ကျာ်ထဝ်၊ ဖေဖဝ်ဝါရဳ (၂၈)
အပ္ဍဲပေါဲဗ္တိုက်ၜါလ္ပာ် မက္တဵုဒှ်လဝ် ဗ္ဒါဲကွာန်ငှာတ်ပျဝ်တဝ်၊ ပွိုၚ်ဍုၚ်ကျာ်ထဝ်၊ တွဵုရးဍုၚ်မန်ဂှ် ကောန်ဂကောံဒပ်ကံၚ်ဇြဳပၞာန် (၂) တၠ ချိုတ်တုဲ (၁) တၠ ကလိဂွံလဝ်ဝပ်ဂှ် ဂွံတီကေတ် နူကဵုဂကောံဒပ်စဵုဒၞါညးဍုၚ်ကွာန်ခရိုၚ်သဓီု (PDF) ရ။
ကရောၚ်ပၞာန်ကံၚ်ဇြဳပၞာန် ဇြဟတ်ဒပ် ဗ္ဒါဲ (၈၀) ဂှ်ဝွံ ပ္ဍဲဂိတုဖေဖဝ်ဝါရဳ (၂၆) တေံ နူကဵုလ္ပာ်ကျာ်ထဝ် ဟိုတ်နူလုပ်စိုပ်ထ္ပက်ကၠုၚ်ကရောၚ်ပၞာန် ပ္ဍဲကွာန်ငှာဝ်ပျဝ်တဝ်တံဂှ်ရ အကြာဒပ်ပံၚ်ကောံ KNLA တံဂှ် က္တဵုဒှ်လဝ် ပေါဲဗ္တိုက်ၜါလ္ပာ်တံရ။
ကြဴနူပေါဲဗ္တိုက်ၜါလ္ပာ်က္တဵုဒှ်တုဲဂှ် ဒပ်ကံၚ်ဇြဳပၞာန်ဝွံ သီုကဵုစံၚ်ပလီုလဝ် ကၠအ်ထၜိုတ်ညးဒေသလ္ၚဵုတံဂှ်တုဲ အကာဲအရာဇီုကပိုက်တံဂှ် ဟွံဂွံတီကေတ်ဏီပုဟ်ဂှ် ညးဒုၚ်တာလျိုၚ် PDF ခရိုၚ်သဓီု ကိုဝ်အေမေန်ထောန် ဟီုရ။
ဆ္ဂး အပ္ဍဲပေါဲဗ္တိုက်ဂှ် လ္ပာ်ဂကောံဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တံ ဇီုကပိုက်ဒး ဟွံမွဲဏီပုဟ်ဂှ် သ္ဂးရ။
ကြဴနူပေါဲဗ္တိုက်တုဲဂှ် ဒပ်ကံၚ်ဇြဳပၞာန်ဝွံ ဒၟါနူလုပ်စိုပ်ဖျေံလဝ်ဒပ် အပ္ဍဲကွာန်ငှာတ်ပျဝ်တဝ်တံဂှ်ရ ပရေၚ်ပၞာန်ၜါလ္ပာ် ကြံၚ်မ္ၚိုဟ်ဒၟံၚ်တုဲ ညးဍုၚ်ကွာန်ဒေသတံလေဝ် ဒးဂြိပ်ဒဴပါဲဒလေတ်ဒၟံၚ်ဂှ် ဂွံတီကေတ်ရ။
အပ္ဍဲပွိုၚ်ဍုၚ်ကျာ်ထဝ် ခရိုၚ်သဓီု ဗော်သွးကောန်ဂကူကရေၚ် KNU တံဂှ် ၜိုန်ရဒပ်ကံၚ်ဇြဳပၞာန် ဟွံဂွံထ္ပက်ကရောၚ်ပၞာန် ၜိုတ်ဗ္ဒါဲ (၅) ဂိတုကီုလေဝ် အခါလၟုဟ်ဂှ် ကလေၚ်ထ္ပက်ကၠုၚ်ကရောၚ်ပၞာန်မွဲဝါပၠန်ရ။
ပရိုၚ်−သြၚ်လောန်တိုၚ်(မ်)