မတ်မလီု – ဖေဖဝ်ဝါရဳ (၂၄)
တွဵုရးဍုၚ်မန်၊ ရုၚ်လ.ဝ.က ကေုာံရုၚ်ပရေၚ်အုပ်ဓုပ်ကွာန်အရာပ် မၞုံပ္ဍဲပွိုၚ်ဍုၚ်မတ်မလီု ကေုာံပွိုၚ်ဍုၚ်ဇြပ်ဗုတအ် ဒးဒုၚ်ဖံက်ခတိုဟ်လဝ်မာၚ်တုဲ ပရေၚ်ဇီုကပိုက်လီုလာ်လဝ် နွံဒၟံၚ်ရဂှ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဂိတုဖေဖဝ်ဝါရဳ စၟတ်တ္ၚဲ(၂၂)တုဲကၠုၚ်ဏံ အခိၚ်ဗ္တံဂှ် ရုၚ်ဌာနဝန်ဇၞော်ကောပ်ကာဲပရေၚ်မၞိဟ်လုပ်တိတ် ကေုာံဇြဟတ်ညးဍုၚ်ကွာန် တွဵုရးဍုၚ်မန်ကီု သီုကဵုဂတမုက် ရုၚ်ပရေၚ်အုပ်ဓုပ်အရာပ်လှိုၚ် မာၚ်ရမျှာၚ်ခတိုဟ်လဝ် လအ်ခရာ(၁၅)မိနေတ်တုဲ ပ္ဍဲဂတမုက် ရုၚ်အရာပ်လှိုၚ်ဂှ် ကၟာၚ်ဍိုတ်လ္ၚဵုတအ် ၜိုန်ရဇီုကပိုက်လီုလာ်လဝ် နွံကီုလေဝ် ပရေၚ်ဇီုကပိုက်ဒးမၞိဟ် ဟၟဲရဂှ် ဂွံတီကေတ်ရ။
သ္အာၚ်နူဂှ်ပၠန် ရုၚ်အုပ်ဓုပ်အရာပ်ကျောၚ်ပိုၚ် ဍုၚ်ဇြပ်ဗုဂှ်လေဝ် တ္ၚဲဏံ ဂိတုဖေဖဝ်ဝါရဳ စၟတ်တ္ၚဲ (၂၃) အခိၚ်နူဂယးပြဟ်ဂှ် ဟိုတ်နူဒးဒုၚ်ဖံက်ခတိုဟ်လဝ်မာၚ်တုဲ သီုအလုံရုၚ်မွဲ ၜိုန်ရခရိုဟ်စှ်ေ လီုလာ်အာလဝ် နွံကီုလေဝ် ဇီုကပိုက်ဒးလဝ်မၞိဟ် ဟၟဲရဂှ် ညးဒေသတအ် ဟီုသ္ဂးလဝ်ရ။
ကြဴနူပရေၚ်မာၚ်ခတိုဟ် ဒှ်လဝ်တုဲဂှ် ဂကောံသၟဝ်တဲကံၚ်ဇြဳပၞာန်တအ် စိုပ်ကၠုၚ်တုဲ ပရေၚ်စၟဳစၟတ် နွံဒၟံၚ်ကီု သၟာန်သၟုက်လဝ် ညးဍုၚ်ကွာန် မၞုံဗ္ဒာဲဗ္ဒာဲတအ်ဂှ်ကီု ပ္ဍဲကဵုဒၞာဲလုပ်တိတ်ဍုၚ်ဂှ်လေဝ် စၟဳစၟတ်ဒၟံၚ်ရဂှ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိၚ်(မ်)ရ။
စပ်ကဵုပရေၚ်ဗတိုက်သရိုဟ်ဏံတုဲ နူဂကောံလဵု ကၠောန်သ္ပလဝ်ရောဂှ် လလောၚ်တြးကၠုၚ်လဝ် ဟၟဲဏီရ။
ဗ္ဒာဲရုၚ် လ.ဝ.က တွဵုရးဍုၚ်မန် ဒးဒုၚ်ဗတိုက်လဝ်လၟုဟ်ဏံဂှ် ကၠာတေံလေဝ် မာၚ်ကေၚ်ခတိုဟ်လဝ် နွံဒၟံၚ်ကီု ရုၚ်အုပ်ဓုပ်အရာပ်လှိုၚ်ဂှ် ပ္ဍဲဂိတုအံက်တဝ်ဗာမံက် သၞာံတုဲကၠုၚ်တေံ ဒၟာနူဒးဒုၚ်ဖံက်ခတိုဟ်လဝ်မာၚ်တုဲ ပရေၚ်ဇီုကပိုက်လီုလာ် နွံလဝ်တုဲ ပရေၚ်ဇီုကပိုက်ဒးမၞိဟ် ဟၟဲရဂှ် ဂွံတီကေတ်ရ။
အခိၚ်လၟုဟ်ဏံမ္ဂး ပွိုၚ်ဍုၚ်မၞုံပ္ဍဲတွဵုရးဍုၚ်မန်လ္ၚဵုဂှ် ကၠောန်ကၠုၚ်ဒၟံၚ် ပရေၚ်ထ္ပက်ကရောၚ်ပၞာန်ကီု ဒပ်စဵုဒၞာဒေသတအ်လေဝ် ပ္တဝ်လဝ်ကဵု သၞေဟ်ကၚ်စၟဳစၟတ်၊ ဗ္ဒပ်ဗၠာဲသၟိၚ်၊ ရုပ်အုပ်ဓုပ်၊ ရေၚ်ယာဉ်ကွဳစက် မပါလုပ်သီုတံဒပ်ကံၚ်ဇြဳပၞာန်တုဲ ကၠောန်သ္ပဒၟံၚ်ပရေၚ်ပန်ဗတိုက် ကြဳကြဳသိၚ်ၚ်ရ။
ပရိုၚ်-သြၚ်လောန်တိုၚ်(မ်)
ဗီုရုပ်- CJ( ဗီုဂွံညာတ်ကေတ် ရုၚ်အုပ်ဓုပ် အရာပ်ကျောၚ်ပိုၚ် ဍုၚ်ဇြပ်ဗု လီုလာ်ဒၟံၚ်)