လ္ဂုၚ်၊ ဂျူလာၚ် (၃၀)
ပရေၚ်ဒှ်ဓဝိၚ် စပ်ကဵုကံၚ်ဇြဳပၞာန် ထပ်ကၠောန်ဏာ ပွမစဳရေၚ်ကဵုဒဏ်ဂစိုတ် ကုကောန်ထံၚ်ပရေၚ်ဍုၚ်ကွာန် မဒးဒုၚ်ဖျေံစၟတ်လဝ်ဒဏ်ဂစိုတ်တံ မၞုံဒၟံၚ်ဂှ် ဂကောံရီုဗၚ်မၚ်မွဲ ကောန်ထံၚ်ပရေၚ်ဍုၚ်ကွာန် AAPP ဟီုရ။
ကံၚ်ဇြဳပၞာန်ဝွံ နလၟေၚ်နဲကဲအခိုက်အလိုက်ထံၚ်စာတ်တံဂှ် ကဵုလဝ်ဒဏ်ဂစိုတ် ကုကိုဝ်ဂျေန်မဳ၊ ကိုဝ်ဖျဵုဇြေယျာဒဝ်၊ ကိုဝ်လှမျဵုအံၚ် ကေုာံ ကိုဝ်အံၚ်သူရဇြဝ်တံ မဒှ်ညးချဳဒရာၚ်ကတိုၚ်ကၟုဟ် ပရေၚ်ဒဳမဝ်ကရေဇြဳတံတုဲယျဂှ် လလောၚ်ပ္တိတ်ကၠုၚ် ပ္ဍဲဂိတုဂျူလာၚ် (၂၅) ဂှ်ရ။
ဒၟါနူပြဝဏံတုဲ ထပ်ကၠောန်ကၠုၚ် ပွမစဳရေၚ်ကဵုဒဏ်ဂစိုတ် ကုညမဒးဒုၚ်ဖျေံလဝ်ဒဏ်ဂစိုတ် မသှ်ေဒၟံၚ် အပ္ဍဲကဵုထံၚ်တံရောၚ်ဂှ် သီုကဵု ဗွိုၚ်ညးဂၠးတံ မပါလုပ် အကြာကောန်သ္ၚိကၟိန်ညးတံကဵု ညးဍုၚ်ကွာန်တံဂှ် ပရေၚ်ဒှ်ဓဝိၚ်ဂွိၚ်ဂွါဲတံ မၞုံဒၟံၚ်ရောၚ်ဂှ် ညးဒုၚ်တာလျိုၚ် ဂကောံ AAPP ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“အခိၚ်လၟုဟ် မၞိဟ် (၇၆) တၠ ပ္ဍဲကဵုထံၚ်စာတ်တံဂှ် ဒးဒုၚ်ဖျေံစၟတ်လဝ်ဒဏ်ဂစိုတ်ရ၊ ဆက်စပ်ကဵု မၞိဟ်တံဏံတုဲ ပိုယ်တံညဂမၠိုၚ်ကီု၊ သီုကဵုဗွိုၚ်ဍုၚ်ဂၠးတိတံကီုဂှ် ဂွိၚ်ဂွါဲဒၟံၚ်အိုတ်ရ၊ ဒပ်ပၞာန်ဂှ် ကုညးမဒစဵုဒစးဍေံတံ ညံၚ်ရဴ ကိုဝ်ဂျေန်မဳတံ ကိုဝ်ဖျဵုဇြေယျာဒဝ်တံဂှ် ဆက်တုဲ ဂစိုတ်အာမဏီဟီုဂှ် ပိုယ်တံဂွိၚ်ဂွါဲဒၟံၚ်ရ” သာ်ဝွံ သ္ဂးရ။
ကံၚ်ဇြဳပၞာန်ဂှ် ဇၟာပ်မၞိဟ်ဒးဒုၚ်ဖျေံဒဏ်ဂစိုတ်တံဂှ် ၜိုန်ရစဳရေၚ်ကဵုအာဒဏ်ဂစိုတ် ဟွံသေၚ်ကီုလေဝ် တန်တဴကဵု လ္တူဒုဟ်မလုတ်လောန်လဝ်တံဂှ်တုဲ ဂဗုတ်ထေက်ကဵုဒးဒုၚ်ဖျေံဒဏ်ဂစိုတ် ဂၠိုၚ်ၚ်ကဵုဝါတံဂှ် ရေၚ်တၠုၚ်အာ အတိုၚ်သၞောဝ်ဥပဒေရောၚ် သာ်ဝွံ သွဟ်လဝ်ကဵု ဌာန်ပရိုၚ် BBC ပ္ဍဲဂိတုဂျူလာၚ် (၂၈) ဂှ်ရ။
ညးရေၚ်တၠုၚ်ဂဗုတ်ဝှ်ကြံၚ် ဥူကျဳမျေတ်ဂှ် က္ဍိုပ်သ္ကိုပ်ပၞာန်ဝွံ အခေါၚ်စဳရေၚ်ကဵုဒဏ်ဂစိုတ် ဟွံမွဲတုဲ ယဝ်ရထပ်ကၠောန် ပွမစဳရေၚ်ဒဏ်ဂစိုတ်တံပၠန်မ္ဂး အတိုၚ်သၞောဝ်ဥပဒေရာဇသာတ်ဇၞော် ၝောံပိုဒ် ၃၀၂(၁) ဂှ် ဒးကဵုဒုဟ် နကဵုအမှုဂစိုတ်မၞိဟ်ရောၚ်ဂှ် ဟီုရ။
“အပ္ဍဲပွိုၚ် (၇) တ္ၚဲဂှ် ဒးတိုန်ဂရၚ်ပ္တီ ရုၚ်ဂဗုတ်ရးဒေသဂှ်တုဲ နူကဵုဂှ် ပြံၚ်ထောံဒုဟ်ဒဏ် ထံၚ်မွဲအာယုက်မာန်ရ၊ ဖျေံဒဏ်ထံၚ် စှ်သၞာံမာန်ရ၊ အတိုၚ်ဥပဒေဂှ် ဗလးကဵုမာန်ရ၊ အေဗီုဏံ ထပ်သ္ပဒတန် ဒဏ်ဂစိုတ်ဂှ်မ္ဂး ဒးတိုန်ရုၚ်ဂဗုတ်ကၠတ်ကဆံၚ်သၠုၚ်အိုတ်တေံ အပ္ဍဲပွိုၚ် (၆၀) တ္ၚဲရ၊ ပလေဝ်ပလေတ်အမှုရာဇဝတ်ဂှ် ဒးတိုန်ဂရၚ်ပ္တီ အလန်ဒုတိယရ၊ နူကဵုဂှ် ပြံၚ်ထံၚ်မွဲအာယုက်၊ (၁၀) သၞာံမာန်ရ၊ ဗလးလေဝ် ဗလးမာန်ရ” သာ်ဝွံ ညးသ္ဂးရ။
အတိုၚ်စရၚ် ဂကောံရီုဗၚ်မၚ်မွဲ ကောန်ထံၚ်ပရေၚ်ဍုၚ်ကွာန် AAPP စဵုကဵု ဂိတုဂျူလာၚ် (၂၈) ဂှ်မ္ဂး ဆက်စပ်ကဵု ပၠန်ဂတးဥတုက္ညၚ်တုဲ ကောန်ထံၚ်ပရေၚ်ဍုၚ်ကွာန် ဒးဒုၚ်ဖျေံလဝ်ဒဏ်ဂစိုတ်တံဂှ် (၇၆) တၠ မၞုံရဂှ် သ္ဂးရ။
ပ္ဍဲကဵုဂှ် မၞိဟ်တြုံမွဲတၠ ကေုာံ မၞိဟ်ဗြဴမွဲတၠ မဒးဒုၚ်ဖျေံလဝ်ဒဏ်ဂစိုတ်တံဝွံ ဟိုတ်နူဂရၚ်ပ္တီအံၚ်ဇၞးလဝ်တုဲ နူကဵုဒဏ်ဂစိုတ်ဂှ် ဒးဒုၚ်ဖအောန်ဖျေံလဝ်ဒုဟ်ဒဏ် ထံၚ်မွဲအာယုက်ဂှ် ထ္မံက်ထ္ၜးလဝ် ပ္ဍဲစရၚ် AAPP ဂှ်ရ။
လ္တူကံၚ်ဇြဳပၞာန် စဳရေၚ်ကဵုဒဏ်ဂစိုတ် ကုညးချဳဒရာၚ်ကတိုၚ်ကၟုဟ် ပရေၚ်ဒဳမဝ်ကရေဇြဳတံဂှ် သီုကဵုကံၚ်ဇြဳဂီုကၠီု ကုလသမဂ္ဂ မပါလုပ် အလဵုအသဳဍုၚ်သ္အာၚ်တံ ကေုာံ ညးစၞးတၟေၚ်အာဇြဳယာန်တံအိုဿီု ဟီုဗျိလဝ်တုဲ ညးဒးဒုၚ်ဖျေံလဝ်ဒဏ်ဂစိုတ်တံ ထပ်တုဲ ဂစိုတ်ဒက်အာကအ်ပၠန်ရောၚ်ဂှ် ဂွိၚ်ဂွါဲစံၚ်တူ ဒၟံၚ်အိုတ်ရ။
ပရိုၚ်−သြၚ်လောန်တိုၚ်(မ်)