မတ်မလီု၊ ဂျူလာၚ် (၃၀)
ပ္ဍဲတွဵုရးဍုၚ်မန် ဗွဲကြဴဂဥုဲဇဗ မပၠောပ်နၚ် နူဍုၚ်သ္အာၚ်တံ ပိုတ်အိုတ်တုဲဂှ် ၚုဟ်မးဂဥုဲ ထပ်သၠုၚ်တိုန်ကၠုၚ် ဗဒါဲ (၄၀) တၟံကၠံရဂှ် တၠကမၠောန်ဆေၚ်ဂဥုဲတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ၚုဟ်မးဂဥုဲဝွံ ဟိုတ်နူကံၚ်ဇြဳပၞာန် ထိၚ်ဒက်လဝ်သြန်ဒဝ်ဠာကီု၊ အခက်အခုဲလာၚ်ဇြေန် ဗၞိက်ပၠောပ်တံတုဲ ၚုဟ်မးဆက်သၠုၚ်တိုန်ကၠုၚ်တုဲ အပ္ဍဲဗွဝ်ဖျာ ဂဥုဲဇဗလ္ၚဵု ပိုတ်အိုတ်တံ က္တဵုဒှ်ကၠုၚ်ရ။
ဟိုတ်နူဂဥုဲဇဗပိုတ်အိုတ်ကၠုၚ်ဂှ်ရ အပ္ဍဲဗွဝ်ဖျာဂှ် တန်တဴကဵုဂကူအဇာကပေါတ်တံတုဲ နူ (၃၀) တၟံကၠံ သၠုၚ်တိုန်ကၠုၚ် စဵုကဵု (၄၀) တၟံကၠံရ။
တၠကမၠောန်ဆေၚ်ဂဥုဲမွဲတၠဂှ် ၚုဟ်မးဂဥုဲဝွံ ဟိုတ်ဒၟါနူကံၚ်ဇြဳပၞာန် သၞောတ်ဗ္ၜတ်လဝ် လာၚ်ဇြေန်ဗၞိက်ပၠောပ်တံသၟးဟွံက သီုကဵုထိၚ်ဒက်လဝ် ဒဝ်ဠာဂှ်ရ ဂဥုဲဇဗပိုတ်အိုတ်တုဲ ၚုဟ် ဆက်သၠုၚ်တိုန်ကၠုၚ်ရဂှ် ဟီုရ။
“နူကၠာဂွိုအ်ကလေၚ်သီကေတ်ဒဝ်ဠာ ၜိုတ်(၂)၊ (၃) ဂိတုကၠာတေံဂှ် ဗၞိက်ပၠောပ်ဂှ် ခက်ခုဲဒၟံၚ်ရ၊ ဒးပၠောပ် ဗၞိက်ပၠောပ်ဂဥုဲဇဗတံဂှ် အရာဟွံပြေပြံၚ်တံ နွံတၟာဂလိုၚ်ရ၊ ဆ္ဂး အခါဂှ်တှ်ေ ညံၚ်ဂွံပြေပြံၚ်ညိည ညံၚ်ဂွံဂွံဂှ် ကၠောန်စမ်လဝ်ဏီရ၊ အေဒၞါဲဂှ်ရ ဂဥုဲဇဗပိုတ်အိုတ်တံ မၞုံဒၟံၚ်ဏီရ၊ လၟုဟ်မ္ဂး သာပရေံအာရ၊ ဂဥုဲမပိုတ်အာတုဲတံ ဟွံကလေၚ်လုပ်သၟးဟွံက ဒၟါနူအကာဲအရာတံဏံတုဲ ဒဝ်ဠာဂှ်လေဝ်ၚုဟ်တိုန်၊ ဂဥုဲဇဗဂှ်လေဝ်ၚုဟ်တိုန်၊ ဗၞိက်ပၠောပ်တၟိတံလေဝ် ပၠောပ်ဟွံမာန်ပုဟ် ဒှ်အာရ” ဂှ် သ္ဂးရ။
ဟိုတ်နူဂဥုဲဇဗပိုတ်အိုတ်တံ မၞုံကၠုၚ်ဂှ်ရ ကုမ္ပဏဳလ္ၚဵု ကၟာတ်ကၠုၚ်ပရေၚ်သွံတံတုဲ ကုမ္ပဏဳမသှ်ေဒၟံၚ်တံဂှ်လေဝ် သွံကဵုဒၟံၚ် ဆအရၚ်ပါ်ပရအ်သၟးရ။
ဟိုတ်ဂှ်ရ နကဵုကံၚ်ဇြဳပၞာန် ယဝ်ရသောၚ်ကလးကဵု အခက်အခုဲ လာၚ်ဇြေန်ဗၞိက်ပၠောပ်တံ ဟွံမာန်မ္ဂး ဒးဆေၚ်ကၠုၚ်မုက်ကဵု ဂဥုဲဇဗပိုတ်အိုတ်တံ ဗွဲမဇၞော်ကဵုဇြဟတ်မာန်ဂှ် တၠကမၠောန်ဆေၚ်ဂဥုဲတံ သ္ၚဳဂၠိပ်လဝ်ရ။
အပ္ဍဲတွဵုရးဍုၚ်မန်ဂှ် ဂွိၚ်ဂဥုဲပိုတ်အိုတ်တုဲ ရာန်ပကောံပကေဝ်တံ ဂၠိုၚ်ကၠုၚ်ဂှ်ရ ဂဥုဲဇဗ သွက်ယဲပဿဴဍာတ်၊ ယဲဆီၜေတ် ကေုာံ ယဲကောန်တၟံတံဂှ်မ္ဂ ဒးဆေၚ်ဒၟံၚ်မုက်ကဵု အကာဲအရာ ကြပ်ပိုတ်အိုတ်တံရ။
ကၟိန်ဍုၚ်ဗၟာဝွံ ဂဥုဲဇဗ ကဵု ကပေါတ်မဆၚ်စပ်တံဂှ် ပၠောပ်ပ္တိုန်ဒၟံၚ် နူကဵုဍုၚ်သေံ၊ ကြုက်၊ အိန္ဒိယ တံ အဓိကတုဲ ဗွဲကြဴဒပ်ပၞာန်သီအဝဵုတုဲ ဒၟါနူအရာမကၞာတ်ဂစိုတ်လဝ်တံဂှ်ရ သွက်ဂွံပၠောပ်ပ္တိုန်ဂဥုဲဇဗတံဂှ် ဒးဂဗဒၟံၚ်အခက်အိုတ်ရ။
ပရိုၚ်−သြၚ်လောန်တိုၚ်(မ်)