေ သီုအလုမ်ဍုၚ် ဟွံအောန်နူ ၜါပြကောဋိကိုတ်ပုဟ်ဂှ် အဲဂံၚ်ဟီုချိုတ်တ်ပၠိုတ်တ်ရ။ အရီုဗၚ်ကာတၟေၚ် သွက်ညးပါဲဘဲပၞာန် နွံဒၟံၚ်ပၟိက်တအ်ဂှ် ပၟိက်ဇၞော်ဒၟံၚ်ဍာံဍာံရဂှ် ဟီုစဂွံရ။
-သ္ကုတ်လကြဴဏံ ပ္ဍဲအကာဲအရာပေါဲဗတိုက် ဒှ်ကၠုၚ်သ္ကာတ်မြဟ် ပ္ဍဲကဵုတိဍာ် KNU အုပ်ဓုပ်ဂှ် ပရေၚ်ဇီုကပိုက်ချိုတ်ဂျိုၚ် လပါ်ကံၚ်ဇြဳပၞာန် ဂၠိုၚ်တိုန် နူအခိၚ်ကၠာတေံဂှ် ဂွံညာတ်ကေတ်။ မုဒှ်ရော သ္ၚဳဂၠိပ်ကဵုညိ။
မုဟိုတ်ပရေၚ်ဇီုကပိုက်ပြဟ်လလုဲ လပါ်ကံၚ်ဇြဳပၞာန် ဂွံဂၠိုၚ်တိုန်ဒၟံၚ်ရောတှ်ေ အရာဏံဂှ် ယဝ်ရဒးဟီုဂၠေံဂၠေံတှ်ေ ဍဵုဍိုက်ဒၟံၚ် ညးဍုၚ်ကွာန်တအ် ဟွံဗဗွဲဓဝ်ကီု၊ ဂကောံဟွံလုပ်သၞောဝ် ဍဵုဍိုက်ဒၟံၚ်ဗီုဏံ ဟွံဒတူလာၚ်လ္ပာ်ညးဍုၚ်ကွာန်တအ်တုဲ ဒၞာဲလဵုအာအာ ဒးဆဵုဂဗဒဒိုက်တွဵုရဂှ် သ္ဇက်ဒးဒှ်သၠေဟ်ပၟာပုဟ်။ အခိၚ်ဒးဇီုကပိုက်ကဵု ပ္ဍဲဗလးမုက်ပၞာန်ဂှ် ပရေၚ်ညးဍုၚ်ကွာန်တအ် ထံက်ဂလာန် ဟၟဲကၠုၚ်လးလးဂှ်ရ ဒှ်ဂကောံအဠက်လုပ်ဂြိုပ်တုဲ လၟိဟ်ချိုတ် လၟိဟ်ပြဟ်လလုဲတအ်လေဝ် သာတုဲ ဂၠိုၚ်တိုုန်ကၠုၚ်ဒၟံၚ်ရဂှ် မံက်ပြာကတ်ဒၟံၚ်ရ။
-အလန်လကြဴအိုတ်ဏံ မုမိက်ဂွံသတိကဵု ညးဍုၚ်ကွာန်တအ် နွံကီုရော။
ပြဟ်ဟ်ဏံ အရာမိက်ဂွံဟီုကဵု ညးဍုၚ်ကွာန်တအ် တၞဟ်သ္အာၚ်ဂှ် ဟၟဲဏီပုဟ်။ ဃောတုဲကၠုၚ်မွဲအံၚ်ဂှ်ရ နူကံၚ်ဇြဳပၞာန် သွက်ပရေၚ်အဝဵု ဂွံတန်ကြန်အာမာန်ဂှ် ဂလိုၚ်ပတိုန်ကၠုၚ် ပရေၚ်အုပ်ဓုပ် ပွိုၚ်(၆)ဂိတုတအ်၊ လလောၚ်တြးကၠုၚ် ပရေၚ်အုပ်ဓုပ်ပၞာန်တအ်၊ မာယှေဝ်ဠဝ်တအ် အရာတအ်ဏံ ယဝ်ရဒးကလေၚ်ရံၚ်အာတှ်ေ အလဵုဍေံတအ်ဂှ် ထိၚ်ဒဝ်တိဍာ် အလုံသီုဖအိုတ် ဟွံမာန်ဏီပုဟ်ဂှ် ပြာကတ်ဒၟံၚ်ကီု မွဲအခိၚ်ဓဝ်ဂှ် ဗာန်စောဲဒၟံၚ်ကဵုအဝဵု ဟွံဂွံဂှ် ညံၚ်ဂွံဂွံတုဲ ကဵုဒဒိုက် ကုညးဍုၚ်ကွာန်ဏောၚ်ဂှ် ထ္ၜးကၠုၚ်ပၟတ်သာ်ဍီုရလေဝ်။ ဟိုတ်ဂှ်ရ ညးဍုၚ်ကွာန်တအ်ဂှ် ဗီုပြၚ်လဵုဒှ်ဒှ် အခိၚ်လၟုဟ်ဏံ ဓလေတ်ပါဲအာ သီုဓဝ်လွဳနွံနွံညိ၊ ပိုဲကဵုအရီုဗၚ်ဇၞော်ဇၞော်ဟွံမာန်ပုဟ်။ ဆဂး အကာဲအရာကဵုသတိ ဗီုဏံဂှ် အလဵုပိုဲကီု၊ ညးဍုၚ်ကွာန်တအ်ကီု ဒှ်ဒၟံၚ်မွဲဖျုန်ဂှ်ရ အန္တရာယ်တအ်ဏံ အခိၚ်ဟွံရုဲကၠုၚ်စိုပ် ပ္ဍဲပိုဲမာန်ဒၟံၚ်ရ။ လွာဲကံၚ်ဇြဳပၞာန်ဟွံစှ်ေတှ်ေ၊ ဟိုတ်ဂှ်ရ ပါဲဓလေတ်အာ သီုဇဲလွဳနွံနွံညိ။ လတူနူသွက်ဂွံဒေါံညိၚ်ဒၟံၚ် ပ္ဍဲမွဲဒၞာဲဂှ် သွက်ဂွံဓလေတ်ပါဲ ဒဏ်ဂကောံပၞာန်ပ္ကီုပရာပ်တအ် ဂြာတ်ထောံဖျေံဗုမ် ပန်ဖျေံလွဟ်ဇၞော်မာန်ဂှ် ဒးပါဲဓလေတ်အာ ကဵုနဲကဲထေက်ကြိုက်တအ်ဏောၚ်။ ဗွဲတၟေၚ်တှ်ေ သွက်ဂွံဓလေတ်ပါဲအရာဏံ ဂွံဓလေတ်ပါဲ ဒဏ်ပန်ပှော်လွဟ်ဇၞော်ဏံဂှ် ကာလပိုဲဒးခါဲဥမၚ်လေဝ် ဒးခါဲဏောၚ်။ တုဲပၠန် မွဲဒၞာဲဓဝ်ဟွံသေၚ်ပုဟ်။ ပရေၚ်ဆုဲပြံၚ်အာကၠုၚ်ဒၟံၚ်လေဝ် ပိုဲဒးကၠောန်ဏောၚ်။ ဗွဲတၟေၚ်တှ်ေ ညးဍုၚ်ကွာန် နွံပ္ဍဲတိဍာ်ပိုဲဂှ် နွံဒၟံၚ်အကြာဂြိုပ် အကြာဂၞိၚ်ဂှ်ရ ဒးဂြိပ်ပါဲဓလေတ်ဒၟံၚ်လၟိုန်ကဵုဒှ်။ ယဝ်ရကောံမံၚ်ဒၟံၚ် ပ္ဍဲကဵုမွဲဒၞာဲဓဝ်ဏောၚ်ဟီုတှ်ေ ဒှ်ကၠုၚ်ဒၞာဲပန်က္ဍိုပ်ဍေံတအ်မာန်တုဲ အန္တရာဲနွံကၠုၚ်ဏောၚ်။ အရာဏံဂှ်လေဝ် သွက်ပိုဲတှ်ေ ဗီုပြၚ်စှ်ေကၠုၚ်ဒၟံၚ်ယျ။ ဟိုတ်ဂှ်ရ အခိၚ်ဏံ တ္ၚဲဏံဂှ် ပ္ဍဲကဵုဒေသပိုဲသၟးဟေၚ်ဟွံသေၚ်ရပုဟ်။ ပ္ဍဲဒေသတိဗလး၊ တိသၠာတ်တအ်လေဝ် ဗီုဍေံမိက်ဂွံကၠောန် အခိၚ်ဟွံရုဲကၠောန်ကၠုၚ်ဒၟံၚ်ဂှ်ရ စွံသတိတုဲ ဒးပါဲလေတ်အာ သီုကဝဳရိယနွံနွံညိ။