“ဇေတ်တ်တေံ ယဝ်ရဍုၚ်ကွာန်ၜိုဟ်သြိုဟ်သာယျာတုဲ ယဝ်ရၜိုဟ်လလံညိၚ်ဝတ်ဒၟံၚ်တှ်ေ သောၚ်သောၚ်ရ။ ဂကောံပၞာန်ပ္ကီုပရာပ်ဏံဂှ် အဝဵုဟွံဆေၚ်ကဵုဍေံတအ် ဍေံတအ်ဟွံပိုၚ် ဍေံတအ်ပၠံၚ်ကေတ်လဝ်ဂှ် ကလေၚ်ပ္အပ်ကဵုတုဲ ကလေၚ်စှ်ေထောံညိ”

တၚ်ဆက်စၠောံသၟာန်သွဟ်လဝ်ကဵု ညးမၞုံအခေါၚ်ဟီုဂး ရုၚ်သ္ကိုပ်ဝန်ဇၞော် NUG ဥူနေဘုမ်လေတ်။

ကံၚ်ဇြဳပၞာန်သီအဝဵုဂှ် ကြဴနူထပ်ဂလိုၚ်ပ္တိုန်အာယုက်ကာတၟေၚ်တုဲ လလောၚ်တြးကၠုၚ် ပွိုၚ်ဍုၚ်မၞုံပ္ဍဲ ရးဒေသဇၞော် ကေုာံ တွဵုရး (၈)တအ် ပရေၚ်အုပ်ဓုပ်ပၞာန်ဂှ် လၟုဟ်ဏံ စိုပ်ကၠုၚ် ပ္ဍဲအခိၚ်ပိသတ္တာဟရ။

ဟိုတ်ဂှ်ရ ပ္ဍဲကဵုပွိုၚ်ဍုၚ်လလောၚ်တြးလဝ် ပရေၚ်အုပ်ဓုပ်ပၞာန်ဂှ် ပရေၚ်ချဳဒရာၚ် လပါ်ကံၚ်ဇြဳပၞာန် ဗီုပြၚ်လဵု နွံရော။ လတူညးဍုၚ်ကွာန် ကောန်အရာပ်တအ် ဗီုပြၚ်လဵု ဍဵုဍိုက်ဒၟံၚ်ရော။ မုဗတိုက်ဖ္အောဝ်ဒၟံၚ် ညးဍုၚ်ကွာန် ပ္ဍဲကဵုဒေသလလောၚ်တြးလဝ် ပရေၚ်အုပ်ဓုပ်ပၞာန်တအ် ဗီုလဵုနွံရော။ စပ်ကဵုအကာဲအရာဏံတုဲ ဆက်စၠောံသၟာန်သွဟ်လဝ်ကဵုညးမၞုံအခေါၚ်ဟီုဂးရုၚ်သ္ကိုပ်ဝန်ဇၞော် NUG ဥူနေဘုမ်လေတ်ရ။

-အလန်ကိုပ်ကၠာအိုတ်ဏံ ပ္ဍဲကဵုပွိုၚ်ဍုၚ် ကံၚ်ဇြဳပၞာန်သီအဝဵုလလောၚ်တြးလတ်ပရေၚ်အုပ်ဓုပ်ပၞာန်တအ်ဂှ် ဗီုပြၚ်လဵုကံၚ်ဇြဳပၞာန်သီအဝဵုတအ် ချဳဒရာၚ်ဒၟံၚ်နွံရော။

ဂကောံပၞာန်ဂှ်တှ်ေ ပ္တိတ်လဝ်မာယှေဝ်ဠဝ်တုဲ သၞောတ်ကဵုပၟိၚ်ဍေံတအ်ဂှ် ပ္အပ်ကဵုလဝ်သ္ကိုပ်ရးပၞာန် အခေါၚ်ကၠောန်ပေၚ်ၚ်တုဲ သၞောတ်ကဵုပၟိၚ်ဂှ် ညံၚ်ဟွံဂွံဒးပ္တိုန်ထ္ၜး ကဆံၚ်ကဆံၚ်ဂှ် ကဵုလဝ်အခေါၚ်ကၠောန်ရဂှ် ဂွံညာတ်ကေတ်ရ။ ပ္ဍဲကဵုပွိုၚ်ဍုၚ် ပ္တိတ်လဝ်မာယှေဝ်ဠဝ်ဂှ်တှ်ေ နွံၜါဂကူရ။ တိဍာ်LOCAL DEFENCE FORCE တအ် ပါလုပ်သီု NUG တုဲပၠန် PDF တအ်အုပ်ဓုပ်လဝ်ဂှ် နွံရ။

ပ္ဍဲကဵုတိဍာ်ဂှ်တှ်ေ ဒှ်ဒၟံၚ်အကာဲအရာ ဒပ်ကံၚ်ဇြဳပၞာန် နဲလဵုလေဝ်လုပ်အာဗ္ဒာဲဂှ် ဟွံဂွံရ။ ဗီုပြၚ်ဏံ နွံဒၟံၚ်ကီု မွဲလ္ပာ်ပၠန်လေဝ် ပ္ဍဲကဵုဒၞာဲ လ္ပာ်တေံကီု လ္ပာ်ဏံကီု မွဲလ္ပာ်လေဝ် အုပ်ဓုပ်လဝ် ပေၚ်ၚ်ဟွံဂှ်တှ်ေ ညးဍုၚ်ကွာန်တအ်ရ ဒးဒုၚ်။ ပ္တဝ်လဝ်ကဵုညးဍုၚ်ကွာန်တုဲ  ဂကောံပၞာန်ပ္ကီုပရာပ် လုပ်အာပ္ဍဲကွာန်၊ ဗက်ရပ်ကေတ်ကောန်ကွာန်၊ တုဲတှ်ေ စံၚ်ပလီုထောံ၊ တုဲပၠန်စောတ်စောဲ PDF တအ် ဂစိုတ်လဝ် မပ္တံကဵုဗီုဏံရလေဝ်ဏး။ တုဲပၠန် ပၠံၚ်ၜးကေတ် သ္ၚိဌာန်ပိုန်ဒြပ် ကိစ္စဗီုတအ်ဏံဂှ်တှ်ေ ကၠောန်ကၠုၚ်ဒၟံၚ်မွဲဒမြိပ်ဂှ်လေဝ် ပိုဲဂွံညာတ်ကေတ်ဒၟံၚ်ရ။ ကိစ္စစံၚ်ပလီုကွာန်လေဝ် ကၠောန်ကၠုၚ်ဒၟံၚ် သိၚ်ၚ်ကြဳကြဳဂှ် ဂွံဆဵုကေတ်ရ။ 

-ပရေၚ်ပ္ကီုပရာပ်ဒၟံလတူကောန်အရာပ် ညးဍုၚ်ကွာန်တအ် ဗီုပြၚ်လဵုနွံရော။ နကဵုကံၚ်ဇြဳပၞာန် မုဟိုတ်ဂွံလလောၚ်တြးကၠုၚ် ပရေၚ်အုပ်ဓုပ်ပၞာန် ပ္ဍဲကဵုဒေသတအ်ဏံဂှ် သ္ၚဳဂၠိပ်ညာတ်ကေတ်ရော။

ယဝ်ရဒးဟီုတပ်ပ်တှ်ေ။ တၟေၚ်တၟဟ်တုဲ ဒေသဒးပ္တိတ်ကၠုၚ်မာယှေဝ်ဠဝ်ဟီုဂှ် တၞဟ်ခြာဂှ် ပိုဲချပ်ဟွံဂွံရ။ အလုံကၟိန်ဍုၚ်ပိုဲသီုဖအိုတ်ဂှ်  ဂကောံပၞာန်ပ္ကီုပရာပ် ပ္တိတ်ဒၟံၚ်ဇြဟတ် သွက်ဂွံပၠံၚ်ကေတ်အဝဵုညးဍုၚ်ကွာန် ဟွံလုပ်ကဵုသၞောဝ်တုဲ အရာဏံဂှ် ပ္တိတ်ဒၟံၚ်ဇြဟတ် နကဵုပၟိက်စိုတ် သွက်ဂွံအုပ်ဓုပ်အလုံမွဲကၟိန်ဍုၚ်ရ။ ဆဂးဂှ် ညးဍုၚ်ကွာန်သီုဖအိုတ်တအ်ဂှ် ဆလအ်လေဝ် ဟွံကဵုအုပ်ဓုပ်ပုဟ်ဂှ် အရာဏံ စဵုကဵုအခိၚ်လၟုဟ် ပွိုၚ်ၜါသၞာံပြၚ်ၚ် ပိုဲထ္ၜးပျးဒၟံၚ် ပိုတ်တ်သ္ကုတ်တ်ရ။

-မုမိက်ဂွံဗတိုက်ဖ္အောဝ်ညးဍုၚ်ကွာန် ပ္ဍဲကဵုဒေသလလောၚ်တြးလဝ် ပရေၚ်အုပ်ဓုပ်ပၞာန်တအ် နွံရော။

အဓိကဂှ်တှ်ေလေဝ် စွံသတိတုဲ သွက်ဂွံမံၚ်တန်တဴအာဂှ် ပၟိက်နွံဒၟံၚ်ရ။ မုက်ဂၞန်မွဲဂှ် သၞကျာရလေဝ်။ စပ်ကဵုဗလးကျာတုဲ သတိပိုဲ လ္ပကဵုဗၠးတိတ်အာညိ။ တၚ်ကဵုသတိမွဲမွဲ ဒှ်ကၠုၚ်ဗက်ဂှ် ညံၚ်ကဵုတေက်လဝ်ဇာတ်ကီုရ။ ကိစ္စသွက်ဂွံအောပ်မာတအ်၊ ဗီုတအ်ဏံ တုဲပၠန်တှ်ေ သွက်ဂွံအောပ်မာဗီုဏံဂှ် နူအခိၚ်ပြဟ်ဟ်တေံ ဒးပရဟ်ဒုၚ်တုဲ ပိုဲတအ် ကၠောန်သ္ပလဝ်ထေက်ရ။ ၜိုတ်ပိုဲသ္ပမာန် ပရေၚ်ပကောံမၞိဟ်ရလေဝ်ဏး။ ပရေၚ်ပကောံမၞိဟ်ဂှ်လေဝ် ညံၚ်ဟွံဂွံကၠောန်ဒး ၜိုတ်သ္ပမာန် ဒးဝေၚ်ပါဲရ။ တုဲမွဲပၠန်ဂှ် ပရေၚ်ပရိုၚ်မံက်ပြးတိတ်အာဂှ်လေဝ် ပၟိက်ဇၞော်ဒၟံၚ်ရ။ တုဲတှ်ေ ကိစ္စစပ်ကဵု ပရေၚ်ပၠန်ဂတးတအ်ကီုကဵုဒှ်။ ကိစ္စကောံကလောံ အကြာညးဍုၚ်ကွာန်တအ်ကဵုဒှ် စပ်ကဵုကိစ္စဗီုတအ်ဏံတုဲ ညံၚ်တၚ်ဂၞၚ်ပရိုၚ် ဟွံဂွံပြးတိတ်စိုပ်အာ ပ္ဍဲဂကောံပၞာန်တၞဟ်ဂှ်လေဝ် ဒးမၚ်မွဲထိၚ်ဒဝ်တုဲ သွက်ဂွံမံၚ်အာဂှ် ပၟိက်ဇၞော်ဒၟံၚ်ရ။

-အလန်လကြဴအိုတ်ဏံ မုမိက်ဂွံထပ်ဟီုဗပေၚ် နွံဏီရော။

ဂကောံပၞာန်ပ္ကီုပရာပ်ဂှ်တှ်ေ အတိုၚ်တီဒၟံၚ်ဂှ်ရ သွက်ပရေၚ်အဝဵုဍေံတအ် ဂွံတန်အာရ။ အကာဲအရာလၟုဟ်ဏံဂှ်လေဝ် ဂလိုၚ်ပတိုန်တြဴဂိတုတုဲ ပေါဲရုဲမာဲဟီုဂှ်လေဝ် နွံဒၟံၚ်အလဵု ဟွံတီဏီ ပ္တိတ်ဇြဟတ်ညံၚ် ကၟိန်ဍုၚ်ဂွံညိၚ်ဝတ်ဏောၚ်ဟီုတုဲတှ်ေ ထပ်ဂလိုၚ်ပတိုန်အာယုက် တြဴဂိတုပၠန်ရ။ အတိုၚ်ပိုဲသ္ၚဳဂၠိပ်လ္ၚတ်ကေတ်လဝ်ဂှ်တှ်ေ ပ္ဍဲတြဴဂိတုဏံ မုလေဝ်ဍေံတအ် ဂွံကၠောန်ကဵု တၟေၚ်ၚ်တၟဟ်ဟ်မာန် ဟွံသေၚ်ပုဟ်။ ဇေတ်တ်တေံ ယဝ်ရဍုၚ်ကွာန်ၜိုဟ်သြိုဟ်သာယျာတုဲ ယဝ်ရၜိုဟ်လလံညိၚ်ဝတ်ဒၟံၚ်တှ်ေ သောၚ်သောၚ်ရ။ ဂကောံပၞာန်ပ္ကီုပရာပ်ဏံဂှ် အဝဵုဟွံဆေၚ်ကဵုဍေံတအ် ဍေံတအ်ဟွံပိုၚ် ဍေံတအ်ပၠံၚ်ကေတ်လဝ်ဂှ် ကလေၚ်ပ္အပ်ကဵုတုဲ ကလေၚ်စှ်ေထောံညိ။ ကလေၚ်စှ်ေကဵုဗီုဏံဏောၚ်တှ်ေ လွာဲဂှ်ရ ဍုၚ်ကွာန်ၜိုဟ်သြိုဟ်သာယျာအာသၟးဟွံသေၚ်ပုဟ်။ ညးဍုၚ်ကွာန်သီုဖအိုတ် တက်ချေၚ် တက်ဗဗိုန်တုဲ တိတ်ကၠုၚ်ဂၠံၚ်ဖအိုတ်ဏောၚ်။