သာန်တောၚ်၊ ဖေဖဝ်ဝါရဳ(၂၂)
ပ္ဍဲဍုၚ်သာန်တောၚ် (၁၃) မိုၚ် ကေုာံဍုၚ်လုက်တိုဝ် မၞုံပ္ဍဲတိဍာ်ဒပ်မဟာ(၂) ဗော်သွးကောန်ဂကူကရေၚ် KNU ဂှ် ပ္ဍဲဂိတုဖေဖဝ်ဝါရဳ စၟတ်တ္ၚဲ (၂၂) အခိၚ်နူဂယးဂှ် ဟိုတ်နူဒပ်ကံၚ်ဇြဳပၞာန် ပန်ပှော်လဝ်ကီု သီုကဵုစံၚ်ပလီုလဝ်တုဲ ကောန်အရာပ်ၜါတၠ ပါလုပ် သီုကောန်ၚာ် (၁)တၠ ဂွံလဝ်ဘဲဝပ်သ္ကာတ်မြဟ်တုဲ ဘာကျာ်ခရေတ်ယာန် ကေုာံစမြိုၚ်သ္ၚိဒၟံၚ်၊ ကွဳစက်၊ ကွဳလိုန်ဓာတ်တအ် ဒးဇီုကပိုက်လီုလာ်လဝ်ရဂှ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲဂိတုဖေဖဝ်ဝါရဳ စၟတ်တ္ၚဲ(၂၁) အခိၚ်နူဂယးဂှ် ဗ္ဒပ်ဗၠာဲသၟိၚ်ကံၚ်ဇြဳပၞာန် မၞုံပ္ဍဲဍုၚ်လုက်တိုဝ် တွဵုရးကရေၚ် တိဍာ်ဒပ်မဟာ (၂) ခရိုၚ်တံၚ်ၚူ KNU ဂှ် ဒပ်ပံၚ်ကောံ KNLA လုပ်စိုပ်ပန်ပှော်လဝ်တုဲဂှ် နူလပါ်ကံၚ်ဇြဳပၞာန် ပန်ဖျေံနၚ်လွဟ်ဇၞော် ပ္ဍဲဍုၚ်လုက်တိုဝ်ကြာန်ကြာန်ရ။
ဟိုတ်နူပရေၚ်ပန်ပှော်ဏံတုဲ ဘာတိုန်ဝတ်ကျာ်ခရေတ်ယာန် (၁)ဘာ ကေုာံသ္ၚိဒၟံၚ်လတူ(၁၀)မ ဒးဇီုကပိုက်လီုလာ်အာလဝ်တုဲ ကောန်ၚာ်သၟတ် (၁) တၠ ကေုာံမၞိဟ်တြုံအာယုက် (၂၀) သၞာံ(၁) တၠတအ်လေဝ် ဂွံလဝ်ဘဲဝပ်သ္ကာတ်မြဟ်ရဂှ် သ္ဂးလဝ်ရ။
ကြဴနူပရေၚ်ပန်ပှော်ဒှ်တုဲဂှ် ကံၚ်ဇြဳပၞာန် တိုန်မွဲသ္ၚိ စှ်ေမွဲသ္ၚိ ပ္ဍဲဍုၚ်လုက်တိုဝ်တုဲ ကၠောန်သ္ပဒၟံၚ် ပရေၚ်ဂၠိုက်ဂၠာဲစၟဳစၟတ်ရဂှ် ဂွံတီကေတ်ရ။
သ္အာၚ်နူဂှ်ပၠန် ပ္ဍဲဂိတုဖေဖဝ်ဝါရဳ စၟတ်တ္ၚဲ (၂၂) အခိၚ်နူဂယးဂှ်လေဝ် ကြဴနူရမျှာၚ်ပန်ပှော် ပ္ဍဲဍုၚ်သာန်တောၚ် (၁၃) မိုၚ်ဗြုတိုန်တုဲဂှ် ဒပ်ကံၚ်ဇြဳပၞာန် လုပ်စိုပ်စံၚ်လဝ် ပ္ဍဲအရာပ်(၅)တြေံ ကေုာံအရာပ်(၁)တအ်ဂှ်ရ သ္ၚိဒၟံၚ် (၅)မ၊ ကွဳစက် (၁)ဖ္ဍိုက်၊ ကွဳလိုန်ဓာတ် (၂)ဖ္ဍိုက် ဒးတူပၟတ် လီုလာ်အာလဝ်ရဂှ် ညးဒေသတအ် ဟီုသ္ဂးလဝ်ရ။
ပ္ဍဲဍုၚ်သာန်တောၚ် (၁၃) မိုၚ်ဂှ် ပ္ဍဲဂိတုဂျာန္နဝါရဳ သ္ကုတ်လကြဴတုဲကၠုၚ်ဏံဂှ်လေဝ် ဟိုတ်နူဒပ်ကံၚ်ဇြဳပၞာန် ပန်ဖျေံလွဟ်ဇၞော် လွဟ်ဍောတ်ကြာန်န်၊ စံၚ်ပလီုလဝ်သ္ၚိဒၟံၚ်တအ်တုဲ ဘာကျာ်ခရေတ်ယာန် ကေုာံသ္ၚိဒၟံၚ်ဂၠိုၚ်ဂၠေၚ် ဒးတူပၟတ်လီုလာ်အာလဝ်နွံတုဲ ညးဒေသ ဗွဲမဂၠိုၚ်တအ်လေဝ် ဒးဂြိပ်ဒဴပါဲဓလေတ်ဒၟံၚ် ပ္ဍဲဒၞာဲဌာန်ဗၠးဘဲရ။
ပ္ဍဲဍုၚ်လုက်တိုဝ်လေဝ် ပ္ဍဲသၞာံတုဲကၠုၚ်တေံ အကြာဒပ်ပံၚ်ကောံ KNLA ကဵု ကံၚ်ဇြဳပၞာန်တအ် ဒှ်ပန်ပှော်လဝ် ပ္ဍဲလပါ်ကွာန်မိုၚ်လောန်တုဲ ဒပ်ကံၚ်ဇြဳပၞာန် ကလေၚ်ပန်ပှော်လဝ်လွဟ်ဇၞော် ပ္ဍဲလပါ်ကွာန်တအ်ရဂှ် ညးဒေသဂမၠိုၚ် ဟီုသ္ဂးလဝ်ရ။
အတိုၚ်တၚ်လလောၚ်တြး ဗော်သွးကောန်ဂကူကရေၚ် KNU လလောၚ်တြးလဝ်မ္ဂး ပ္ဍဲကဵုတိဍာ်ဒပ်မဟာ(၂) ခရိုၚ်တံၚ်ၚူ တိဍာ်ကဝ်ဒူလေဝ်ထိၚ်ဒဝ်ဂှ် ပ္ဍဲဂိတုဂျာန္နဝါရဳ စၟတ်တ္ၚဲ (၂၇)တုဲကၠုၚ်တေံ ဒပ်ကံၚ်ဇြဳပၞာန် ခမရ (၆၀၄) လုပ်စိုပ်ဂၟာဲဂၠာဲလဝ် သ္ၚိဒၟံၚ်ညးဍုၚ်ကွာန်တအ် (၂)မတုဲ ပလီုပလာ်ဏာလဝ်ရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်(မ်)