က္ၜၚ်ကံက်-ဖေဖဝ်ဝါရဳ (၂၂)
မွဲကရောံပရေၚ်ပၞာန်သီအဝဵု သၞာံ ၂၀၂၁ ဂှ် ဒပ်ကံၚ်ဇြဳပၞာန် မသီလဝ်အဝဵု ကုအလဵုအသဳဒဝ်အံၚ်သာန်သုကျဳ မဂွံဒုၚ်ရုဲစှ်လဝ်ဂှ်တုဲ မဗဂဵုလဝ်ပၟတ်ဒေါသ စပ်ကဵုဂၠးတိဂှ် ဥရဝ်ပသမဂ္ဂ ဖျေံစၟတ်လဝ် ပရေၚ်ကၟာတ်လဒဵုကေတ်ဒုဟ် မရနုက်ကဵုတြဴဝါရ။
ပ္ဍဲကဵုပရေၚ်ကၟာတ်လဒဵုကေတ်ဒုဟ် မပ္တိတ်လဝ်တၟိတံဂှ် မၞိဟ်ပူဂဵု (၉) တၠကဵု ဂကောံဗော်သွး (၇) ဂကောံ ပါလုပ်တုဲ ပ္ဍဲကဵုဏံဂှ် သီုကဵုပါလုပ် ဝန်ဇၞော်ဇြဟတ်ဓာတ်၊ သၟာပရေၚ်ပိုန်ဒြပ်ဒယှ်ယှ်ဂမၠိုၚ်၊ သၞာဲဒဴကဆံၚ်သၠုၚ်ဂမၠိုၚ်၊ ရုၚ်ဌာနဝန်ဇၞော်ကာစဵုဒၞါတံ ကေုာံ ကမ္ပဏဳပုဂ္ဂလိက မထံက်ပၚ်ဒၟံၚ်သြန်သၠုဲ၊ လွဟ်လက်နက် ကေုာံ ကၠေၚ်ဓာတ် ကုဒပ်ပၞာန်ဗၟာတံ ပါလုပ်ရ။
ပ္ဍဲကဵုပရေၚ်ကၟာတ်လဒဵုကေတ်ဒုဟ် နူကဵုဥရဝ်ပသမဂ္ဂ မဖျေံစၟတ်လဝ် ကုကၟိန်ဍုၚ်ဗၟာ ဒဵုကဵုအခိၚ်လၟုဟ်ဂှ် မၞိဟ်ပူဂဵု (၉၃) တၠကဵု ဂကောံ (၈) ဂကောံ နွံကၠုၚ်လဝ်ယျ မဒှ်ရ။
ကၟိန်ဍုၚ်ဗၟာဝွံ စနူအခိၚ်ပၞာန်သီအဝဵုက္တဵုဒှ်တုဲ စဵုကဵုဂကောံပၠန်ဂတးအိုဿီု က္တဵုဒှ်ဆီပါ်ဍာ်ဇွောဝ် နူကဵုမပါ်ထ္ကးလဝ်ဂှ် ရေၚ်တၠုၚ်ကၠုၚ်လဝ် ပၞာန်တဝ်စၞေဟ် ကုဒပ်ပၞာန်ဗၟာရ။ ဟိုတ်ဂှ်ရ ကၟိန်ဍုၚ်ဝွံလေဝ် က္တဵုဒှ်ဒၟံၚ်ကလိုက်ကၟဵုတုဲ ဍုၚ်ပလိုတ်တံလေဝ် ကၠောန်သ္ပကၠုၚ်လဝ် ပွမကၟာတ်လဒဵုကေတ်ဒုဟ်တံရ။
ဟိုတ်နူဒုဟ်ဒဏ် စပ်ကဵုဂစိုတ်ကမၠက်ဂကူမၞိဟ် ကေုာံ အမှုရာဇဝတ်ပၞာန် ဒပ်ပၞာန်ဗၟာဂှ်တုဲ လၟိဟ်မၞိဟ် ဗၞတ် (၁ ဒဿမ ၂) ပြကောဋိကိုဋ်ဝွံ အပ္ဍဲကဵုဍုၚ်ဂှ် ဒးဆုဲပြံၚ်လဝ်ဒၞါဲတံတုဲ၊ အပံၚ်မၞိဟ် (၇) ဠက်ပြၚ်ဝွံလေဝ် ဒးစ္ဍးတိတ်အာလဝ် နူကဵုဍုၚ်ဂှ် ထ္မံက်ထ္ၜးလဝ် ပ္ဍဲကဵုလိက်ဒုၚ်စဳရေၚ် UNHCR ပ္ဍဲဂိတုမာတ် သၞာံတုဲတေံရ။
ဒပ်ပၞာန်ဗၟာ မဟီုဂးလဝ် ဒဒှ်ရဒစဵုဒစး ကုပွပကီုပရာဂမၠိုၚ်ဂှ်ဝွံ ညးတံဝွံ သွက်ဂွံရေၚ်တၠုၚ် ညံၚ်သ္ဂောံဂွံပရေၚ်ဂီုကၠီု ကေုာံ ပရေၚ်ၜိုဟ်လလမ်ဂှ် တာလျိုၚ်နွံရောၚ် သ္ဂးရ။ ဟိုတ်ဂှ်ရ သောၚ်ကလးလဝ် ပွပကီုပရာပ်ဂမၠိုၚ် နကဵုသၞောဝ်ဥပဒေရောၚ်ဂှ် ခၠေဝ်ပလန်လဝ်ရ။
စနူကဵုသၞာံ ၂၀၂၁ ဂိတုမာတ်တုဲဂှ် ဥရဝ်ပသမဂ္ဂဝွံ ဒေါအ်ဒေၚ်ထောံလဝ် ပရေၚ်ကဵုသြန်ထံက်ပၚ် သွက်ကိုန်စဳမာန် ကမၠောန်ပရေၚ်ဖောအ်ဗြေဝ် အပ္ဍဲဍုၚ်ဗၟာတံဂှ်မဒှ်ရ။
Ref: Bangkok Post