သာယျာဝတဳ – ဖေဖဝ်ဝါရဳ(၂၄)
ရးသေဗဂေါ၊ ပွိုၚ်ဍုၚ်သာယျာဝတဳ ပ္ဍဲဂၠံၚ်ကွဳစက် လဂုၚ်-ပြန် ဗ္ဒာဲကွာန်ဂွေချောၚ်ဂှ် ရိုဝ်ဟေန်ဂျာ (၃၂) တၠ ဒးဒုၚ်ရပ်လဝ်ရဂှ် ညးရီုဗၚ်ကဵုဒၟံၚ် ရိုဝ်ဟေန်ဂျာဂမၠိုၚ် ဟီုကဵု ဌာန်ပရိုၚ် သြၚ်လောန်တိုၚ်(မ်)ရ။
ဂိတုဖေဖဝ်ဝါရဳ စၟတ်တ္ၚဲ (၂၁) တုဲကၠုၚ်ဏံ ဒပ်ကံၚ်ဇြဳပၞာန် ရပ်ဂွံညးတအ် ပ္ဍဲကဵုသၞေဟ်ကၚ်စၟဳစၟတ် ပ္ဍဲလတူဍာန် လဂုၚ်-ပြန် ဂှ်ရ။
မၞိဟ်ဒးဒုၚ်ရပ်လဝ်ကဵု ကံၚ်ဇြဳပၞာန်တအ်ဂှ် မၞိဟ်တြုံပါလုပ် (၂၈)တၠ မၞိဟ်ဗြဴ (၄)တၠ ပါလုပ်တုဲ သွက်ဂွံအာဍုၚ်မလေဝ်ယှာ ညးတအ်တိတ်ကၠုၚ် လဂုၚ် နူကဵုလပါ်တွဵုရးရခေၚ်ဂှ် ဒးဒုၚ်ရပ်လဝ် အကြာဂၠံၚ်ရ။
အခိၚ်လၟုဟ်ဏံမ္ဂး ရိုဝ်ဟေန်ဂျာ ရပ်ဂွံလဝ်တအ်ဂှ် ထိၚ်ဒက်လဝ် ပ္ဍဲဗ္ဒပ်ဗၠာဲသၟိၚ် ပ္ဍဲဍုၚ်တုမ်သေဝ်(သုံးဆယ်မြို့) တုဲ နကဵုၝောံပိုဒ်လဵု စောဲဂဗုတ်ရော ဟွံတီကေတ်ဏီရဂှ် ညးရီုဗၚ်ကဵုဒၟံၚ် ရိုဝ်ဟေန်ဂျာမွဲတၠ ဟီုသ္ဂးလဝ်ရ။
သ္အာၚ်နူဂှ်ပၠန် ကြဴနူကံၚ်ဇြဳပၞာန် ရပ်ကေတ်လဝ်ရိုဝ်ဟေန်ဂျာတအ်တုဲ စောဲကၠုၚ်ဒၟံၚ်ဂဗုတ် နကဵုၝောံပိုဒ် ၆(၂)၊ ၆(၃) မဒှ်ၝောံပိုဒ်ကောပ်ကာဲမၞိဟ်လုပ်တိတ်တုဲ ဖျေံကၠုၚ်ဒၟံၚ်ထံၚ် နူ (၂)သၞာံစဵုကဵု(၅)သၞာံ နွံလေပ်ဒၟံၚ်ရဂှ် ညးဟီုသ္ဂးလဝ်ဏီရ။
ပ္ဍဲဂိတုဖေဖဝ်ဝါရဳ စၟတ်တ္ၚဲ (၁၉) တုဲကၠုၚ်တေံလေဝ် ရိုဝ်ဟေန်ဂျာ ပ္တိတ်ဒၟံၚ်ဇြဟတ် သွက်ဂွံအာ ဍုၚ်မလေဝ်ယှာ (၄၀) တၠ ပ္ဍဲကဵုကွာန်ဝေဝ်ကလိ ဍုၚ်မုဟ်ဍုၚ် တွဵုရးဍုၚ်မန်ဂှ် ကံၚ်ဇြဳပၞာန်ရပ်လဝ်နွံရ။
ကြဴနူဒပ်ကံၚ်ဇြဳပၞာန် သီကေတ်အဝဵု ကၟိန်ဍုၚ်ဗၟာတုဲဂှ် ရိုဝ်ဟေန်ဂျာ တိတ်ကၠုၚ်နူဗ္ဒပ်သၟာဒဒိုက် တွဵုရးရခေၚ် ကေုာံဘၚ်္ဂလာဒေတ် ဗ္ဒာဲၜါလ္ၚီတၠပြၚ် ဒးဒုၚ်ရပ်လဝ်တုဲ ပ္ဍဲကဵုဂှ် ၜိုတ်ပန်ကၠံပြၚ်တအ် နကဵုသၞောဝ်ဥပဒေ လ.ဝ.က ကေုာံ ဒဏ်ထံၚ် နူ(၂)သၞာံ စဵုကဵု(၅)သၞာံ ဖျေံကၠုၚ်ဒၟံၚ်ရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – CJ