ကအ်သံၚ်၊ ဖေဖဝ်ဝါရဳ (၂၃)
အပ္ဍဲပေါဲဗ္တိုက် မက္တဵုဒှ်လဝ် ပ္ဍဲဂိတုဖေဖဝ်ဝါရဳ (၂၁) ပ္ဍဲကွာန်ဝိုၚ်ဒေန်၊ ပွိုၚ်ဍုၚ်ကအ်သံၚ်၊ ရးဒေသဇၞော်တၞၚ်သဳဂှ် ၜါလ္ပာ်ဇီုကပိုက်ချိုတ်ဂျိုၚ်တံ နွံဒၟံၚ်ဂှ် ဂကောံဒပ်စဵုဒၞါညးဍုၚ်ကွာန် ပွိုၚ်ဍုၚ်ကအ်သံၚ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကွာန်ဝိုၚ်ဒေန် ဒပ် KTLA ကဵု ဂကောံဒပ်စဵုဒၞါညးဍုၚ်ကွာန်ဒေသတံ မအုပ်ဓလီုလဝ်ဂှ် ဒပ်ကံၚ်ဇြဳပၞာန် ဟိုတ်နူထ္ပက်ကၠုၚ်ကရောၚ်ပၞာန် နကဵုဇြဟတ်ဒပ် (၂၀၀) ပြၚ်ဂှ်ရ ပေါဲဗ္တိုက်ၜါလ္ပာ် က္တဵုဒှ်လဝ် လလအ်ပွိုၚ် ဗ္ဒါဲ (၄) နာဍဳပြၚ်ရ။
အပ္ဍဲပေါဲဗ္တိုက်ၜါလ္ပာ်ဂှ် ကောန်ဒပ်ကံၚ်ဇြဳပၞာန် ဗ္ဒါဲ (၁၀) တၠ ဇီုကပိုက်ချိုတ်မာန်တုဲ လ္ပာ်ဂကောံဒပ်စဵုဒၞါညးဍုၚ်ကွာန်ဂှ် ကောန်သ္ဂံၚ် PDF (၂) တၠ ကလိဂွံလဝ်ဝပ် ဟွံဒးဂွိၚ်ရ။
ဟိုတ်နူပေါဲဗ္တိုက်ဂှ်တုဲ ကောန်ကွာန်ဝိုၚ်ဒေန် (၂၀၀) ပြၚ်ဝွံ ဒးဂြိပ်ဒဴပါဲဒလေတ်အာလဝ် အပ္ဍဲဍုၚ်သေံတုဲ ညးဒေသလ္ၚဵုတံလေဝ် ဒးအောပ်မာမံၚ်တန်တဴဒၟံၚ် အကြာဒဵုဂြိုပ်တံအိုတ်ဂှ် ဂွံတီကေတ်ရ။
ဒပ်ကံၚ်ဇြဳပၞာန် မလုပ်စိုပ်ထ္ပက်ကၠုၚ်ကရောၚ်ပၞာန်ဂှ်ဝွံ ဟိုတ်နူဆက်ဖျေံလဝ်ဒပ် အပ္ဍဲကွာန်ဝိုၚ်ဒေန်ဂှ်ရ ပရေၚ်ပၞာန်ၜါလ္ပာ် ကြံၚ်မ္ၚိုဟ်ဒၟံၚ်တုဲ နွံဒၟံၚ် ပ္ဍဲအကာဲအရာ ပေါဲဗ္တိုက်တံ မသာသ္ကာတ်မြဟ်ကၠုၚ်ရ။
ပ္ဍဲကဵုပွိုၚ်ဍုၚ်ကအ်သံၚ်၊ ထဝါဲ၊ တၞၚ်သဳ ကေုာံ ပွိုၚ်ဍုၚ်ပဠဝ် မဒှ်ပွိုၚ်ဍုၚ်ဂမၠိုၚ် ရးဒေသဇၞော်တၞၚ်သဳဂှ် စနူဂိတုဖေဖဝ်ဝါရဳ သတ္တာဟဒုတိယတုဲ ဟိုတ်နူဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် နကဵုဇြဟတ်လၟိဟ်ဗွဲမဂၠိုၚ်ဂၠေၚ်ဂှ်ရ ပေါဲဗ္တိုက်တံ ဆက်က္တဵုဒှ်ဒၟံၚ်ရ။
ပရိုၚ်−သြၚ်လောန်တိုၚ်(မ်)