ဍာ်ဗု၊ ဂျူလာၚ် (၃၁)
ကွာန်ဨကနိ ကေုာံ ကွာန်ခမံက်ချံၚ်၊ ပွိုၚ်ဍုၚ်ဍာ်ဗု၊ ရးဒေသဇၞော်တၞၚ်သဳဂှ် ဒပ်ကံၚ်ဇြဳပၞာန် မထ္ပက်ကၠုၚ်ကရောၚ်ပၞာန် ပ္ဍဲဂိတုဂျူလာၚ် (၃၀) ပယျာံဂယးပြဟ်ဂှ် ရပ်ဒက်ဏာလဝ် ညးဒေသ (၁၀) တၠပြၚ်ရဂှ် ပရိုၚ်တမ်ရိုဟ် အပ္ဍဲဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုဂျူလာၚ် (၃၁) အခိၚ်နူဂယး ၜိုတ် (၄) နာဍဳဂှ် ဇြဟတ်ဒပ်ကံၚ်ဇြဳပၞာန် ဗၞတ် (၈၀) ဝွံ လုပ်စိုပ်ပကီုပရာပ် အပ္ဍဲကွာန်ဨကနိ ကဵု ကွာန်ခမံက်ချံၚ်တံတုဲ ပန်ပှော်လဝ်ရ။
သ္အာၚ်နူဂှ်ပၠန် ဒပ်ကံၚ်ဇြဳပၞာန် ရပ်ဒက်လဝ် ညးဒေသ (၁၀) တၠပြၚ်ဂှ်တုဲ ဂၠိုက်ဂၠါဲဗ္တးဗ္တန် သ္ၚိဒၟံၚ်တံတုဲ ကေတ်ဏာလဝ် ကပေါတ်မၞုံကဵု ၚုဟ်မးတံကဵု ကွဳလိုန်ဓာတ်တံရဂှ် ညးဒေသတံ သ္ဂးရ။
ဒပ်ကံၚ်ဇြဳပၞာန်တံ ပကီုပရာပ်လုပ်စိုပ်ကၠုၚ် အပ္ဍဲကွာန်သာ်ဏံဂှ်ရ ညးဒေသနူကဵု ကွာန်ဨကနိ၊ ကွာန်ခမံက်ချံၚ် ကေုာံ ကွာန်ဗဒါဲဗဒါဲတံဝွံ ထောံလသာသ္ၚိဌာန်တုဲ ဒးဂြိပ်ဒဴပါဲဒလေတ်ဒၟံၚ်အိုတ်ရ။
တုဲကၠုၚ် ဂိတုဂျူလာၚ် (၂၉) ဂှ် ပ္ဍဲဗ္ဒါဲကွာန်နှာန်ကျေဝ် (နှမ်းကြဲ) ၊ ပွိုၚ်ဍုၚ်ဍာ်ဗုဂှ် ကုကရောၚ်ကွဳစက်ကံၚ်ဇြဳပၞာန် (၅) ဖ္ဍိုက်ပါဗက်ဂှ် နူကဵုဂကောံဒပ်စဵုဒၞါညးဍုၚ်ကွာန် ပွိုၚ်ဍုၚ်ဍာ်ဗုတံ ဗ္တိုဟ်မာၚ် ဗ္တိုက်လဝ်တုဲ ထ္ပက်ကၠုၚ်ကရောၚ်ပၞာန် သာ်ဏံရ။
ဟိုတ်ဒၟါနူ ပရေၚ်ဗ္တိုက်ဏံတုဲ ကွဳစက်ကံၚ်ဇြဳပၞာန်လ္ၚဵုတံ ဇီုကပိုက်လီုလာ်အာလဝ်တုဲ ကောန်ဒပ်လ္ၚဵုတံလေဝ် ဂွံလဝ်ဝပ်ရောၚ်ဂှ် ဂကောံဒပ်စဵုဒၞါညးဍုၚ်ကွာန်ဍာ်ဗု သ္ဂးရ။
ပရိုၚ်−သြၚ်လောန်တိုၚ်(မ်)
See translation