လဂုၚ်၊ ဖေဖဝ်ဝါရဳ(၂၅)
သၞောတ်ပတိုန်ဗော်ကေန် စၟတ်တဲကၠောံဍုၚ် နူကဵုအောန်လာၚ် ကံၚ်ဇြဳပၞာန် ပံက်လဝ် စနူဂိတုဖေဖဝ်ဝါရဳ စၟတ်တ္ၚဲ (၂၄)ဂှ် ဟိုတ်နူပရေၚ်လဇုဲလဇကီု သီုတၚ်ဍိုန်လျနွံတုဲ ညးသုၚ်စောဲတအ် ဒးဂဗဒၟံၚ်ကဵု အခက်ခုဲရဂှ် ဂွံတီကေတ်ရ။
စၟတ်တဲကၠောံဍုၚ်ဂှ် ဒးပတိုက်ဗော်ကေန် နူကဵုဝေပ်သိုက် www.passport.gov.mm တုဲ အခိၚ်ဟွံရုဲ ပတိုန်စရၚ်မာန်ဒၟံၚ်ရဂှ် ၜိုန်ရဟီုလဝ်ကီုလေဝ် တ္ၚဲဏံ အခိၚ်နူဂယးဂှ် ဒၟာနူမၞိဟ်လုပ်စိုပ်သုၚ်စောဲ ဂၠိုၚ်လောန်အာတုဲ ကၟာတ်အာ ခရာကဵုနာဍဳဏီရ။
“အဲကၠုၚ်လဂုၚ်တုဲ သွက်ဂွံကၠောန်ပါတ်သပေါတ် ဂွံအာကၠောန်ကမၠောန် ဍုၚ်မ္ၚးရ။ နူကဵုဂိတုနဝ်ဝေမ်ဗာ တုဲကၠုၚ်တေံရ။ ကၟာတ်ထောံဟီုတှ်ေ မုဂွံဆက်ကၠောန်ရောဟီုဂှ် ဂၠာဲဂၠံၚ်နဲကဲတုဲ ခက်ဒၟံၚ် ပ္ဍဲလဂုၚ်ဏံရ။ သြန်လေဝ် အိုတ်အာတၟာဂလိုၚ်ရ။ လၟုဟ်ဏံ ကၠောန်ကေတ် နူကဵုအောန်လာၚ်ဂွံမံၚ်ယျဟီုတှ်ေ နူဂယးဏံ လုပ်စမ်ရံၚ်ရ။ ကောံလုပ်တုဲ ဂအုမ်လုပ်အာသီုဖအိုတ်တွဵုရ နူဂယးဏံၜိုတ် (၈)နာဍဳ ပံက်ရံၚ်ဂှ် ပံက်ဟွံဂွံရ၊ ဒေါဝ်တ္ၚဲဂှ်မှ ဂွံပံက်ဂွံ။ ဆဂး အရိုဟ်အရိုဟ်ဗပေၚ်တၚ်ဂၞၚ် မွဲမွဲလန်တုဲဂှ် ဒးမၚ်ဒၟံၚ် တၚ်သ္ပဒ္တန် လအ်မံၚ်။ ဂၞန်ဖုန်ဍေံကဵုလဝ်ဂှ် ဗီုလဵုဆက်က် ဆက်ဟွံလုပ်ပုဟ်” ဂှ် ညးပ္တိုန်ဗော်ကေန် နူအောန်လာၚ် သွက်ဂွံပတိုန်စရၚ်လိက်ပါတ်သပေါတ်မွဲတၠ ဟီုသ္ဂးလဝ်ရ။
ပ္ဍဲပ္တိုန်စရၚ်စၟတ်တဲကၠောံဍုၚ် နူအောန်လာၚ်ဂှ် ယဝ်ရကၠောန်ကေတ်တၟိမ္ဂး သြန်ပိလက်ဘာ်၊ ယဝ်ရလီုလာ်ကၠေံအာမ္ဂး သြန် ထပှ်လက်ဘာ်ကီု မံၚ်ပ္ဍဲဍုၚ်သ္အာၚ်ကၠေံအာတုဲ ယဝ်ရကလေၚ်ကၠောန်မ္ဂး ဒးပၠုပ်ကဵုသြန်ဗၟာ ညဳသၟဟ်ကဵုဒဝ်ဠာ (၇၅)ရဂှ် သ္ဂးလဝ်ရ။
ၚုဟ်မးရေၚ်တၠုၚ်ကၠောန်ပါတ်သပေါတ်ဂှ် ပတိုန်ဗော်ကေန် ပ္ဍဲအောန်လာၚ်တုဲဗက် ဒးပၠုပ်ကဵုတုဲ အခိၚ်လၟုဟ် ပြဟ်ဟ်ဏံမ္ဂး န KBZ – Pay ကေုာံ E-commerce ကာဒ်ဘာဏ် MPU ပ္တိုန်လဝ်စရၚ်တုဲတအ် ပၠုပ်ကဵုမာန်ရဂှ် သ္ဂးရ။
ညးပတိုန်စရၚ်အာတ်အခေါၚ်တအ်ဂှ် ဗပေၚ်ဗီုပြၚ်စၟတ်သမ္တီတုဲဗက် ပ္ဍဲတ္ၚဲသၞောတ်အောန်လာၚ်ချိၚ်ဖာပ်ကဵုလဝ်ဂှ် ကေတ်နၚ် တၚ်ဂၞၚ်သက်သဳတအ်တုဲ ဒးပ္တိတ်ကေတ်လိက်အုပ်ရ။
သွက်ညးပ္တိုန်လဝ်စရၚ်နကဵု Green Channel တအ် ဟွံဒးချိၚ်ဖာပ်တ္ၚဲ နူကဵုသၞောတ်ဗော်ကေန်အောန်လာၚ်တုဲ ညးမၞုံတာလျိုၚ်ကဆံၚ်သ္ကိုပ်စၞောန်ပ္ညုၚ် ကေုာံ ကဆံၚ်လတူ ဌာနဝန်ဇၞော်ဆေၚ်စပ်တအ် ထ္ပက်ကဵုစၟတ်တဲ ထံက်ကဵုဂလာန်တုဲ နူကဵုဥက္ကဋ္ဌ ဌာနဝန်ဇၞော်မွဲကဆံၚ်၊ ပရဟ်ဒုၚ်ပ္တိုတ်စရၚ်အာတ်မိက် နကဵုလိက် ပ္ဍဲရုၚ်ဂကောံပ္တိတ်ကဵုလိက်စၟတ်တဲကၠောံဍုၚ် ကၟိန်ဍုၚ်ဗၟာမာန်ရဂှ် ဂွံတီကေတ်ရ။
ပ္ဍဲကဵုညးပ္တိုန်စရၚ် Green Channel ကေုာံပါတ်သပေါတ်ဂှ် သၟာကမၠောန် MoU၊ ဂကောံဆေၚ်စပ်ကဵု ပရေၚ်ဘာသာ၊ ပေါဲသၠာဲဂတးယေန်သၞာၚ်တအ်၊ ကောန်က္ၜၚ် ကေုာံ ကိစ္စအာဍုၚ်သ္အာၚ်နကဵုအခေါၚ်၊ ညးအာလွဳယဲ ပ္ဍဲဍုၚ်သ္အာၚ် ကေုာံ ညးပါဗက်ကရောံမၞိဟ်ယဲ၊ အေဂျေန်အာတရဴတအ်၊ ညးကတ်ေဗ္တောန်ပညာ၊ ညးဒးအာစိုပ် နကဵုပၟိက်ကိစ္စအလဵုအသဳဗွဲမဗဗွဲကဵု ဌာနဝန်ဇၞော်ဂမၠိုၚ် ပါလုပ်လၟိဟ်ရဂှ် ဟီုသ္ဂးလဝ်ရ။
နကဵုညးမပ္တိုန်လဝ်စရၚ်တအ်ဂှ် တၞးကာဒ်ကောန်ဍုၚ်(မူတၞံ) ကေုာံ တၞးဆာဲ (၂) စုမ်၊ စရၚ်သ္ၚိကၟိန် (မူတၞံ) ကေုာံ တၞးဆာဲ (၂)စုမ်၊ ယဝ်ဒှ်အာယုက်သၟဝ် (၁၀) သၞာံမ္ဂး စရၚ်သၠးဂၠံဂဝ် (မူတၞံ) ကေုာံ တၞးဆာဲ(၂)စုမ်တအ်ဂှ် ဒးပ္တိုန်ထ္ၜးသက်သဳရောၚ်ဂှ် ဂွံတီကေတ်ရ။
ပရိုၚ်-သြၚ်လောန်တိုၚ်(မ်)