ထဝါဲ၊ ဖေဖဝ်ဝါရဳ(၂၂)
ရးဒေသဇၞော်တၞၚ်သဳ၊ ပ္ဍဲကွာန် မၞုံပ္ဍဲဒေသဂြိုပ်ဗၟံက် ပွိုၚ်ဍုၚ်ထဝါဲဂှ် အကြာဒပ်ကံၚ်ဇြဳပၞာန်ကဵု ဒပ်စဵုဒၞာညးဍုၚ်ကွာန်တအ် ပေါဲဗတိုက်တ္ၚဲဆက် က္တဵုဒှ်ဒၟံၚ်ရဂှ် PDF ဂြိုပ်ဗၟံက်ထဝါဲ ဟီုကဵု ဌာန်ပရိုၚ်သြန်လောန်တိုၚ်(မ်)ရ။
စတမ်နူ ဂိတုဖေဖဝ်ဝါရဳ စၟတ်တ္ၚဲ (၁၅) တုဲကၠုၚ်တေံတုဲ ဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန် ဗ္ဒာဲကွာန်ဝကုမ်၊ တေန်ကာန်တုမ် ကေုာံဒၠဲဒဵုဘေဝ်မတာပ် မၞုံပ္ဍဲဒေသဂြိုပ် ဗၟံက်ထဝါဲဂှ် နကဵုဇြဟတ်ဒပ် (၁၀၀)ပြၚ်ပြၚ်ရ။
ဟိုတ်နူကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်တုဲ နူကဵုဂိတုဖေဖဝ်ဝါရဳ စၟတ်တ္ၚဲ (၁၅) စဵုကဵု စၟတ်တ္ၚဲ (၁၈) ပ္ဍဲပေါဲဗတိုက်က္တဵုဒှ်လဝ်ပွိုၚ် (၄)တ္ၚဲဂှ် လပါ်ကံၚ်ဇြဳပၞာန် အောန်အိုတ် (၈)တၠ ဇီုကပိုက်ဒးချိုတ်လဝ်ရဂှ် သ္ဂးလဝ်ရ။
ပ္ဍဲကဵုပေါဲဗတိုက်ဂှ် သ္ဂံၚ်ဘိုဝ်ဘိုဝ် နူပွိုၚ်ဍုၚ်ထဝါဲ ကရောၚ်ပၞာန်ကဴဝဴ၊ ခရိုၚ်ထဝါဲ တံဒပ်လၟိဟ်(၁) ဒပ်ပၞာန်စဵုဒၞာညးဍုၚ်ကွာန် ဒးပြဟ်လလုဲအာလဝ်ရဂှ် ဂွံတီကေတ်ရ။
ပ္ဍဲပေါဲဗတိုက် တေန်ကာန်တုမ် က္တဵုဒှ်လဝ် ပ္ဍဲဂိတုဖေဖဝ်ဝါရဳ စၟတ်တ္ၚဲ (၁၈)ဂှ် ဟိုတ်နူလွဟ်ဇၞော်ကံၚ်ဇြဳပၞာန် ပန်ဖျေံဏာလဝ်တုဲ ဘာဗ္တောန်လိက် (၁)ဘာ၊ သ္ၚိဒၟံၚ် (၂)မ ဇီုကပိုက် ဒးလီုလာ်လဝ်ကီု ကောန်ၚာ်သၟတ်မွဲတၠ ဂွံလဝ်ဘဲဝပ်ရ။
ကရောၚ်ပၞာန်ကံၚ်ဇြဳ ထ္ပက်ကၠုၚ်ပၞာန် အခိၚ်လၟုဟ်ဏံဂှ် ၜိုန်ရဆက်တိတ်အာ လပါ်ပကာရဳ ကေုာံ ဍုၚ်မေတ္တာကီုလေဝ် ပရေၚ်ပၞာန်ၜါလ္ပာ် ဆက်ကြံၚ်မ္ၚိုက်ဒၟံၚ်ဏီဖိုဟ်ရ။
ပ္ဍဲကဵုဒေသဂြိုပ်ထဝါဲဂှ် အကြာဒပ်ကံၚ်ဇြဳပၞာန်ကဵု ဒပ်စဵုဒၞာညးဍုၚ်ကွာန်တအ် ၜိုန်ရပေါဲဗတိုက်သ္ၚိတ်ဇြကၠုၚ်ဒၟံၚ် အခိၚ်လအ်လကီုလေဝ် အခိၚ်လၟုဟ်ဏံ ပေါဲဗတိုက် ကလေၚ်က္တဵုဒှ်ကၠုၚ်လဝ်ပၠန်ရ။
ပရိုၚ်-သြၚ်လောန်တိုၚ်(မ်)