ကအ်သံၚ်၊ ဖေဖဝ်ဝါရဳ (၂၅)
ဟိုတ်နူပေါဲဗ္တိုက် နူပွိုၚ်ဍုၚ်ကအ်သံၚ်၊ ရးဒေသဇၞော်တၞၚ်သဳတံတုဲ ညးဍုၚ်ကွာန်ဒေသ ဗ္ဒါဲ (၁၀၀၀) ဝွံ ဒးဂြိပ်ဒဴပါဲဒလေတ်ဒၟံၚ် ပ္ဍဲဍုၚ်သေံကဵု ဒၞါဲဒဵုဂြိုပ်မၞုံပယျဵုတံရောၚ်ဂှ် ညးဒုၚ်တာလျိုၚ် ဂကောံဒပ်စဵုဒၞါညးဍုၚ်ကွာန် ပွိုၚ်ဍုၚ်ကအ်သံၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
စနူဂိတုဖေဖဝ်ဝါရဳ (၂၁) တုဲကၠုၚ်တေံတုဲ ဒပ်ကံၚ်ဇြဳပၞာန် ကြဴနူထ္ပက်ကၠုၚ်ကရောၚ်ပၞာန် လ္ပာ်ကွာန်ဝိုၚ်ဒေန်၊ ပါကလာတ်၊ လ္ပာ်ကွာန်(တပ်ဦး) မျာၚ်တာယာ ပွိုၚ်ဍုၚ်ကအ်သံၚ် ဒပ် KTLA ကေုာံ PDF တံ မထိၚ်ဒက်လဝ်ဂှ်တုဲ က္တဵုဒှ်လဝ် ပေါဲဗ္တိုက်ၜါလ္ပာ် ပ္ဍဲကွာန်ဝိုၚ်ဒေန်ရ။
အပ္ဍဲပေါဲဗ္တိုက်ဂှ် ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်တုဲ ညးဍုၚ်ကွာန်ဒေသ နူကွာန်ဝိုၚ်ဒေန်၊ ပါကလာတ်၊ အံၚ်တယာပါလုပ်ကီု ၜိုတ်ကွာန် (၅) ကွာန်ဂှ်ဝွံ ဒးဂြိပ်ဒဴဒၟံၚ် ပ္ဍဲဒဵုဂြိုပ်မကြပ်ကဵု ဍုၚ်သေံတံရ။
အခိၚ်လၟုဟ်ဂှ် ဒပ်ကံၚ်ဇြဳပၞာန် မထ္ပက်ကၠုၚ်ကရောၚ်ပၞာန်ဝွံ ဖျေံလဝ်ဒပ် ပ္ဍဲကွာန်ဝိုၚ်ဒေန်တုဲ ပ္ဍဲဂိတုဖေဖဝ်ဝါရဳ (၂၃) ဗ္တံဂှ်လေဝ် နူကဵုပွိုၚ်ဍုၚ်ဘုတ်ပျေန် ပ္ဍဲကွာန်ယှာန်ကိုဝ်ဂှ် ထပ်ဗပေၚ်လဝ် ဇြဟတ်ဒပ် ဗ္ဒါဲ (၂၀) ရ။
ဒပ်ကံၚ်ဇြဳပၞာန် ဟိုတ်နူထပ်ဗပေၚ်လဝ် ဇြဟတ်ဒပ်တံဂှ်ရ ပေါဲဗ္တိုက်တံ သာသ္ကာတ်မြဟ်ကၠုၚ်မာန်ရောၚ်ဂှ် မုၚ်တိုၚ် ညးဒုၚ်တာလျိုၚ် ဂကောံဒပ်စဵုဒၞါညးဍုၚ်ကွာန် ပွိုၚ်ဍုၚ်ကအ်သံၚ် သ္ဂးလဝ်ရ။
လ္ပာ်သေံ မစုက်ဒၟံၚ်ကဵုကွာန် မက္တဵုဒှ်ဒၟံၚ်ပေါဲဗ္တိုက်တံဂှ်လေဝ် ဒပ်ပၞာန်သေံတံ သၠုၚ်ပ္တိုန်လဝ် ဂကောံဂီုကၠီုတုဲ ကၠောန်သ္ပမၚ်ကျောဝ်ဒၟံၚ်တံရောၚ်ဂှ် မဳဒဳယျာသေံတံ ထ္မံက်ထ္ၜးလဝ်ရ။
အပ္ဍဲပေါဲဗ္တိုက်ဝိုၚ်ဒေန် ပွိုၚ်ဍုၚ်ကအ်သံၚ်ဂှ် လ္ပာ်ကံၚ်ဇြဳပၞာန် (၈) တၠ ချိုတ်တုဲ ဗွဲမဂၠိုၚ်ဂၠေၚ် ကလိဂွံလဝ်ဝပ်တုဲ လ္ပာ်ဂကောံဒပ်ပံၚ်ကောံ PDF တံဂှ် (၂) တၠ ကလိဂွံလဝ်ဝပ်ရ။
ပရိုၚ်−သြၚ်လောန်တိုၚ်(မ်)