ဖဏံပေန်၊ ဖေဖဝ်ဝါရဳ (၂၄)
ပ္ဍဲဍုၚ်ကာမ္ဗောဒဳယျာဂှ် ဟိုတ်နူယဲဇွဟ်ဂစေံမွဲဂကူတုဲ သၟတ်ဗြဴ အာယုက် (၁၁) သၞာံမွဲတၠ ချိုတ်အာလဝ်တုဲ ဣဏံဝွံ အပ္ဍဲသၞာံတၟာလအ်ဂှ် ဒှ်လၟေၚ်ဒဒှ်ဒးချိုတ် ဒၟါနူစၟယဲ ကိုပ်ကၠာအိုတ်ဂှ် သၟိၚ်တၠအဝဵုပရေၚ်ထတ်ယုက်တံ ဟီုဂးလဝ်ရ။
ဂကောံပရေၚ်ထတ်ယုက်ဂၠးတိဝွံ အာတ်မိက်လဝ် သွက်ဂွံစွံသတိ ကုယဲဇွဟ်ကၠောံထၞာန် မက္တဵုဒှ်ဒၟံၚ် ပ္ဍဲသတ်တိရစ္ဆာန်မဴတှ် ပြဟ်ဟ်ဏံဂှ်တုဲ ပ္ဍဲမၞိဟ်တံဂှ်တှ်ေ အကာဲအရာကၠောံထၞာန်အောန်မာန်ဂှ်လေဝ် ဟီုဂးလဝ်ရ။
ပ္ဍဲဂိတုဖေဖဝ်ဝါရဳ (၁၆) ဂှ် သၟတ်ဗြဴကာမ္ဗောဒဳယျာမွဲတၠဝွံ ကြဴနူက္တဵုဒှ်လဝ် ဇကုဂမ္တဴ၊ ခ္ဍက်၊ ကအ်ဂိတံတုဲဂှ် ဒးချိုတ်အာလဝ် ပ္ဍဲကဵုရုၚ်ဂဥုဲဂှ် ဌာနက္ဍိုက်ပ်ထိၚ်ဒက်ယဲ ဍုၚ်ကာမ္ဗောဒဳယျာ လလောၚ်ပ္တိတ်လဝ် ပ္ဍဲဂိတုဖေဖဝ်ဝါရဳ (၂၂) တေံရ။
နကဵုဌာနက္ဍိုက်ပ်ထိၚ်ဒက်ယဲဂှ် တ္ၚဲသၟတ်ဗြဴဏံ မချိုတ်အာလဝ် အခိၚ်လဵုရောဟီုဂှ် ထ္မံက်ထ္ၜးလဝ်ဟွံမွဲတုဲ ပ္ဍဲသၟတ်ဗြဴ နူခရိုၚ်ဒေသန္တရ ပရဳဗာန်ဂှ် စမ်ၜတ်ဂွံဆဵုလဝ် သွဟ်ပါ်ဓာတ် H5 N1 ဂကူစၟယဲဇွဟ်ဂစေံဂှ် လလောၚ်ပ္တိတ်လဝ်ရ။
ယဲဏံဝွံ ဓမ္မတာမ္ဂး နူကဵုလုက်စုက်ဒးဂစေံတံဂှ် ကၠောံထၞာန်မၞိဟ်တံမာန်ရောၚ် သ္ဂးလဝ်ရ။ စနူသၞာံ ၂၀၂၁ သ္ကုတ်လက္ကရဴဂှ်တုဲ ပ္ဍဲဥရဝ်ပဂှ် ယဲဇွဟ်က္တဵုဒှ်လဝ် ပရေံအိုတ်တုဲ ပ္ဍဲကဵုအမေရိကသၟဝ်ကျာကဵု အမေရိကသၠုၚ်ကျာတံဂှ်လေဝ် ဒးဂဗလဝ် ဗွဲမသ္ကာတ်မြဟ်ရ။
ဟိုတ်နူအကာဲအရာဏံတုဲ ဒးဂစိုတ်လဝ် စာၚ်လွဳလဝ်ပ္ဍဲသ္ၚိ မဒးဒုၚ်ကၠောံထၞာန်လဝ် H5N1 အလုံဂၠးတိမွဲ ဂၠိုၚ်ကဵုပြကောဋိကိုဋ်ဂှ်တုဲ ဂစေံအရိုၚ် ဂၠိုၚ်ကဵုဠက် မ္ဒးချိုတ်အာတံဂှ်လေဝ် ဒးက္တဵုဒှ်လဝ် ဒၟါနူပရေၚ်ယဲကၠောံထၞာန် စပ်ကဵုအလုံဂၠးတိဏံကီုဂှ် သ္ဂးလဝ်ရ။
ဟိုတ်နူဂွံဆဵုလဝ် ယဲဏံ ပ္ဍဲကဵုသတ်တိရစ္ဆာန်မဴတှ်ယာဲ ဗွဲမဂၠိုၚ်ဂၠေၚ် ခြာဟွံလအ်ဏံဂှ်ရ ပရေၚ်ဒှ်ဓဝိၚ် သာတုဲဒှ်ကၠေံအန္တရာယ် သွက်မၞိဟ်တံဂှ် သ္ကဵုက္တဵုဒှ်လဝ်ရ။
“ပရေၚ်ကၠောံထၞာန် ဇရေၚ်သတ်တိရစ္ဆာန်မဴတှ် ခြာဟွံလအ်ဏီတံဂှ် နွံပၟိက် ဒးမၚ်ကျောဝ်ကြပ်ပ်ဏောၚ်။ အခိၚ်လၟုဟ်ဂှ် အကာဲအရာဒှ်အန္တရာယ်မာန် သွက်မၞိဟ်တံဂှ် သဝ်အိုတ်ဏောၚ် WHO ကဵုလဝ်သ္ဂုတ်သွာတ်ဖိုဟ်ရ” သာ်ဝွံ WHO ဟီုဂးလဝ်ရ။
Ref: Straits times