“ပရေၚ်ဇီုကပိုက်ဒး သွာၚ်စိုတ်ဓာတ် နွံဒၟံၚ်ဗွဲမဂၠိုၚ်ရ။ ကောန်ၚာ်တအ်လေဝ် အခိၚ်လဵုလွဟ်ဇၞော်စှ်ေရော။ အခိၚ်လဵု ကလေၚ်ကၠုၚ်ပန်ပၠန်ရောဂှ် ညးဂှ်ဟွံတီဟွံတီပုဟ် ဒးမံၚ်ဒၟံၚ်ကဵုသတိ အရိုဟ်ဟ်တ္ၚဲရ”

တၚ်ဆက်စၠောံသၟာန်သွဟ်လဝ်ကဵု ညးအုပ်ကာဌာနပရေၚ်ပညာ ကေုာံပရေၚ်ယေန်သၞာၚ်ကရေၚ် KECD ပဒိုဝ်သဝ်လောအေဝ်မူ။

ပ္ဍဲတိဍာ်ဗော်သွးကောန်ဂကူကရေၚ် KNU ဟိုတ်နူဒပ်ကံၚ်ဇြဳပၞာန်ပ န်ပှော်လဝ် နကဵုက္ၜၚ်ကျာ ကေုာံလွဟ်ဇၞော်တုဲ ပ္ဍဲသၞာံဗ္တောန်ပညာသၞာံဏံ ဘာဗ္တောန်လိက် (၁၂)ဘာ ဇီုကပိုက်လီုလာ်လဝ်ကီု ကွးဘာတြုံဗြဴအ္စာ အ္စာၝောံတအ် ဇီုကပိုက်ဒးလဝ်ဘဲဝပ် နွံကၠုၚ်ရ။ ဟိုတ်ဂှ်ရ ပ္ဍဲကဵုတိဍာ်ထိၚ်ဒဝ် KNU ပ္ဍဲလတူအကာဲအရာ ဘာဗ္တောန်လိက် ဒးဒုၚ်ဗတိုက်ကီု၊ အခက်ခုဲဒးဆေၚ်ဒၟံၚ်မုက် အခိၚ်လၟုဟ်ဏံကီု၊ ပ္ဍဲလတူကံၚ်ဇြဳပၞာန် ပတဝ်လဝ်ကဵု ဘာဗ္တောန်လိက်တုဲ ဗတိုက်ဒၟံၚ်ဂှ် ဗီုလဵုကလေၚ်ပလန်လဝ်တဲရော။

စပ်ကဵုအကာဲအရာဏံတုဲ ဆက်စၠောံသၟာန်သွဟ်လဝ်ကဵု ညးအုပ်ကာဌာနပရေၚ်ပညာ ကေုာံပရေၚ်ယေန်သၞာၚ်ကရေၚ် KECD ပဒိုဝ်သဝ်လောအေဝ်မူရ။

-ပ္ဍဲတ္ၚဲတုဲကၠုၚ် မွဲၜါတ္ၚဲဏံ ဒပ်ကံၚ်ဇြဳပၞာန် ဂြာတ်လဝ်ဗုမ် ပ္ဍဲဘာပန်ရ။ ဘာဗ္တောန်လိက် ဇီုကပိုက်ဒးလဝ် နွံဒၟံၚ်သေၚ်ဟာ။ ပ္ဍဲသၞာံဗ္တောန်ပညာ သၞာံဏံ အကာဲအရာဘာဗ္တောန်လိက် ဒးဒုၚ်ဗတိုက်လဝ် ပ္ဍဲကဵုတိဍာ်ထိၚ်ဒဝ်ကဝ်ဒူလေဝ်ဂှ် အကာဲအရာဗီုလဵုနွံရော။

ပ္ဍဲလ္ပာ်ပိုဲဂှ်တှ်ေ ဇာဟသီုဖအိုတ်ဂှ် ဟွံစိုပ်ကၠုၚ်ပုဟ်။ တၚ်ဂၞၚ်သီုဖအိုတ်ဂှ် ဟွံဂွံစိုပ်လဝ်ပုဟ်။ ၜိုတ်ဂွံတီလဝ်ဂှ်တှ်ေ က္ၜၚ်ကျာကီု၊ လွဟ်ဇၞော်ကီု ၜိုတ် ၁၂ မနွံဒၟံၚ်ရ။ လ္ၚဵုဂှ်တှ်ေပရေၚ်ဇီုကပိုက်ဒးလဝ် ညိညနွံရ။ လ္ၚဵုဂှ်တှ်ေ လီုလာ်အာ သီုဖအိုတ်ဂှ် နွံရ။

• ပရေၚ်ကွးဘာတအ်ဒးဇီုကပိုက်လဝ်ရော ဗီုလဵုဂွံမိၚ်ကေတ်လဝ်ရော။

ပရေၚ်ဇီုကပိုက်ဒးဂှ် အောန်ဒၟံၚ်ရ။ မုဒှ်ရောတှ်ေ ဂြိပ်တိတ်လဝ်ရလေဝ်။ ဒၟာနူဟၟဲပ္ဍဲကွာန် ဟၟဲပ္ဍဲဘာဂှ်ရတှ်ေ ပရေၚ်ဇီုကပိုက်ဂှ် ဍေံအောန်ဒၟံၚ်ရ။ ဟွံတိတ်မ္ၚးပါဲလဝ်ဂှ်ရ ပ္ဍဲကဵုကွာန် ယဝ်ရဒးလွဟ်ဇၞော်တှ်ေ ကောန်ၚာ်၊ ကောန်ကွာန်တအ်ဂှ် ဇီုကပိုက်ဒးဂှ်တှ်ေ နွံဒၟံၚ်ရ။

-ပရေၚ်ဇီုကပိုက်ဒး ဘာဗ္တောန်လိက်ဗီုဏံ နွံဒၟံၚ်ဂှ်ရ အခိၚ်ပြဟ်လၟုဟ်ဏံ အခက်ခုဲဗီုလဵု ဒးဆေၚ်ဒၟံၚ်မုက်ရော။

အခက်ခုဲတအ်ဂှ်တှ်ေ ဗီုနူကၠၚ်ဂှ်ရ။ ပါဲဓလေတ်ရ။ တုဲပၠန် ဗ္တောန်လိက်လေဝ် ဟွံပြေပြံၚ်ပုဟ်လေဝ်၊ ပရေၚ်ဂီုကၠီုလေဝ် နွံဗီုပြၚ်လဵုဂှ် ဟွံတီရ။ ပ္ဍဲကဵုဂှ်လေဝ် အခက်ခုဲနွံဒၟံၚ်ရ။ ၜိုန်ဟွံဂွံဗ္တောန်လိက် ပ္ဍဲကဵုစမြိုၚ်တုဲ ဒးဗ္တောန်ဒၟံၚ်လိက် ပ္ဍဲကဵုဂြိုပ်ဂှ်ရ ခက်ခုဲ ဇၞော်မံၚ်ရ။ ကၟဳဗ္ဒၚ်တအ် ဂွံဂွံဍာ်အှော်တအ်လေဝ် ဟွံပြေပြံၚ်ဂှ် နွံရ။

-ပ္ဍဲအကြာဂြာတ်ထောံဖျေံဗုမ် ဗတိုက်ဒၟံၚ်ဂှ် ဒးကတ်ဗ္တောန်ဒၟံၚ်ပညာရ။ ပ္ဍဲအကာဲအရာဏံဂှ် တၚ်ကော်ချဴဗီုလဵု ဒးဆေၚ်ဒၟံၚ်မုက်ရော။

ပရေၚ်ဇီုကပိုက်ဆေၚ်စပ်ကဵုသွာၚ်စိုတ်ဓာတ်တအ်ဂှ်နွံဒၟံၚ်ရလေဝ်ဏး။ ကောန်ၚာ်တအ်လေဝ် အခိၚ်လဵုလွဟ်ဇၞော်စှ်ေရော။ အခိၚ်လဵုကၠုၚ်ပန်ရော ဟီုဂှ် ညးဂှ်လေဝ်ဟွံတီကေတ်ဂှ်ရ ဒးမံၚ်ဒၟံၚ်ကဵုသတိအရိုဟ်ဟ်တ္ၚဲလၟိုန်ရ။ ဣဏံဂှ်လေဝ် ပရေၚ်ဒးဇီုကပိုက် နွံဗွဲမဂၠိုၚ်ရ။ တုဲပၠန် အ္စာ၊ အ္စာၝောံတအ်လေဝ် ပါဲနူစိုက်ဂွဳဒးဗ္တောန်လိက်ဂှ် ဂြောဝ်ဂတာညးတအ် နွံဒၟံၚ်ရ။ ပ္ဍဲလတူဏံလေဝ် ပရေၚ်ဒးဇြိုၚ်စိုတ်ညးတအ် သာတုဲနွံကၠုၚ်ရ။ ပရေၚ်ပတှ်ေစဟွံဂွံတအ် ညးတအ်လေဝ်ဒးဆေၚ်ဒၟံၚ်မုက်ရ။ ဒးဆုဲပြံၚ်ဒၟံၚ်ဟီုတှ်ေ ကပေါတ်ကညောတ်တအ်၊ ကပေါတ်ဗ္တောန်တအ် ဆေၚ်စပ်ကဵုပရေၚ်ဗ္တောန်ဖျောန်တအ်လေဝ် အာဇီုကပိုက်ဒးဒၟံၚ်ရ။ ဇွောံမစၞစသုၚ်သွက်အ္စာအ္စာၝောံတအ်၊ ပရေၚ်စသုၚ်ကောန်ၚာ်တအ်၊ ပရေၚ်မံၚ်စံၚ်တအ်လေဝ် ခက်ခုဲနွံဗွဲမဂၠိုၚ်ရ။

-ဟိုတ်နူပေါဲဗတိုက်တုဲ သွက်ပရေၚ်ပညာကွးဘာပါဲဒဴဘဲပၞာန်တအ် နကဵု KECD အရာဗီုလဵု ကၠောန်သ္ပရေၚ်တၠုၚ်ကဵုဒၟံၚ် နွံရော။

ဗွဲတၟေၚ်တှ်ေ ဂအုပ်ပရေၚ်ပညာပွိုၚ်ဍုၚ် ခရိုၚ်တအ်လေဝ် KECD နွံဒၟံၚ်ရ။ ပ္ဍဲလတူတၚ်နွံပၟိက် ခရိုၚ်ပွိုၚ်ဍုၚ်တအ် ပ္တိုန်ထ္ၜးနၚ်တုဲ ၜိုတ်ပိုဲသ္ပမာန် ရနုက်ဗပေၚ်ကဵုဒၟံၚ် နွံရ။

-ပ္ဍဲပရေၚ်ပညာ KECD သၞာံဏံဂှ် ဒးကတ်ဗ္တောန်ဒၟံၚ်ပညာ ပ္ဍဲအကြာအခက်ခုဲရဏး။ ပ္ဍဲလတူဏံ ဂွံဒၟံၚ်ဇြဟတ် ပြေဒၟံၚ်စိုတ်ရဟာ။

ပ္ဍဲကဵုအကာဲအရာကာတၟေၚ်ဂှ် ကွးဘာကီု၊ အ္စာ၊ အ္စာဘာတအ်ကီု၊ မိမကွးဘာတအ်ကီု ပါလုပ်ပ္တိတ်ဒၟံၚ်ဇြဟတ် ပ္ဍဲပရေၚ်ပညာ ကောန်ၚာ်ညးတအ်တုဲ ရေၚ်တၠုၚ်ကဵုလဝ်ဂှ် ဂွံဇြဟတ်ဇၞော်ကဵုဇြဟတ်ရ။ ဆဂးဂှ် ဗီုနူကၠၚ်ဂှ်ရ။ သၟဝ်အကာဲအရာညိၚ်ဝတ်ဒၟံၚ် ဟီုဏောၚ်တှ်ေ ပရေၚ်ဂွံဇြဟတ်ကဵုစိုတ်ဂှ် ဗီုလဵုဂွံတုပ်ရော။ ပ္ဍဲအကာဲအရာဂွံဘေတ်ဂျေတ် ဝါတ်ဂါတ်ဒၟံၚ် အကာဲအရာခက်ခုဲဒၟံၚ်ဂှ် သီုညးဖအိုတ် ပ္တိတ်ဒၟံက်ကဵုဇြဟ် သွက်ပရေၚ်ပညာဂှ် ဂွံကဵုဇြဟတ်စိုတ်ဗွဲမဂၠိုၚ်ရ။

တုဲပၠန် ညးထံက်ပၚ်ထ္ၜလဘာ်ဒၟံၚ်ပိုဲတအ်လေဝ် ပ္ဍဲလတူကၠိုဟ်ကဵုပိုဲ ပ္ဍဲသၟဝ် KNU ပိုဲတုဲ ပိုဲဂွံကၠောန်ရေၚ်တၠုၚ်ကမၠောန်ဂှ် သာတုဲဇြဟတ်ကၠောန် နွံကၠုၚ်ရ။

-ပ္ဍဲလတူစပ်ကဵုကံၚ်ဇြဳပၞာန် ပ္တဝ်လဝ်ကဵုပရေၚ်ပညာတုဲ ဗတိုက်ကၠုၚ်ဒၟံၚ်ဂှ် မုမိက်ဂွံထပ်ဟီုဗပေၚ်နွံရော။

ကံၚ်ဇြဳပၞာန်ဂှ်တှ်ေ ဘာတအ်၊ စမြိုၚ်ပရေၚ်ဘာသာတအ် ပိုဲလေဝ် ဒၟာနူဒးအာဗ္တောန်ဒၟံၚ်ပညာ ပ္ဍဲစမြိုၚ်ပရေၚ်ဘာနွံဒၟံၚ်ဂှ်ရ ဒၞာဲဏံတှ်ေ သာတုဲ ဗတိုက်ကၠုၚ်ကောန်ညးအရာပ်တအ်ရ။ ပိုဲဟီုဂရိုဟ်ပျုတ်ဗ္ဒေက်ရ အရာကၠောန်ထေက် ဟွံသေၚ်ပုဟ်။ ဘာဗ္တောန်လိက် အနာဂတ်ပိုဲ အနာဂတ်ကၟိန်ဍုၚ်ပိုဲဂှ် ကၠောန်သ္ပကၠုၚ်ပရေၚ်ဗတိုက်ဗီုဏံတှ်ေ ညံၚ်ကဵုဍေက်ဝးပကဝ်ဒၟံၚ် ကၞုၚ်ကၟဝ်အနာဂတ်ကီုရ။ တၠအဝဵုဂှ် မၞိဟ်လေပ်နူဍေံတအ် နွံဟွံဂွံပုဟ်။ လောဲသိုက်နူဍေံတအ် ဟွံဂွံပုဟ်။ အကာဲအရာခိုဟ်နူဍေံတအ် ဟွံဂွံပုဟ်။ ဒးဖေက် ဍေံဏောၚ်။ တုဲပၠန်ယဝ်ရဗၠိုက်နက်ဒၟံၚ် ပ္ဍဲရာဇာဝၚ်ဂဥုဲၜူမာဲတှ်ေ ရုန်တိတ်ဟွံမာန်ပုဟ်။ ပရေၚ်ပညာပိုဲဂှ် နွံဒၟံၚ်ဏောၚ်။ ဒးလေပ်လိက်ဏောၚ်။ လညာတ်သၠဲလးတှ်ေ ဍေံတအ်ဂွံအုပ်ဓုပ် ဂွံထိၚ်ဒဝ်ဂှ် ဟွံလောဲပုဟ်။ ညံၚ်ပိုဲဟွံဂွံကၠောန် သွာၚ်ဏံ သၞောတ်စှ်ေစှ်ေဟွံမာန်ဂှ် ဍေံတအ်ဗက်ကၠောန်ပလီုဒၟံၚ်ရဂှ် ညာတ်ကေတ်ရ။