မတ်မလီု၊ ဖေဖဝ်ဝါရဳ (၂၈)
အလုံမွဲကၟိန်ဍုၚ် သွက်ဂွံသှ်လိက် တန်လုပ်တက္ကသိုလ် ကေုာံ တက္ကသိုလ်တံဂှ် ၜိုန်ရစုက်ကၠုၚ်ကီုလေဝ် လ္ပာ်ကံၚ်ဇြဳပၞာန်ဂှ် ဟွံကဵုပၟတ်ဓာတ်လလဳ လၟေၚ်ၚ်ဏီတုဲ ဒၟါနူကဵုပၟတ်ပၠိုတ် အခိၚ်ဗွဲမလအ်လ နွံဒၟံၚ်ဂှ်ရ သွက်ဂွံကၠောန်လိက်ဂှ် ဒးဂဗဒၟံၚ်အခက်ရောၚ် ကွးဘာဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပေါဲသၟာန်သှ်လိက်တက္ကသိုလ်ကဵု တန်လုပ်တက္ကသိုလ် သၞာံဗ္တောန်ပညာသၞာံဏံဂှ် သွက်ဂွံကၠောန်ဗဒှ် နူဂိတုမာတ်ချ် (၈) စဵုကဵု (၂၁) ကၠုၚ်စိုပ်ဏံဂှ် ကံၚ်ဇြဳပၞာန် စဳဇန်လဝ်ရ။
ဆ္ဂး သွက်ဂွံကၠောန်ဗဒှ်ပေါဲသၟာန်သှ်လိက်တံဂှ် နွံမံၚ်မွဲသတ္တာဟဓဝ်ရကီုလေဝ် လ္ပာ်ကံၚ်ဇြဳပၞာန်ဂှ် ဒၟါနူဟွံကဵုဒၟံၚ်ပၟတ်လၟေၚ်ၚ်ဂှ်ရ ကွးဘာဂမၠိုၚ် သွက်ဂွံကၠောန်လိက်ဂှ် ဒးဂဗဒၟံၚ်အခက်တံရ။
သၟတ်ဗြဴကွးဘာမွဲတၠဂှ် ဒၟါနူကဵုပၟတ် ပိုတ်ပၠိုတ်ဂၠိုၚ်ဒၟံၚ်ဂှ်ရ သွက်ဂွံသှ်လိက်ဂှ် ကၠောန်လိက်ဟွံဂွံတုဲ ဒၟါနူဒးကၠောန်ဒၟံၚ်ကဵု ပၟတ်ပၞာၚ်တံဂှ်ရ လိက်ဂှ်ဟွံတုဲ ဗီုကၠာတေံရတုဲ သွက်ဂွံသှ်လိက်ရဂှ် အခက်အခုဲနွံကၠုၚ်ရောၚ် သ္ဂးရ။
“ပၟတ်လၟုဟ်ဂှ် စုက်ကဵုသှ်လိက်မှ သာပၠိုတ်ကၠုၚ်တုဲ အခက်အခုဲဂှ်တှ်ေ နွံ။ ဍေံဂှ် ပၠိုတ်ဒၟံၚ် အခိၚ်ဗ္တံတံ၊ အခိၚ်နူဂယးတံ သာ်ဏံတုဲတှ်ေ ဒှ်ဒၟံၚ်အခိၚ်ကၠောန်လိက်လေဝ်။ အခိၚ်ကၠောန်လိက်ဂှ် ပၟတ်ပၠိုတ်တုဲ ကၠောန်လိက်ဟွံဂွံရပုဟ်။ လၟုဟ်မ္ဂး ဂွံကၠောန်လိက်ဂှ်ဟီုတှ်ေ ဒးကၠောန်ကဵုပၟတ်ပၞာၚ်တုဲ ဒးသ္ပအရီုဂၠိုၚ်ရ။ ကၠာတေံ ဒၞါဲလိက်တုဲ (၃) ပိုဒ်၊ (၄) ပိုဒ်ဂှ် သွက်ဂွံတုဲ (၁) ပိုဒ်ရဂှ် ဒှ်အာတၟာလှ်ေရ။ အတိုၚ်ဏံမ္ဂး ခက်ကၠုၚ် စဵုကဵုသ္ဂောံသှ်လိက်ဏောၚ်ဂှ် ထေၚ်ရ။ အပ္ဍဲပေါဲသၟာန်သှ်လိက်ဂှ် ပၟတ်ဂှ် ဒးကဵုလၟေၚ်ၚ်ထေက်ရ” သာ်ဝွံ သ္ဂးရ။
သ္အာၚ်နူဂှ်ပၠန် အပ္ဍဲအခိၚ်သှ်လိက်တံဂှ် ဒၟါနူဟွံဂွံပၟတ်ဓာတ်လလဳ လၟေၚ်ၚ်ဂှ်ရ ကွးဘာဂမၠိုၚ်ဝွံ စွံအဓိကကဵု ပၟတ်ပၠုပ်ဇြဟတ်တံကဵု ပၟတ်ပၞာၚ်တံသၟးတုဲ ဒးကၠောန်ဒၟံၚ်လိက်တုဲ ဒးသ္ပအာရီုဂှ်ရ မတ် ကေုာံ လတေၚ်အာရီု ဇီုကပိုက်တံနွံဂှ် ဂွံတီကေတ်ရ။
အ္စာၝောံဗ္တောန်လိက် နူကဵုဘာဗ္တောန်လိက် ပုဂ္ဂလိကမွဲတၠဂှ်လေဝ် ကံၚ်ဇြဳပၞာန် ဟွံကဵုပၟတ်ဓာတ်လလဳ လၟေၚ်ၚ်မွဲသာ် အခိၚ်မိက်ဂွံကဵုဂှ် ကဵုဒၟံၚ်တုဲ သွက်ကွးဘာဂမၠိုၚ် အခက်အခုဲနွံတုဲ စိုတ်လုပ်စ ပ္ဍဲကဵုလိက်လေဝ် အောန်ကၠုၚ်တုဲ ပေါဲသၟာန်သှ်လိက်ဂှ်စုက်ကၠုၚ်ခ္ဍၚ် သ္ဇက်ဒးစိုတ်လီုတံလေဝ်ဂၠိုၚ်ခ္ဍၚ် ဒးဒှ်ဒၟံၚ်ဂှ် ဟီုရ။
“အခိၚ်ပၟတ်ကၠုၚ်ဂှ်ဟွံမှာန်၊ ခံက်အၚ်ဍေံတံဂှ်လေဝ် ကဵုလဝ် stable ဂှ် ဟွံမွဲပုဟ်။ မိက်ဂွံပၠိုတ်တှ်ေပၠိုတ်၊ မိက်ဂွံကၠုၚ်တှ်ေကၠုၚ်မ္ဂးတှ်ေ အခက်အခုဲနွံရ။ နူစဂှ် ဍေံတံ ကဵုလဝ်နကဵုအလန်ဂှ် (၂) တ္ၚဲရဏောၚ်၊ လၟုဟ်ဂှ် ပဵုတိုန်မွဲတ္ၚဲ။ အခိၚ်ပယျာံဂယးပြဟ်ဟ်တံ ပိုတ်၊ အခိၚ်လဒေါဝ်တ္ၚဲလေဝ် မိက်ဂွံကၠုၚ်တှ်ေကၠုၚ်ဏောၚ် ဟွံမိက်ကၠုၚ်တှ်ေ ဟွံကၠုၚ်ပုဟ်။ အခိၚ်ဗ္တံပၠန်ဂှ်လေဝ် ဟွံပြေပြံၚ်ပုဟ်။ ကောန်ၚာ်တံဂှ် အခိၚ်တ္ၚဲ အာဒၟံၚ်ကျူယှေန်တံမုတံတုဲ အခိၚ်ဗ္တံဂှ်တှ်ေ ဟွံပြေပြံၚ်ပုဟ်လေဝ်။ ဗှ်တိုန်လိက်လၟေၚ်ၚ်ဟီုတှ်ေ ဟွံပြေပြံၚ်ပုဟ်။ အဓိကဂှ်တှ်ေ ဒမြိပ်ဗှ်လိက် စှ်ေကၠုၚ်လဝ်ရ။ ဒးဟီုမ္ဂး ကောန်ၚာ်ဂမၠိုၚ်ဂှ် သွက်ဂွံသှ်လိက်ရဂှ် ဒှ်အာညံၚ်ကဵုစိုတ်ဟွံမိက်ပါစအိုတ်ရ။ ပၟတ်ဂှ် ဒှ်ကၠုၚ်မှာန်န်ဟွံမာန်ဂှ်ရ စုက်ကဵုသှ်လိက်ခ္ဍၚ် အရာစိုတ်ဒးလီုတံဂၠိုၚ်ကၠုၚ်ခ္ဍၚ်ဂှ် ဒှ်အာရ” သာ်ဝွံ သ္ဂးရ။
ကဝ်ပဝ်ရေယှေန် ပါ်ပရအ်ဇြဟတ်ဓာတ်လလဳလ္ဂုၚ် သၟဝ်တဲကံၚ်ဇြဳပၞာန်ဂှ် ဟိုတ်နူကဵုပေါဲသှာန်သှ်လိက် တန်လုပ်တက္ကသိုလ်တံနွံဒၟံၚ်ဂှ်ရ ကၠုၚ်စိုပ်နူဂိတုမာတ် (၁) စဵုကဵု (၂၀) ဂှ် ကွးဘာဂမၠိုၚ် သွက်ဂွံရံၚ်လိက် အခိၚ်ဗ္တံမာန်ဂှ် ရေၚ်တၠုၚ်ဒၟံၚ် သွက်ဂွံသၠုၚ်ပ္တိုန်တြးကဵုဇြဟတ်ဓာတ်တံရောၚ်ဂှ် သ္ဂးလဝ်ရ။
ဟိုတ်ဂှ်ရ အခိၚ်ကွးဘာဂမၠိုၚ် ရံၚ်လိက်အခိၚ်ဗ္တံဂှ် ယဝ်ရဇြဟတ်ဓာတ် မပ္တိတ်တေံကဵု ဇြဟတ်ဓာတ် ရပ်စပ်ဂှ် ဟွံသၟဟ်မ္ဂး ဇြဟတ်ဓာတ် ပိုတ်ပၠိုတ်မာန်ဂှ်ရ နကဵုကမၠောန်ပရေၚ်ပိုန်ဒြပ်ဂမၠိုၚ် အပ္ဍဲကာလဏံ နူဇိုၚ်သဝ်တ္ၚဲ (၅) နာဍဳ စဵုကဵု (၁၀) နာဍဳ ညံၚ်ဂွိုအ်ရပ်စပ်ပၟတ်ဓာတ်လလဳဂှ် လလောၚ်ပ္တိတ်လဝ်ရ။
အပ္ဍဲအခိၚ်သၞောတ်ဗ္ၜတ်လဝ်ဂှ် ယဝ်ရစၟဳစၟတ်ဂွံဆဵုကေတ် ရေၚ်တၠုၚ်ဒၟံၚ်ကမၠောန် နကဵုဇြဟတ်ဓာတ်တံဂှ်မ္ဂး ကေတ်ဒုဟ်ရေၚ်တၠုၚ်အာ အတိုၚ်သၞောဝ်ရောၚ်ဂှ် ကဝ်ပဝ်ရေယှေန် ပါ်ပရအ်ဇြဟတ်ဓာတ်လ္ဂုၚ် လလောၚ်တြးလဝ်ရ။
ပေါဲသၟာန်သှ်လိက် တန်လုပ်တက္ကသိုလ် ကံၚ်ဇြဳပၞာန်ဂှ် စဳဇန်လဝ် သွက်ဂွံကၠောန်ဗဒှ်အာ နူဂိတုမာတ် (၈) စဵုကဵု (၁၈) တုဲ ပေါဲသၟာန်သှ်လိက် တက္ကသိုလ်နာနာတံဂှ် ကၠောန်ဗဒှ်အာ နူဂိတုမာတ် (၉) စဵုကဵု (၂၁) ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)