ဗြဝတဳ၊ ဖေဖဝ်ဝါရဳ(၂၄)
တွဵုရးကရေၚ်၊ ခရိုၚ်ဗြဝတဳ ပ္ဍဲပေါဲဗတိုက်ၜါလ္ပာ် က္တဵုဒှ်လဝ် ပ္ဍဲဂၠံၚ်ဝဝ်လေဝ် ဖလူဂှ် ပါလုပ်သီုသ္ကိုပ်ဗိုလ် လပါ်ကံၚ်ဇြဳပၞာန်မွဲတၠ ဒးချိုတ်လဝ် (၂)တၠနွံတုဲ (၄)တၠဂွံလဝ်ဘဲဝပ်ရဂှ် ကရောၚ်ပၞာန်ကဝ်ဗရာ လလောၚ်တြးလဝ်ရ။
ပ္ဍဲဂိတုဖေဖဝ်ဝါရဳ စၟတ်တ္ၚဲ (၂၂) အခိၚ်ၜိုတ်(၂)နာဍဳဒေါဝ်တ္ၚဲဂှ် ယာဉ်ကွဳစက် ဒပ်ကံၚ်ဇြဳပၞာန် (၃)ဖ္ဍိုက် ဃောတတ်အာဒၟံၚ် ပ္ဍဲဂၠံၚ်ဇၞော် ဝဝ်လေဝ် ဖလူ တိဍာ် KNU ဒပ်မဟာ (၆)ဂှ် ဒှ်လဝ်ပေါဲဗတိုက်ဆေၚ်မုက်ကဵု ကရောၚ်ပၞာန်ကဝ်ဗရာရ။
ပ္ဍဲကဵုပေါဲဗတိုက်ဂှ် ဟိုတ်နူလပါ်ကံၚ်ဇြဳပၞာန် ပန်ဖျေံနၚ်လွဟ်ဇၞော် လွဟ်ဍော် နူလတူကွဳစက်ကြာန်န်တုဲ ဇီုကပိုက်ဒးလဝ် ညးဍုၚ်ကွာန် ပါဲဘဲပၞာန် ပ္ဍဲဗ္ဒပ်ပါဲပၞာန် မၞုံဗ္ဒာဲဂှ် မွဲတၠတုဲ ဂွံလဝ်ဘဲဝပ် ပ္ဍဲက္ဍိုပ်ရဂှ် ကရောၚ်ပၞာန်ကဝ်ဗရာ ဟီုသ္ဂးလဝ်ရ။
ဟိုတ်နူပေါဲဗတိုက်ၜါလပါ်တုဲ ညးဍုၚ်ကွာန်ပါဲဘဲပၞာန် ဗ္ဒဗ္ဒာဲဒၟံၚ် ပ္ဍဲဗ္ဒပ်ပါဲပၞာန်ဂှ် ဒးပါဲဓလေတ် တန်တဴဒၟံၚ် ပ္ဍဲဇိုၚ်သြၚ်ကြုၚ်တောၚ်ယျေန် မွဲချိုန်ခနတုဲ ဂိတုဖေဖဝ်ဝါရဳ စၟတ်တ္ၚဲ (၂၃) အခိၚ်နူဂယးဂှ်မ္ဂး ညးပါဲဘဲပၞာန်လ္ၚဵုဂှ် ကလေၚ်လုပ်အာ ပ္ဍဲဗ္ဒပ်ပါဲပၞာန်နွံဒၟံၚ်ရဂှ် ဂွံတီကေတ် နူညးဍုၚ်ကွာန် ပါဲဒဴဘဲပၞာန်တအ်ရ။
ဗ္ဒပ်ပါဲပၞာန်ဏံ ဟိုတ်နနူပေါဲဗတိုက် လေကေအ်ကဝ်တုဲ ဒှ်ဗ္ဒပ်ပါဲပၞာန်ပလောတပိုအ် ညးဒေသလေကေအ်ကဝ် ပါဲဘဲပၞာန်တအ် မံၚ်တန်တဴဒၟံၚ်တုဲ ပ္ဍဲဂၠံၚ်ဇၞော် ဖလူဝဝ်လေဝ် ကေုာံဗ္ဒာဲသြၚ်ကြုၚ် တောၚ်ယျေန်ဂှ် မံၚ်တန်တဴဒၟံၚ် မွဲချိုန်ခဏရ။
ပ္ဍဲတ္ၚဲဏံဂှ်မ္ဂး ၜိုန်ပရေၚ်ပန်ပှော် ဟၟဲဏီကီုလေဝ် ပရေၚ်ချဳဒရာၚ် ကရောၚ်ပၞာန်ကံၚ်ဇြဳ နွံဒၟံၚ်ရဂှ် ဂွံတီကေတ် နူညးဒေသတအ်ရ။
သ္အာၚ်နူဂှ်ပၠန် ပ္ဍဲလပါ်ကွာန်ထိကပလေဝ် မၞုံဗ္ဒာဲဍုၚ်သုကလ တိဍာ်ဒပ်မဟာ ၆ KNU ဂှ်လေဝ် ဟိုတ်နူပရေၚ်ကြံၚ်မ္ၚိုဟ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KNDO တအ် နွံဒၟံၚ်တုဲ ညးဒေသကောန်ဍုၚ်ကွာန်တအ်လေဝ် ဒးဂြိပ်ဒဴဒၟံၚ် ပ္ဍဲဒၞာဲဌာန် ဗၠးဘဲရဂှ် ဂွံတီကေတ် နူဇရေၚ်ဂကောံပရေၚ်မၞိဟ်ကောန်ဂကူကရေၚ်တအ်ရ။
ပရိုၚ်- သြၚ်လောန်တိုၚ်(မ်)