တၚ်ဆက်စၠောံသၟာန်သွဟ်လဝ်ကဵု ညးကဵုက္သပ် ဇာနှိက်အခေါၚ်အရာသၟာကမၠောန်ဆုဲပြံၚ် MWRN ဥူအောၚ်ကျဝ်။
သၟာန်ကမၠောန်ကၟိန်ဍုၚ်ဗၟာ ဆုဲပြံၚ်စိုပ်ကၠုၚ်ဍုၚ်သေံ နကဵုလိက်ကသုက် MOU တအ်ဂှ် ဒးဆေၚ်ဒၟံၚ်မုက်ကဵု ပြသၞာမပ္တံကဵု ပရေၚ်ဟွံဂွံကမၠောန်၊ ဟွံဂွံၚုဟ်မး ကမၠောန်သြန်ဂိတု၊ လပါ်တၠကမၠောန်တအ် သီကေတ် လိက်အုပ်ပါတ်သပေါတ်၊ ဟွံကဵုအခေါၚ်ကၠောန် ကမၠောန်အတိုၚ်ပါလုပ် ပ္ဍဲလိက်ကသုက်ကီု၊ ပရေၚ်ဟွံကဵုပြံၚ်ဆုဲကမၠောန် ကေုာံဟွံကဵုၚုဟ်မးဆောံလေၚ်တအ်ဒှ်တမ် ဒးဆေၚ်ဒၟံၚ်မုက်ရ။ ဟိုတ်ဂှ်ရ စပ်ကဵုသၟာန်ကမၠောန် MOU ကၟိန်ဍုၚ်ဗၟာ ဆုဲပြံၚ်စိုပ်ဒၟံၚ်ဍုၚ်သေံ တအ် ဒးဆေၚ်ဒၟံၚ်မုက်ကဵု အခက်ခုဲ၊ ပရေၚ်ညးဆေၚ်စပ်တအ်သောၚ်ကလးရေၚ်တၠုၚ်ကဵုဒၟံၚ် ဗီုပြၚ်လဵုနွံရော၊ စပ်ကဵုအကာဲအရာဏံတုဲ ဆက်စၠောံသၟာန်သွဟ်လဝ်ကဵု ညးကဵုက္သပ်ဇာနှိက်အခေါၚ်အရာသၟာကမၠောန်ဆုဲပြံၚ် MWRN ဥူအောၚ်ကျဝ်ရ။
-အလန်ကိုပ်ကၠာအိုတ်ဏံ သၟာကမၠောန် MOU စိုပ်ကၠုၚ်ဍုၚ်သေံတအ် ဒးဆဵုဂဗဒၟံၚ်ကဵုသွာၚ်ကမၠောန်ဟွံပြေပြံၚ်၊ ကမၠောန်ကၟိတ်ဟွံပြေပြံၚ်၊ ကမၠောန်ဟၟဲတအ်ရဂှ် ဂွံတီကေတ်ရ။စပ်ကဵုအကာဲအရာဏံတုဲ ဟီုထ္ၜးကဵုညိ။
အရာဏံဂှ် ဒှ်အရာဟွံထေက်ကဵုဒှ်ရဂှ် ဒးဟီုရ။ MOU ဂှ် ၜက်လောန်အာပယျဵုတုဲမှ လုပ်ကၠုၚ် ဟွံလုပ်ကဵုသၞောဝ်တုဲမှ ဒှ်ကမၠောန်ဒးကၠောန်ကဵု ညးစအကြာဟွံသေၚ်တုဲ ကၟိန်ဍုၚ်ဆေၚ်စပ်ၜါဍုၚ်တအ် ထ္ပက်စၟတ်တဲ တုပ်စိုတ် သဘဴ G TO G တုဲဟေၚ်မှ အေဂျေန်ဇြဳ ပ္တိုန်လဝ်စရၚ်လုပ်သၞောဝ်ဂှ်ရ ထ္ပက်စၟတ်တဲကဵု သၟာကမၠောန်လုပ်ကဵုသၞောဝ်တုဲ သၟာကမၠောန်ပလံၚ်ဗစိုပ်နၚ်လဝ်ဂှ် စိုပ်ကၠုၚ်ဍုၚ်သေံတုဲ ကမၠောန်ဟၟဲပုဟ်ဟီုဂှ် ညိဟွံထေက်ကဵုရဒှ်ရ။ ဗီုဏံဂှ် တေံလောန်ကၠုၚ်အခိၚ်တုဲကၠုၚ်တေံလေဝ် ကေၚ်ဒှ်လဝ်ရ။ ဆဂးဂှ် အရာသီုဖအိုတ်တအ်ဂှ် ဟိုတ်နူဂကောံဂအုပ်အေဂျေန်ဇြဳကဵုဒှ်၊ သၞာဲဒဴမၞုံကဆံၚ်သၟာကမၠောန်ဆေၚ်စပ်တအ်၊ ကေုာံဂကောံရေၚ်တၠုၚ်ကဵုဒၟံၚ် ပရေၚ်သၟာကမၠောန် မၞုံတာလျိုၚ်ဆေၚ်ရာကဵုတိဍာ်တအ်ဂှ် ပံၚ်တောဲတုဲ ဟိုတ်နူသောၚ်ကလးလဝ်ဂှ်ရ ဗွဲမဂၠိုၚ်တှ်ေ ၜိုန်ရကၠေံဗ္ဒန်အာကီုလေဝ် အလန်ဏံမွဲအလန်ဂှ် ထပ်တုဲစိုပ်ကၠုၚ်နကဵု MOU လုပ်ကဵုသၞောဝ်မွဲအလန်ပၠန်ရ။
အခိၚ်စိုပ်ကၠုၚ်လပါ်ဏံဂှ် ပ္ဍဲကဵုကမၠောန်ချုက်လဝ်လိက်ကသုက်ဂှ် ဒၟာနူကမၠောန်ဟၟဲတုဲ ဒးပြံၚ်အာဒၞာဲလဵုရ။ ဒးပြံၚ်အာအဏံရ။ ဒးအာသၠုၚ်ကျာရ သၟဝ်ကျာရတအ်ဂှ် ပိုဲဂွံဆဵုကေတ်ရ။ အရာဏံဂှ် နူကဵုဌာနဝန်ဇၞော် သၟာကမၠောန်ညးမၞုံတာလျိုၚ်ဆေၚ်စပ်တအ်ဂှ် ဓမံက်ပတိုန်ကေတ်အရေဝ် စၟဳစၟတ်သၞောတ်စှ်ေစှ်ေတုဲမှ ဒးကၠောန်ရေၚ်တၠုၚ် ညံၚ်ဂွံစိုပ်တရဴ သ္ကာတ်မြဟ်ဏောၚ်ဂှ် အဲမိက်ဂွံပါ်ပါဲရ။
-ပြသၞာသၟာကမၠောန် MOU ကၟိန်ဍုၚ်ဗၟာဆုဲပြံၚ်အဓိကဂှ် ကမၠောန်ဟၟဲဟာ၊ ကမၠောန်ဟွံပြေပြံၚ်ဟာ ဗီုလဵုဒးဆဵုဂဗဒၟံၚ်ရော။
အကာဲအရာပိုဲဆဵုဂဗဒၟံၚ်ဂှ်တှ်ေ အလဵုသမာဓိရုၚ်သၞောဝ်ဓဝ်ဟီုဂးဒၟံၚ်ဂှ် ၜိုန်ရစိုပ်ကၠုၚ်ဒၞာဲ ပါလုပ်ဒၟံၚ်ပ္ဍဲလိက်ကသုက်ဂှ်ကီုလေဝ် ဒၞာဲပါလုပ်ဒၟံၚ် ပ္ဍဲလိက်ကသုက်ဂှ် ဟွံဒှ်ကမၠောန်တုဲတှ်ေ အရာဏံဂှ် အေဂျေန်ဇြဳသာသ္ပအ်ရဏောၚ် ဒးဟီုရ။ ရုၚ်ကမၠောန်ဇကုဒးပလံၚ်ဗစိုပ် အလဵုလဵုဇကုဂှ် မုရုၚ်ကမၠောန်မုရော။ မုကၠောန်ပ္တိတ်ဒၟံၚ်ရော။ နွံဒၟံၚ်ကဆံၚ်ကူသာန်သွံရာန်ဗၞိက် ဍာံဍာံရဟာ။ ကဵုကမၠောန်ကဵုသၟာကမၠောန်တအ် ဍာံဍာံမာန်ဟာဟီုဂှ် လ္ၚတ်ဂၠိုက်ဂၠာဲတုဲမှ ဒးပလံၚ်ဗစိုပ်သၟာကမၠောန်ဏောၚ်။ ဟီုတှ်ေ ဂွံတိုန်လိက်ကော်ကမၠောန်ဗက်ဂှ် ဇကုဂွံသြန်ရဂးတုဲ ပလံၚ်ဏာဏောၚ်တှ်ေ စိုပ်အဏံဂှ် ဒၟာနူကမၠောန်ဟၟဲတုဲ ကုမ္ပဏဳဂှ် ကေတ်တာလလျိုၚ်တုဲ ဗက်ဂၠာဲကဵုဒၟံၚ်ကမၠောန်တၞဟ်ဂှ်လေဝ် ဂွံလဝ်ပရိုၚ်နွံရ။ သရောပ်ထောံတုဲ ပိုဲမိက်ဂွံဟီုအဓိကဂှ်တှ်ေ ဌာနဝန်ဇၞော်သၟာကမၠောန်ၜါလပါ် ပူဂိုလ်မၞုံတာလျိုၚ်မဆေၚ်စပ်တအ်ဂှ် ပ္ဍဲညးတအ် တာလျိုၚ်နွံဒၟံၚ်ပေၚ်ၚ်တုဲတှ်ေ ကၠောန်ပရေၚ်စၟဳစၟတ် အေဂျေန်ဇြဳဆေၚ်စပ်တအ်ဂှ် စၟဳစၟတ်၊ ကေတ်အရေဝ်၊ ဓမံက်ထ္ၜးတုဲ ကၠောန်သ္ပသ္ကာတ်တ်မြဟ်ဟ် ညံၚ်ဂွံစိုပ်တရဴမှ ကိစ္စဏံဂှ် ဂွံကၠေံခၞၚ်အာမာန်ရ။
ဂွံမိၚ်လဝ်လ္ၚဵုဂှ်တှ်ေ ဒဵုကဵုမူစိဂိတု ဃောဂၠာဲကဵုဒၟံၚ်ကမၠောန်ဖိုဟ်ရဟီုဂှ် ဗီုတအ်ဏံ ရိုၚ်လောန်အာရ။ ဗီုဏံဂှ် မိၚ်လေဝ် မိၚ်ဟွံထေက်ရ။ MOU သေံ-ဗၟာတအ်၊ သၟာကမၠောန်ချုက်ကဵုလဝ် လိက်လုပ်သၞောဝ် စိုပ်ကၠုၚ်လပါ်ဏံမှ ဂွံဗက်ဂၠာဲကမၠောန် ဒဵုကဵုမွဲဂိတုလေဝ် ဟွံဂွံကမၠောန်ဏီပုဟ်ဟီုဂှ် ဣဏံ ဒစဵုဒစးဒၟံၚ်ကဵုသဘာဝ MOU ပေၚ်ၚ်တုဲ ညိဓဝ်လေဝ် ဒှ်ဟွံထေက်ပုဟ်ဂှ် အဓိကဍေံအဲမိက်ဂွံဟီုရ။ နူကဵုညးတာလျိုၚ် အလဵုသဳဆေၚ်စပ်တအ်ဂှ် ဒးဓမံက်ပတိုန် အေဂျေန်ဟီုဂးလဝ်ကေတ်ကဵုတာလျိုၚ်ပေၚ်ၚ်တအ်ဂှ် ညံၚ်ဂွံစိုပ်တရဴတုဲ ဒးကေတ်ကဵုအရေဝ်ပေၚ်ၚ်၊ ဒးကဵုဒုဟ်ဒဏ်ဏောၚ်။ ဗီုဂှ်မှ ကိစ္စတအ်ဏံဂွံကၠေံဟောဲအိုတ်အာမာန်ရ။
-ဟိုတ်နူပြသၞာဗီုဏံတုဲ လၟိဟ်သၟာကမၠောန် MOU ဆုဲပြံၚ်တအ်ဂလိုၚ်လဵုဒးဒှ်ဒၟံၚ်အခက်ခုဲနွံဒၟံၚ်ဂလိုၚ်လဵုမာန်ရော။
လၟုဟ်ပြဟ်ဟ်ဏံတှ်ေ သၟာကမၠောန်တအ်လေဝ် ဂကောံရေၚ်တၠုၚ်ကဵုဒၟံၚ် ပရေၚ်သၟာကမၠောန်ဆုဲပြံၚ် ပ္ဍဲဍုၚ်သေံဂှ် နွံဂၠိုၚ်ဒၟံၚ်ရ။ ယဝ်ရဆက်စၠောံကၠုၚ်ကဵုပိုဲ တိုက်ရိုက်တှ်ေ မၞိဟ်တြုံနွံၜိုတ်လဵုရော။ မၞိဟ်ဗြဴၜိုတ်လဵုရော ဂွံကၠောန်ကဵု ချိုတ်တ်ပၠိုတ်တ်မာန်ရ။ ပြဟ်ဟ်လၟုဟ်ဂှ် ပရိုၚ်လ္ၚဵုဂှ်ရ ပိုဲမိၚ်ဒၟံၚ်။ ဆက်စၠောံကၠုၚ်ကဵုပိုဲတိုက်ရိုက်တုဲ ဒၟာနူဟွံဟီုကၠုၚ်ပိုဲရီုဗၚ်ရေၚ်တၠုၚ်ကဵုကိစ္စဏံဂှ်ရ ဂွံမိၚ်ဒၟံၚ်ရမျှာၚ် သိၚ်ၚ်ကြဳကြဳရ။ အဓိပ္ပါယ်ဍေံမိက်ဂွံဟီုဂှ် ပရေၚ်ကေတ်လျိုၚ်၊ ပရေၚ်ဒုၚ်လျိုၚ်ဟၟဲပုဟ် မိက်ဂွံဟီုရ။ အေဂျေန်မွဲဂှ် ဒှ်လဝ်ပြသၞာရ ရမျှာၚ်တိတ်ကၠုၚ်။ အေဂျေန်လဵု ပလံၚ်လဝ်တုဲ ၜိုတ်ဂလိုၚ်လဵုဒှ်ဒၟံၚ်ရဂှ် ရမျှာၚ်တိတ်ဒၟံၚ်။ လၟိဟ်မၞိဟ်ချိုတ်တ်ပၠိုတ်တ် ဟွံဟီုလဝ်တုဲ အေဂျေန်ဟီုဂှ် မၞိဟ်မွဲမွဲတၠဓဝ်ပလံၚ်ဗစိုပ် ဂွံဟွံသေၚ်ပုဟ်။ အောန်အိုတ် နူကဵု ၄၀၊ ၅၀ တုဲ စဵုကဵုဂၞန်ကဵုကၠံ ဒးပလံၚ်ဗစိုပ်ဏောၚ်။ ရမျှာၚ်တိတ်ဒၟံၚ်လၟုဟ်ဂှ်လေဝ် တိတ်ကၠုၚ်ဒၟံၚ်နူကဵုပိ၊ ပန်ဒၞာဲ ရမျှာၚ်တိတ်ကၠုၚ်ဒၟံၚ်ဂှ်ရတှ်ေ ဒှ်ကၠုၚ်ဒၟံၚ် ဂၞန်ကဵုကၠံယျဂှ် ဂွံတီကေတ်ရ။
-အလန်လကြဴအိုတ်ဏံ ပ္ဍဲကဵုပြသၞာ MOU လၟုဟ်ဏံ နူကဵုလပါ်ရုၚ်ကံၚ်ဇြဳပၞာန်တအ်ရော၊ လပါ် NUG တအ်ရော ပရေၚ်ဘိုၚ်ပသောၚ်ကဵုဒၟံၚ်ဗီုပြၚ်လဵု ဂွံညာတ်ကေတ်ရော။
အရာဏံဂှ် ညးတာလျိုၚ်နွံဂၠိုၚ်အိုတ်ဂှ် မၞိဟ်ကေတ်လဝ်အဝဵုကၟိန်ဍုၚ်အခိၚ်တ္ၚဲဏံဂှ် သာတုဲလျိုၚ်နွံဒၟံၚ်ရ။တုဲပၠန် ပ္ဍဲကဵုဍုၚ်သေံလေဝ် ပံက်စွံလဝ်ရုၚ်လုပ်သၞောဝ်တအ် မုတအ်ဏောၚ်လေဝ်။ ဒၟာနူဂှ်ရ သၟာကမၠောန်တအ်ဏံဂှ် အမာတ်ကလုတ်တမာန်တအ် တာလျိုၚ် နွံဒၟံၚ်ရ။ တုဲပၠန်ပ္ဍဲကဵုဍုၚ်သေံလေဝ် ရုၚ်ဂအုပ်အေဂျေန်ဇြဳကဝ်မတဳတအ်ခါန်ကၞက်စွံလဝ် ဗွဲမလုပ်သၞောဝ်ဂးတုဲ ပ္တိုန်လဝ်စၟတ်သမ္တီတုဲ ပံက်စွံလဝ်ရ။ ဟိုတ်ဂှ်ရ ညးနွံတာလျိုၚ်ဂှ် ဒှ်ဍေံတအ်ရ။ NUG ဂှ်တှ်ေ ဟိုတ်နူညးဍုၚ်ကွာန်တအ်နွံပၟိက် မိက်ဒၟံၚ်ပ္ဍဲကာလအကြာဏံတုဲ ဒှ်အလဵုအသဳညးဍုၚ်ကွာန်တအ် ဒက်ပ္တန်လဝ်တုဲ မံက်တိုန်လဝ်ရ။ ညးတအ်လေဝ်ဂိုတ်ဂစာန်ဒၟံၚ်ဂှ် ပိုဲဂွံညာတ်ကေတ်ဒၟံၚ် ပ္ဍဲကဵုပရိုၚ်တအ်ရ။
ညးတအ်လေဝ် ပလံၚ်ဗစိုပ်လဝ်လိက်ကဵု ကၠတ်ထဝ်ဆေၚ်စပ်တအ်၊ ဌာနဝန်ဇၞော်သၟာကမၠောန် ဌာက္ဍိုက်က္ဍိုပ်သၟာကမၠောန်တအ်တုဲ ကဵုလဝ်ကသပ်တုဲ သွက်ဂွံရေၚ်တၠုၚ်ကဵု ညံၚ်ဂွံခိုဟ် ပ္တိတ်ဒၟံၚ်ဇြဟတ်ရဂှ် ဂွံတီကေတ်ရ။ ၜိုန်ဂှ်လေဝ် ညးတာလျိုၚ်နွံဂၠိုၚ်အိုတ်ဂှ် ရုၚ်အေဂျေန် နွံပ္ဍဲဍုၚ်က္ၜၚ်ကံက်ကီု၊ ရုပ်ကလုတ်တမာန်သၟာကမၠောန်ဍုၚ်ဗၟာကီု စလာဘ်ဗ္ဇဴစရိုတ်လီုတုဲ အေဂျေန်ပံၚ်ကေတ်ညးသ္ကအ်တုဲ သၟာကမၠောန်ပလံၚ်ဗစိုပ်နၚ်တအ်ဂှ် အခက်ခုဲတအ်ဂှ် ဒးကေတ်တာလျိုၚ်ခဒိၚ်ပေၚ်၊ ဒကေဝ်ပေၚ်ဏောၚ်။