မတ်မလီု၊ ဖေဖဝ်ဝါရဳ (၂၂)
ပ္ဍဲမွဲဒမြိပ်ဂၠံၚ်ဇၞော်အာယှ ဗြဝတဳ−ဘာအၚ် မဒှ်ဂၠံၚ်ကူသာန်သွံရာန် သေံ−ဗၟာၜါဍုၚ်ဂှ် ပ္ဍဲကဵုသၞေဟ်ကၚ်စၟဳစၟတ် ကံၚ်ဇြဳပၞာန်တံ မပံက်လဝ် နကဵုတၚ်ထ္ၜးဟိုတ် ပရေၚ်ဂီုကၠီုတံဂှ် ဒဒှ်မအာတ်ကၠုၚ်သြန်တံ သာပရေံကၠုၚ်ရဂှ် သၟာဗၞိက်တံကဵု ညးမဒဳဒၟံၚ်ကွဳစက်ဖ္ဍိုက်ဗၞိက်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကံၚ်ဇြဳပၞာန်ဝွံ ပ္ဍဲဂၠံၚ်ဇၞော်အာယှ မြဝတဳ−ဘာအၚ်ဂှ် ဟိုတ်နူပေါဲဗ္တိုက်တံ က္တဵုဒှ်ဒၟံၚ် မွဲဏှမွဲဏှဂှ်ရ နကဵုတၚ်ထ္ၜးဟိုတ်ပရေၚ်ဂီုကၠီုဂှ် ထပ်ဂလိုၚ်ပ္တိုန်လဝ် သၞေဟ်ကၚ်စၟဳစၟတ်တံတုဲ လ္တူကွဳစက်ဖ္ဍိုက်ဗၞိက်တံကဵု ကွဳစက်အာတရဴတံဂှ် အာတ်ဒၟံၚ်လှုဲ မွဲဆမွဲတာန်တံဂှ် ကၠောန်ၜိုတ်ဒၟံၚ်ရ။
အခိၚ်လၟုဟ်ဂှ် ကံၚ်ဇြဳပၞာန်ဝွံ နကဵုတၚ်ထ္ၜးဟိုတ်ပရေၚ်ဂီုကၠီုဂှ် ပ္ဍဲကဵုမွဲဒမြိပ်ဂၠံၚ်ဇၞော်အာယှဂှ် ထပ်ပံက်ဂလိုၚ်ပ္တိုန်လဝ် သၞေဟ်ကၚ်စၟဳစၟတ် ဒပ်မၚ်ပယျဵု BGF တံတုဲ အာတ်မိက်ဒၟံၚ်သြန်လှုဲ လ္တူနူကၠာတေံ (၂) ဆနွံတုဲ ၜိုတ်ဍေံတံအာတ်ဂှ် နကဵုသၟာကွဳစက်တံ ဟွံဒေါအ်ဟွံဂွံ ဒးကဵုဒၟံၚ်ရောၚ်ဂှ် သၟာဗၞိက်ပယျဵုမွဲတၠ ဟီုရ။
“အေညအ်ဂှ် စၟအ်အ်ဒၞါဲရဏောၚ်၊ တုဲတှ်ေ စွံလဝ်ဒပ်မၚ်ပယျဵုတံဂှ်တုဲ ကၠာတေံ ဒပ်ပၞာန်ဗၟာ ကေတ်မွဲဒ္ကေဝ်မ္ဂး ဍေံတံဂှ် ဒှ်အာၜါဒ္ကေဝ်ယျ။ ကၠာတေံ နူကဵုသၞေဟ်ကၚ် (၅၀၀၀) ဂှ် လၟုဟ် ဒှ်အာ (၁၀၀၀၀) ယျ။ အဓိကဂှ်တှ်ေ အခိၚ်ဖျေံထောံ ဒပ်မၚ်ပယျဵုတံဒၞါဲဂှ်ဂှ် လ္တူနူကၠာတေံဂှ် သာတုဲအာတ်ဒၟံၚ်အိုတ်ရ။ ဒပ်မၚ်ပယျဵုဂှ်တှ်ေ အခါဖျေံထောံဒပ်တံဂှ် သြန်ဂိတုလေဝ် ဟွံမွဲပုဟ်လေဝ်။ ဇွောံမဍေံတံလေဝ် ဟွံမွဲပုဟ်။ နူကဵုဖျေံလဝ်ဒၞါဲဏံဂှ်ရ နူကဵုသၟာကွဳစက်တံဂှ်ရ ဍေံတံ ဂွံအာတ်စဒၟံၚ်။ ဂၠံၚ်လ္တူဒဵုတေံဟီုမ္ဂး ဒှ်ကၠုၚ်တၟာဂလိုၚ်ရ။ ဒှ်သဘဴကဵုထောံ ဂၠံၚ်ဏံ အပိုၚ်ရ။ သၟာကွဳစက်တံလေဝ် ဒးကဵုဂှ်ရ။ ဟွံကဵုမွဲသာ် ညးမွဲမှ ဟွံဂံၚ်မံၚ်ပုဟ်။ မုပရောဟီုတှ်ေ ပ္ဍဲကဵုတဲဇကုဂှ် မုမှဟွံမွဲပုဟ်လေဝ်” သာ်ဝွံ သ္ဂးရ။
သ္အာၚ်နူဂှ်ပၠန် ဒပ်မၚ်ပယျဵု သၟဝ်တဲကံၚ်ဇြဳပၞာန်တံဝွံ ပ္ဍဲဒၞါဲအာတ်သြန်တံဂှ်လေဝ် ကၚ်မွဲကုမွဲဂှ် ၚုဟ်ဟွံတုပ်တုဲ ဍေံတံနွံပၟိက်မ္ဂး ၜိုတ်နွံပၟိက်ဂှ် လေပ်အာတ်တဴတုဲ အတိုၚ်ၚုဟ်ဍေံတံအာတ်ဂှ် ယဝ်ရဟွံကဵုမ္ဂး ရပ်ဒက်ကေတ်ဒုဟ်ရောၚ်ဂးတုဲ ဘပဠ အနိၚ်အပိုၚ်တံ နွံဒၟံၚ်ဂှ် သ္ဂးရ။
ပ္ဍဲကဵုမွဲဒမြိပ်ဂၠံၚ်ဇၞော်အာယှ ဗြဝတဳ−ဘာအၚ်−မတ်မလီုဂှ် ကံၚ်ဇြဳပၞာန် ပံက်လဝ်သၞေဟ်ကၚ်တံ ဟွံအောန်နူကဵု (၂၀) တုဲ တန်တဴကဵု လ္တူသၞေဟ်ကၚ်စၟဳစၟတ်တံဂှ်တုဲ ကွဳစက်မွဲဖ္ဍိုက်ဂှ် ဒးကဵုဒၟံၚ် နူကဵု (၂၀၀၀၀) စဵုကဵု (၅၀၀၀၀) ရ။
ပ္ဍဲကဵုသၞေဟ်ကၚ်စၟဳစၟတ်ကံၚ်ဇြဳပၞာန်တံဂှ် ဟိုတ်နူဒးဒုၚ်အာတ်ဒၟံၚ် သြန်လှုဲတံ မွဲဆမွဲတာန်ဂှ်ရ သွက်ဂွံဓရိပ်ကွဳစက်ဂှ် တၟော်စဟွံကိတ်ရတုဲ စိုပ်ကၠုၚ် ဒဵုကဵုအကာဲအရာဒးဒေါအ်ဇူတံရောၚ်ဂှ် ညးဒဳကွဳစက်ဖ္ဍိုက်ဗၞိက်မွဲတၠ ဟီုရ။
“ပ္ဍဲမတ်မလီုကဵု ဗြဝတဳဂှ်တှ်ေ ၜိုတ် (၂၀) ဂှ် နွံ။ ဂၠိုၚ်အိုတ်ဂှ်တှ်ေ ၜက်ကၠုၚ်ကအ်ကြိက်တှ်ေ သာဂၠိုၚ်ဏောၚ်။ BGF တံဂှ် အာတ်ကၠုၚ်ကွေံကွေံရ။ မၞိဟ်ၜါ မွဲဂကောံဂှ်တှ်ေ (၃၀၀၀၀)။ လဆောဝ်လဆောဝ်မ္ဂးလေဝ် စိုပ်လ္ပာ်ဏံမ္ဂး (၅၀၀၀၀) (၂၀၀၀၀) ၊ (၅၀၀၀) ဂှ် သဝ်အိုတ်ရ။ ကွဳစက်တံဂှ်တှ်ေ ဂွံဂြိပ်ဂှ် တၟော်ဟွံကိတ်ရပုဟ်။ စိုပ်ဒၟံၚ်ဍာ် ဒးဒေါအ်ထောံရဏောၚ်။ သီုဖအိုတ်ဂှ် ဟိုတ်နူလွဟ်နွံတုဲဟေၚ် ဒးဖေက်ဒၟံၚ်ရ။ ကြေပ်ဂှ် ဂၠိုၚ်ဒၟံၚ်ဏောၚ်။ တုဲတှ်ေ ဟွံဒးကဵုလှုဲလေဝ် ဟွံသေၚ်ပုဟ်၊ ဒးကဵုဂှ်ရ၊ ကဵုလှုဲတုဲဂှ် ဗလးဟဂှ်ရ။ တ္ၚဲတံဂှ်လအ်၊ ၚုဟ်ဖျာဂှ် တိုန်ကၠုၚ်။ ကွဳစက်တံဂှ်တှ်ေ ကၟာတ်ဒၞါဲတေံ၊ ကၟာတ်ဒၞါဲဏံ” သာ်ဝွံ သ္ဂးရ။
ပ္ဍဲကဵုသၞေဟ်ကၚ်စၟဳစၟတ်ကံၚ်ဇြဳပၞာန်တံဂှ် ဟိုတ်နူအာတ်မိက်ကၠုၚ်လှုဲတံ ဂၠိုၚ်ကၠုၚ်ဂှ်ရ ပ္ဍဲဒၞါဲယိုက်ပလံၚ် ကပေါတ်ဗၞိက်တံဂှ် လ္တူနူကၠာတေံဂှ် ခရိတ်အိုတ်တံ သာအိုတ်ဂၠိုၚ်ကၠုၚ်တုဲ ဒၟါနူၚုဟ်ကၠေၚ်စက် သၠုၚ်တိုန်ဒၟံၚ်ဂှ်လေဝ် ၚုဟ်ကပေါတ်ဗၞိက် အပ္ဍဲဗွဝ်ဖျာတံ သာသၠုၚ်တိုန်ကၠုၚ်ရဂှ် ဂွံတီကေတ် ဇရေၚ်သၟာဗၞိက်တံရ။
သ္အာၚ်နူဂှ်ပၠန် နကဵုတၚ်ထ္ၜးဟိုတ် ပရေၚ်ဂီုကၠီုဂှ် ပ္ဍဲအခိၚ်ကံၚ်ဇြဳပၞာန်တံ စၟဳစၟတ်ဂှ်လေဝ် ဒၟါနူကဵုအခိၚ်လအ်လဒၟံၚ်တံ နွံဒၟံၚ်တုဲ လ္တူဗၞိက်ဂေတ်ဂြိပ်တံဂှ် အရာမဇီုကပိုက်တံ ဇၞော်ဒၟံၚ်တုဲ သီုကဵုထပ်ဒးဆေၚ်ဒၟံၚ်မုက် ကုပြသၞာ ကပေါတ်ဟွံစိုပ်အပ္ဍဲဗွဝ်ဖျာ ဗွဲမဂတာပ်အခိၚ်တံရ။
ဍုၚ်သေံဝွံ သုၚ်စောဲဂၠံၚ်ဇၞော်အာယှဂှ်တုဲ နူကဵုအပိုၚ်အခြာဒေသသွံရာန်ဗၞိက် ဗြဝတဳဂှ် ပၠောပ်ပ္တိုန်ဒၟံၚ် အပ္ဍဲဍုၚ်ဗၟာ ဗၞိက်စၞစသုၚ်၊ ဂၠိက်ယာတ်၊ ဗၞိက်ပယျေဝ်၊ သီုကဵုပါလုပ် စက်ယန္တယာကီု သီုကဵုကပေါတ်အရပ်စပ် ပရေၚ်သိုၚ်ခၞံတံ အဓိကရောၚ်ဂှ်တုဲ နူကဵုဍုၚ်ဗၟာဂှ်လေဝ် အဓိကပလံၚ်ပ္တိုန်သွံတြးဒၟံၚ် အပ္ဍဲဍုၚ်သေံတေံ သတ်ဂန်၊ တၞောန်သ္ၚု၊ ဗၞိက်တိတ်နူဍာ်တံကဵု ဗၞိက်တိတ်နူပရေၚ်တဵုလွဳတံ မဒှ်ရ။
ပရိုၚ်−သြၚ်လောန်တိုၚ်(မ်)