ပေကျေန်၊ ဂျူလာၚ် (၃၁)
သမ္မတအမေရိကာန် ဂျဵုဗိုၚ်ဒေန် ကဵု သမ္မတကြုက် ယှဳကျေန်ဖျေန်တံ ပ္ဍဲကဵုဟီုဂးဆက်စၠောံ ပ္ဍဲဖုၚ်မွဲဂှ် စပ်ကဵုပရေၚ်ထိုၚ်ဝါန်တုဲ နကဵုအမေရိကာန် ညံၚ်ဂွိုအ်ဝေၚ်ကဵုပၟတ်ဂှ် ကဵုလဝ်သတိတုဲ သွက်ဂွံဖန်ဇန် ကောံဓရီုကဆံၚ်လ္တူ ဆဵုညာတ်ညးသ္ကအ် အလဵုမၞိဟ် ကိုပ်ကၠာအိုတ်ဂှ် တုပ်လဝ်စိုတ် ပ္ဍဲဂိတုဂျူလာၚ် (၂၈) တေံရ။
သွက်ဂွံဆဵုဂဗဂှ် လလောၚ်ပ္တိတ်လဝ် အခိၚ် ကေုာံ ဒၞါဲ ဗွဲလစှ်ေဟွံမွဲကီုလေဝ် နကဵုဂကောံမဆက်စပ်တံ သွက်ဂွံပ္ညဳပ္ညပ်အခိၚ် ၜါလ္ပာ်မသၟဟ်စိုတ်ဂှ် ဂွံလဝ်တၚ်တုပ်စိုတ်ရဂှ် သၞာဲဒဴအမေရိကာန် ဟွံမိက်ထ္မံက်ယၟုမွဲတၠ ဟီုဂးလဝ်ရ။
သမ္မတယှဳဂှ် စပ်ကဵုမူဝါဒ အမေရိကာန် လ္တူထိုၚ်ဝါန် မဒှ်ဂကောံတ္ကအ် ဒဳမဝ်ကရေဇြဳ မၞုံစုက်လုက်ကဵု အမေရိကာန်တံဂှ်တုဲ ဟီုဂးလဝ် မအရေဝ်လစွံစိုတ် ကြံၚ်ၚ်မ္ၚိုဟ်ဟ်တံရဂှ် ပရိုၚ်အေဂျေန်ဇြဳ ကၟိန်ဍုၚ်ကြုက်ပိုၚ် ဇြေန်ဟွာ ထ္မံက်ထ္ၜးလဝ်ရ။
“ညးမဝေၚ်ကဵုပၟတ်တံဝွံ အိုတ်ကၞောတ် ဒးတူပၟတ်ပၠန်ရ၊ ဣဏံဂှ် လ္ပာ်အမေရိကာန် ကၠိုဟ်ကေတ် ဍိုက်က်ပေၚ်ၚ်ရောၚ်ဂှ် စၟဳကေတ်ရ” သာ်ဝွံ သမ္မတယှဳ အတိုၚ်ညးတံမဟီုဂးလဝ် ပ္ဍဲဂိတုနဝ်ဝေမ်ဗာတေံ အရေဝ်စၞောန် ညးမစကာလဝ်ဂှ် ထပ်ဟီုဂးလဝ် ထပ်ကဵုထပ်ရ။
အစဳဇန် မဟာမိတ်သမ္မတအမေရိကာန် ဗိုၚ်ဒေန် ကဵု ဥက္ကဌကၠတ်ထဝ်သၟဝ်အမေရိကာန် နာန်သဳပဳလိုဝ်သဳ မသ္ပဒတန်ဟွံမာန်ဏီတံဂှ် သၟိၚ်တၠအဝဵုကြုက်တံ ခၠေဝ်ပလန်လဝ် နကဵုဒေါသ မသ္ကာတ်မြဟ်ရ။
ၜိုန်ရသၞာဲဒဴအမေရိကာန်တံ ကၠုၚ်စိုပ်ဂေတ်ဝေၚ်ဒၟံၚ် တ္ကအ်ထိုၚ်ဝါန် မွဲဏှမွဲဏှကီုလေဝ် လၟေၚ်တရဴပဳလိုဝ်သဳဏံဝွံ အလဵုအသဳကြုက် ဒုၚ်ဂိုၚ်ကေတ်ဒၟံၚ် နဒဒှ်မခ္ဍဟ်ခ္ဍာဲ ဇၞော်ကဵုဇြဟတ်မွဲရောၚ်။
“သွက်ဂွံမၚ်မွဲစဵုဒၞါ အဝဵုအပိုၚ်အခြာကၟိန်ဍုၚ်ကြုက် ကေုာံ တိဍာ်ကြုက်မပိုၚ်ပြဳလဝ်တံ ဗိုန်န်ဗတ်တ်ဂှ် ဒှ်ဆန္ဒမဗိုန်ဇၟံ ဂကူကြုက် (၁.၄) ဗဳလျာန်ပြၚ်တံရ” ဂှ် သမ္မတယှဳ ဟီုဂးလဝ်ရ။
သ္အာၚ်နူဂှ်ပၠန် စပ်ကဵုပရေၚ်ထိုၚ်ဝါန်တုဲ တၚ်ဒတူလိုၚ် အလဵုအသဳကြုက် ကဵု ညးဍုၚ်ကွာန်တံဝွံ ဒှ်မွဲပလိုဟ်ဓဝ်ရဂှ် ဟီုဂးလဝ်ဏီရ။
ၜိုန်ရအမေရိကာန် သ္ပစၟတ်သမ္တီ အဝဵုအပိုၚ်အခြာကြုက်ကီုလေဝ် အကာဲအရာထိုၚ်ဝါန်လၟုဟ်ဂှ် ကဵုဖျုန်အဓိကတုဲ သွက်ဂွံပြံၚ်လှာဲ ဟွံမွဲပုဟ်ဂှ် သမ္မတဗိုၚ်ဒေန် ဟီုဂးလဝ်ရ။
ပရေၚ်ဂိုတ်ဂ္စါန်ပ္တိတ်ဇြဟတ်ကြုက် မွဲလ္ပာ်ဓဝ် မသ္ကဵုဇီုကပိုက်ကၠေံ ပရေၚ်ၜိုဟ်လလမ်၊ ပရေၚ်ညိၚ်ဝတ် မွဲဒမြိပ်ကလိုဟ်ၜဳထိုၚ်ဝါန်ဂှ် အမေရိကာန် ဒစဵုဒစးဟီုဗျိ သ္ကာတ်တ်မြဟ်ဟ်ရောၚ်ဂှ် သ္ၚိဗုလလောၚ်ပ္တိတ်လဝ်ရ။
Ref: CNA