နေဗျဳဒဝ်၊ ဖေဖဝ်ဝါရဳ (၂၅)
ဟိုတ်နူပဋိပက္ခပရေၚ်ဍုၚ်ကွာန်တုဲ တၚ်နၚ်ဂၞန်လၟိဟ်မၞိဟ်တံဝွံ သ္ဂောံနွံချိုတ်တ်ပၠိုတ်တ်ဂှ် တၚ်ဍိုန်လျနွံဂှ်ရ သွက်စရၚ်တၚ်နၚ် ဂွံဍာံပြၚ်ဂှ် ကလေၚ်ကံက်စရၚ်လၟိဟ်မၞိဟ်အလုံဍုၚ်ပၠန်ရောၚ်ဂှ် က္ဍိုပ်သ္ကိုပ်ပၞာန် ဟီုရ။
နကဵုကံၚ်ဇြဳပၞာန် အခိၚ်ထပ်ပပဵုလဝ်အာယုက် ကာလကာတၟေၚ် (၆) ဂိတုတုဲဂှ် ပ္ဍဲကောံဓရီု မကၠောန်သ္ပလဝ်အလန်ကိုပ်ကၠာအိုတ် ပ္ဍဲဂိတုဖေဖဝ်ဝါရဳ (၂၃) နကဵုကောန်ဂကောံကံၚ်ဇြဳ မထပ်ကလေၚ်ဒက်လဝ်တၟိတံဂှ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ဟီုဂးလဝ်ရ။
က္ဍိုပ်သ္ကိုပ်ပၞာန်ဂှ် ကံက်လဝ်စရၚ်လၟိဟ်မၞိဟ်လက္ကရဴအိုတ်ဂှ် လအ်အာဗ္ဒါဲစှ်သၞာံယျတုဲ သွက်တၚ်နၚ်ဂမၠိုၚ် ဂွံဍာံပြ နွံပၟိက်ဒးကလေၚ်ကံက် စရၚ်လၟိဟ်မၞိဟ်အလုံဍုၚ်ဂှ်ကီု၊ ကလေၚ်ကံက်မာန်မှဟေၚ် စရၚ်မာဲဒးဏောၚ်ဂှ် သ္ဂးရ။
သ္အာၚ်နူဂှ်ပၠန် အပ္ဍဲပွိုၚ် (၆) ဂိတုကၠုၚ်စိုပ်ဏံ သဳကၠဳချပ်ဂၞန်အာ ကိစ္စပရူပရာ သွက်ဂွံဒးရေၚ်တၠုၚ် လ္ဂောံကဵုပရေၚ်ဍုၚ်ကွာန်၊ ပရေၚ်ပိုန်ဒြပ် ကေုာံ ပရေၚ်မၞိဟ်တံဂှ်တုဲ ဒးဓမံက်ရုပ်ရဴ ဂ္စါန်အာ တၚ်ပ္တဝ်က္ဍိုပ် လၟေၚ်ကမၠောန်ဂတ နူကဵုကံၚ်ဇြဳပၞာန် မလးလဝ်တံ ညံၚ်ဂွံအံၚ်ဇၞးဂှ်ရောၚ်ဂှ်လေဝ် ညးဟီုဂးလဝ်ရ။
ပ္ဍဲကဵုကောံဓရီုဏံဂှ် က္ဍိုပ်သ္ကိုပ်ပၞာန်ဂှ် ဟိုတ်နူပရေၚ်ဗ္တိုက်ပကီုပရာပ် ဂကောံဒုၚ်ယၟု ပဳဒဳအာဖ် ကေုာံ အဳအေအိုဝ် လ္ၚဵုတံဂှ်တုဲ အလုံမွဲကၟိန်ဍုၚ် ပရေၚ်ၜိုဟ်သြိုဟ်ညိၚ်ဝတ်က္ဍိုပ်ကၠံဟွံမွဲဂှ် ဂွံဆဵုကေတ်တုဲ ညံၚ်ပရေၚ်ၜိုဟ်သြိုဟ်ညိၚ်ဝတ်ဂွံနွံ ဒးဆက်ရေၚ်တၠုၚ်အာဂှ် နွံမံၚ်ပၟိက်ဏီရောၚ် ဟီုဂးလဝ်ရ။
သွက်ဂွံညိၚ်ဝတ်ၜိုဟ်သြိုဟ်ဂှ် ပ္ဍဲကဵုပွိုၚ်ဍုၚ်လ္ၚဵုတံဂှ် လလောၚ်ပ္တိတ်လဝ်အမိၚ် ပရေၚ်အုပ်ဓုပ်ပၞာန်တုဲ ကဵုက္ဍိုပ်ရေၚ်တၠုၚ်ဒၟံၚ် ပရေၚ်ညိၚ်ဝတ်တံဂှ်တုဲ လလောၚ်ပ္တိတ်အမိၚ်ပရေၚ်အုပ်ဓုပ်ပၞာန်ဂှ်ဝွံ ကၟာတ်လဒဵုထိၚ်ဒက် ညးဍုၚ်ကွာန်တံ ဟွံသေၚ်ပုဟ်ဂှ် က္ဍိုပ်သ္ကိုပ်ပၞာန် သ္ဂးရ။
ၜိုန်ရထ္ၜးလဝ်ဟိုတ် သွက်ဂွံထိၚ်ဒက် ကုပြဝဂကောံဒစဵုဒစးတံ ဗွဲမစိုပ်တရဴဂှ်ကီုလေဝ် ညးဍုၚ်ကွာန် မၞုံအပ္ဍဲပွိုၚ်ဍုၚ် မဒးဒုၚ်စၟတ်လဝ်ပရေၚ်အုပ်ဓုပ်ပၞာန်တံဂှ် သာတုဲဒးဂဗဒၟံၚ် ဟွံဂီုကၠီုတံကဵု အကြေပ်အဂြတ် ဒဒိုက်ပရေၚ်မၞိဟ်တံရောၚ်ဂှ် ညးဒေသတံ ဟီုလဝ်ကဵု သြၚ်လောန်တိုၚ်(မ်) ရ။
က္ဍိုပ်သ္ကိုပ်ပၞာန်ဂှ် သွက်ဂွံကၠောန်ၜိုတ်ကဵုက္ဍိုပ် ကုပရေၚ်ညိၚ်ဝတ်ၜိုဟ်သြိုဟ်ဂှ် နွံပၟိက်တုဲ ပ္ဍဲကဵုဒေသ မနွံပၟိက် သွက်ပရေၚ်ဂီုကၠီု၊ ပရေၚ်ညိၚ်ဝတ် ကေုာံ ပရေၚ်သၞောဝ်ဥပဒေအုပ်ဓလီုတံဂှ် ကဵုက္ဍိုပ် သွက်ဂွံရေၚ်တၠုၚ်အာဂၠိုၚ်ၚ်ဂှ်လေဝ် ဟီုဗ္ကန်လဝ်ရ။
ပ္ဍဲကောံဓရီုကံၚ်ဇြဳဂီုကၠီုစဵုဒၞါ တုဲကၠုၚ်တေံဂှ် အပ္ဍဲပွိုၚ်ဍုၚ် (၁၃၂) ပွိုၚ်ဍုၚ်ဂှ် ဒဒှ်ရပရေၚ်ညိၚ်ဝတ်ဟွံမွဲဂှ် က္ဍိုပ်သ္ကိုပ်ပၞာန် ဒုၚ်လဝ်ဝန်တုဲ ဒဵုကဵုအခိၚ်လၟုဟ် ပ္ဍဲကဵုပွိုၚ်ဍုၚ် (၄၇) မၞုံတွဵုရး ကေုာံ ရးဒေသ (၈) တံဂှ် သွက်ဂွံရပ်စပ်အမိၚ်ပရေၚ်အုပ်ဓုပ်ပၞာန်တံဂှ် ကံၚ်ဇြဳပၞာန် လလောၚ်ပ္တိတ်လဝ် တၚ်စၞောန် ကုသ္ကိုပ်ရးပၞာန် မဆေၚ်စပ်တံရ။
ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်၊ ပရေၚ်ပၞာန်တံဂှ် အပ္ဍဲပွိုၚ် (၆) ဂိတု ကံၚ်ဇြဳပၞာန် မထပ်ပပဵုပ္တိုန်လဝ်အာယုက်ဂှ် အကြာဒပ်ပၞာန်ကဵု ဂကောံရပ်လွဟ်ကောန်ဍုၚ်အရၚ်တံဂှ် ပၟတ်ပၞာန်အပ္ဍဲဍုၚ် ဂဵုထၞာန်အသိၚ်သၠုၚ်တိုန်ကၠုၚ်မာန်တုဲ ညးဍုၚ်ကွာန်ဒေသတံ သာတုဲသ္ဇက်ဂွံဇီုကပိုက်ကၠုၚ်မာန်တံနွံဂှ် သ္ၚဳဂၠိပ်လဝ်အိုတ်ရ။
ပရိုၚ်−သြၚ်လောန်တိုၚ်(မ်)