လ္ဂုၚ်၊ ဖေဖဝ်ဝါရဳ (၂၃)
ၚုဟ်ထဝ်မခုတ်လဝ်ဂှ်ဝွံ အပ္ဍဲဗွဝ်ဖျာဂှ် ဟိုတ်နူဟွံဒှ်ကလောန်ဂှ်ရ သွက်ဂွံသွံတြးကဵု အတိုၚ်ၚုဟ်လၟုဟ် မစၟတ်လဝ်တံဂှ် ဂကောံတၠကမၠောန်ထဝ် ရးလ္ဂုၚ်တံ လလောၚ်ပ္တိတ်လဝ် လိက်အာတ်မိက် ကုသၟာဗၞိက်ထဝ်တံကဵု ဆေၚ်ထဝ်တံ နကဵုစၟတ်တ္ၚဲ ဂိတုဖေဖဝ်ဝါရဳ (၂၃) ရ။
အတိုၚ်တၚ်စၞောန် ကမ္မတဳကမၠောန်ကောပ်ကာဲ၊ ထိၚ်ဒက်မၚ်မွဲဗွဝ်ဖျာ ထဝ် ကေုာံ သြန်သၠုဲဂှ်မ္ဂး သီုကဵုပါလုပ်ဆေၚ်ထဝ်တံ သၟာဗၞိက်ထဝ်တံအိုဿီု သွက်ဂွံသွံတြး ထဝ်ဒကောၚ်(မဳဠေန်) မွဲဒ္ကေဝ် နကဵုၚုဟ် (၂,၇၉၀,၀၀၀) ဒ္ကေဝ် မွဲဒမြိပ်ဓဝ်ဂှ် လလောၚ်ပ္တိတ်လဝ်ရ။
ၚုဟ်ထဝ်ဝွံ ပ္ဍဲဂိတုဖေဖဝ်ဝါရဳ (၂၃) အခိၚ်ပယျာံဂယးဂှ် ထဝ်ဒကောၚ်(မဳဠေန်) မွဲဒ္ကေဝ်ဂှ် ပံက်လဝ်ၚုဟ် နကဵုပွဳပွူ (၂,၈၅၀,၀၀၀) တုဲ ပ္ဍဲကဵုၚုဟ် ဂကောံတၠကမၠောန်ထဝ်ရးလ္ဂုၚ်တံ မခုတ်ပ္တန်လဝ်ဂှ် နွံဒၟံၚ် ပွဳပွူ (၂,၁၆၀,၀၀၀) ဒ္ကေဝ်ဓဝ်ဂှ်ရ ကွာဒၟံၚ် ဗ္ဒါဲ (၇) ကိုဋ်ဒ္ကေဝ်ပြၚ်ရ။
ၚုဟ်ထဝ် ဂကောံတၠကမၠောန်ထဝ်ရးလ္ဂုၚ်တံ မခုတ်လဝ်ဂှ်ဝွံ ဒၟါနူကွာဒၟံၚ်ကဵု ၚုဟ်သွံမ္ၚးဏံ တၟာဂလိုၚ်ဂှ်တုဲ ထဝ်ဂမၠိုၚ် တိတ်အာဍုၚ်မ္ၚးတံမာန်ဂှ်ရ ကၠောန်ၜိုတ်လဝ်သာ်ဏံ ဒှ်မာန်ဂှ် တၠကမၠောန်ထဝ်မွဲတၠ သ္ၚဳဂၠိပ်လဝ်ရ။
“ၚုဟ်စၞောန်ဍေံတံကဵု ၚုဟ်မ္ၚးဏံဂှ် ကွာဒၟံၚ်တၟာဂလိုၚ်ဏောၚ်။ ၚုဟ်စၞောန်ဍေံတံဟီုဂှ်တှ်ေ ထဝ်နူကဵုဇကုတံဂှ် ကလေၚ်တိတ်အာ ဍုၚ်သ္အာၚ်တံအိုတ်ဏောၚ်ဂှ်ရ ၚုဟ်စၞောန်ဍေံတံဂှ် ဟွံသေၚ်ဏီပုဟ်။ ၚုဟ်ထဝ်ဂၠးတိလၟုဟ်ဂှ် စှ်ေဒၟံၚ်အဆက်က်ရ။ အေဂှ်တှ်ေ ၚုဟ်ထဝ်ဂၠးတိဂှ် တော်သရောပ်ထောံတုဲ ကဵုကၠောန်နကဵုၚုဟ်ဏံဏောၚ်ဂှ် ထေၚ်ကေတ်ရ။ ၚုဟ်ထဝ်ဂှ် ဍာံဍာံတေံ ဒးစှ်ေ နူကဵုလောန်ကၠုၚ် (၅) တ္ၚဲတေံရဏောၚ်၊ ဟွံစှ်ေမွဲသာ် တၠကမၠောန်တံ သၠုၚ်လဝ်ရ၊ ညံၚ်ဂွံတဝ်ဒၟံၚ်ကဵု ၚုဟ်သၠုၚ်ၚ်ဂှ် ကၠောန်လဝ်ဏောၚ် ဣၝဲ ထေၚ်ကေတ်ရ။ လၟုဟ် YGEA လလောၚ်ပ္တိတ်ထောံယျဟီုတှ်ေ တ္ၚဲဏံဂှ် သီုညးဖအိုတ် ဒးကၠောန်သ္ပသွံရာန် နကဵုၚုဟ် (၂,၇၉၀,၀၀၀) ဂှ်ရ။ ဍာံဍာံဂှ်တှ်ေ ၚုဟ်ထဝ်ဂၠးတိစှ်ေတှ်ေ ၚုဟ်ထဝ်ဍုၚ်ဗၟာဂှ် ဒးစှ်ေကီုဏောၚ်။ ဍေံတံဂှ် ဟွံစှ်ေမွဲသာ် တံၚ်ပ္တိုန်လဝ်ဟီုတှ်ေလေဝ်။ အခါဂှ်တှ်ေ သၠုၚ်ဒၟံၚ်ကွေံကွေံ၊ အေဇှ် (၂,၇၉၀,၀၀၀၀) ဟီုဂှ် သၠုၚ်ဒၟံၚ်ဏီရ” သာ်ဝွံ သ္ဂးရ။
သ္အာၚ်နူဂှ်ပၠန် အတိုၚ်ၚုဟ် ဂကောံတၠကမၠောန်ထဝ် ရးလ္ဂုၚ်တံ မအာတ်မိက်လဝ်ဂှ် သွံရာန်ဒၟံၚ် အပ္ဍဲဗွဝ်ဖျာတံ နွံဟွံမွဲဂှ် နွံပၟိက် ဒးမၚ်ကျောဝ်ချိုတ်တ်ပၠိုတ်တ်တုဲ ယဝ်ရဟွံမၚ်ကျောဝ်မ္ဂး နကဵုဆေၚ်ထဝ်လ္ၚဵုတံ ပံက်ဗံက်ချာ (၂) ရဲတုဲ ကၠောန်စကၠုၚ်မာန်ဂှ် သ္ဂးရ။
ဟိုတ်နူခုတ်ထောံ ၚုဟ်ထဝ်တံ အတိုၚ်ၚုဟ်ဂွံလၟုဟ်တံဂှ်ရ အပ္ဍဲဗွဝ်ဖျာဂှ် အပြံၚ်အလှာဲက္တဵုဒှ်ဒၟံၚ်တုဲ နကဵုညးရာန်ပကောံထဝ်တံ ဆၜိုတ်မၚ်ကျောဝ်သၟးရတုဲ ဒဒှ်မရာန်ပါန်ဂှ် ဟွံမွဲစဏီကွေံကွေံတုဲ ပရေၚ်သွံရာန် ညိၚ်ဒၟံၚ်ရောၚ်ဂှ် ဂွံတီကေတ်ရ။
ကံၚ်ဇြဳပၞာန်ဂှ် သွက်ၚုဟ်ထဝ်ဂွံစှ်ေဂးတုဲ ပ္ဍဲကဵုပွိုၚ်ဍုၚ်လ္ၚဵုတံဂှ် သွံကဵုဒၟံၚ် ထဝ်တၚ်္ကာဂတှ်ေဂတှ်ေတံ မွဲဒကေဝ်၊ ၜါမး ကေုာံ မွဲမး (၃) ဂကူကီုလေဝ် ဒၟါနူသွံတြးဒၟံၚ် အတိုၚ်ၚုဟ်မ္ၚးဏံဂှ်ရ ဒဵုကဵုအခိၚ်လၟုဟ် ၜိုတ်ထေၚ်လဝ်ဂှ် ၚုဟ်ထဝ်ဟွံစှ်ေလဝ်ဏီရ။
ၚုဟ်ထဝ်အပ္ဍဲဍုၚ်ဝွံ ပ္ဍဲသၞာံတုဲကၠုၚ်တေံ ဂိတုအဝ်ဂါတ် သတ္တာဟလက္ကရဴအိုတ်ဂှ် သီုကဵုၚုဟ်ဒဝ်ဠာ သၠုၚ်တိုန်ကၠုၚ် ဂၠိုၚ်ကဵုဆဂှ် ထဝ်ဒကောၚ်(မဳဠေန်) မွဲဒ္ကေဝ်ဂှ် သၠုၚ်တိုန်ကၠုၚ်လဝ် စဵုကဵု (၃၅) ကိုဋ်ဒ္ကေဝ်ရ။
ၚုဟ်ထဝ်ဝွံ ပ္ဍဲလက်ထက်အလဵုအသဳ NLD တေံ ထဝ်ဒကောၚ် (မဳဠေန်) မွဲဒကေဝ် နူကဵုၚုဟ်မၞုံ ပွဳပွူ (၁၃) ကိုဋ်ဒ္ကေဝ်ဓဝ်ဂှ် ကြဴနူဒပ်ပၞာန်သီအဝဵုတုဲ ၚုဟ်ထဝ် သၠုၚ်တိုန်ကၠုၚ်လဝ် စဵုကဵုဗ္ဒါဲ (၃) ဆတုဲ ၚုဟ်ဟွံညိၚ်ဝတ်တံလေဝ် က္တဵုဒှ်ဒၟံၚ် မွဲဏှမွဲဏှရ။
ပရိုၚ်−သြၚ်လောန်တိုၚ်(မ်)