သဵု(လ်) ၊ ဖေဖဝ်ဝါရဳ (၂၃)
နကဵုဍုၚ်ကြုက် ကြဴနူကလေၚ်ဖအောန်ဖျေံ စေဝ်ပၞောန် မဖျေံစၟတ်လဝ် သွက်ကဝ်ဝေဒ်တံတုဲဂှ် စနူဂိတုကၠုၚ်စိုပ်ဏံတုဲ ဟွံဒးစၟဳစၟတ်ကဝ်ဝေဒ်စှ်ဒ္စိတ် ကုရဲအာတရဴ ဝဳဇြာဍုၚ်ကြုက်တံရဂှ် သၞာဲဒဴကဆံၚ်လ္တူကိုဝ်ရဳယျာသၠုၚ်ကျာမွဲတၠ ဟီုဂးလဝ် ပ္ဍဲဂိတုဖေဖဝ်ဝါရဳ (၂၂) တေံရ။
ကြဴနူဗေကျေန် သ္ဂုတ်သွာတ် သွက်ဂွံရုပ်သီ မူဝါဒကဝ်ဝေဒ် မတေၚ်ဂြတ်ဂှ်တုဲ ကိုဝ်ရဳယျာသၠုၚ်ကျာဝွံ ၜိုန်ရဖျေံစၟတ်လဝ် အစဳဇန်တွဵုဒၞက် လ္တူရဲအာတရဴနူဍုၚ်ကြုက်တံကီုလေဝ် ကေတ်သာဓက အကာဲအရာကဝ်ဝေဒ်စှ်ဒ္စိတ် မတောတက်ခိုဟ်ကၠုၚ် ပ္ဍဲကဵုဍုၚ်ဇိုၚ်ဝုတ်ဒိုဟ် လ္ၚဵုတံဂှ်တုဲ ဖအောန်ဖျေံကဵုလဝ်ဂှ် သ္ဂးရ။
လၟိဟ်ညးမစၟဳစၟတ်ဂွံဆဵုလဝ်ကဝ်ဝေဒ် အကြာမၞိဟ်မစိုပ်ကၠုၚ် နူကဵုဍုၚ်ကြုက်တံဂှ် ပ္ဍဲဂိတုဂျာန္နဝါရဳ သတ္တာဟပထမ နူကဵု (၁၈ ဒဿမ ၄) တၟံကၠံဂှ် ပ္ဍဲဂိတုဖေဖဝ်ဝါရဳ သတ္တာဟတတိယဂှ် စှ်ေအာလဝ် စဵုကဵု (၀ ဒဿမ ၆) တၟံကၠံဂှ်ရ ထပ်ဖအောန်ဖျေံ အစဳဇန်မပါ်လဝ်တၞဟ်တြာတံ နွံကၠုၚ်မာန်ဂှ် ဒုဝန်ဇၞော် ကေန်သံၚ်ဟဵု ဟီုဂးလဝ် ပ္ဍဲကဵုကောံဓရီု စပ်ကဵုသ္ဂောံခၠေဝ်ပလန် ယဲကပ်ကဝ်ဝေဒ်−၁၉ မကၠောန်သ္ပလဝ် ပ္ဍဲဌာနဝန်ဇၞော်ပရေၚ်ဗၠးဘဲအန္တရာယ် ကေုာံ ကာအပ္ဍဲဍုၚ်ဂှ်ရ။
စမ်ၜတ် PCR ဟွံဒေါအ်ဟွံဂွံ သွက်ရဲအာတရဴကြုက်တံ ကၠာဟွံဂွံတိတ်ဂှ် ဆက်ကၠောန်အာ စဵုကဵုဂိတုမာတ်ချ် (၁၀) တေံဏောၚ်တုဲ ဒၟါနူကဵုဖအောန်ဖျေံလဝ်စေဝ်ပၞောန်ကဝ်ဝေဒ်−၁၉ တၞဟ်သ္အာၚ်တံဂှ်ရ သွက်ဂွံမၚ်ကျောဝ်ခါတ်အကာဲ ကုဖဵုဍေံဂှ် ကေန် ဟီုဂးလဝ်ရ။
ကိုဝ်ရဳယျာသၠုၚ်ကျာဂှ် သ္ကုတ်ပြဟ်ဟ်တေံ သွက်ရဲအာတရဴကြုက်တံဂှ် ကလေၚ်ပ္တိတ်ကဵုလဝ် ဝဳဇြာကာလဂၠေံတံတုဲ ကြဴနူဂှ် နဒဒှ်ကလေၚ်တဲ ကုတၚ်သၞောတ်ဗ္ၜတ် တွဵုဒၞက်သဵုလ်ဂှ်တုဲ တၚ်သၞောတ်ဗ္ၜတ်ဝဳဇြာ လအာတုပ် မဖျေံစၟတ်လဝ်ဂှ် ဗေကျေန် ရုပ်သီလဝ်ကီုရ။
Ref: CNA