နေပျဳတဝ်၊ မာတ်ချ်(၁)
ဗော်ပရေၚ်ဍုၚ်ကွာန် ပတိုန်လဝ်စရၚ်ဒက်ပ္တန်ဗော် ကေုာံအခေါၚ်စၟတ်သမ္တီ ဇရေၚ်ကဝ်မယှေန်ပေါဲရုဲမာဲကၟိန်ဍုၚ်ကံၚ်ဇြဳပၞာန် နွံကၠုၚ် စဵုကဵု (၁၃) ဗော်တုဲ ဗော်ပရေၚ်ဍုၚ်ကွာန် စန္ဒက်အလုံမွဲကၟိန်ဍုၚ် နွံ(၅)ဗော်ရဂှ် ကံၚ်ဇြဳပၞာန်လလောၚ်တြးလဝ် ပ္ဍဲလိက်ပရိုၚ်တြးဝါဒရ။
ဗော်စန္ဒက်ပ္ဍဲရးဒေသဇၞော်မွဲ ဟွံသေၚ်မ္ဂး ပ္ဍဲတွဵုရးမွဲဟေၚ်ဂှ် နွံ(၈)ဗော်တုဲ အခေါၚ်ဒက်ပ္တန် ကေုာံပရေၚ်သ္ပဒ္တန်အခေါၚ်စၟတ်သမ္တီ ဗော်ဂှ် ကဝ်မယှေန်ပေါဲရုဲမာဲကၟိန်ဍုၚ် သ္ၚိဳဂၠိပ်စၟဳစၟတ်ရေၚ်တၠုၚ်ဒၟံၚ်ရဂှ် ဟီုသ္ဂးလဝ်ရ။
ယၟုဗော်စန္ဒက်အလုံကၟိန်ဍုၚ် (၅)ဗော်တအ်ဂှ် ၜိုန်ရကံၚ်ဇြဳပၞာန် လလောၚ်တြးလဝ် ဟၟဲဏီကီုလေဝ် ဗော်ကျာန်ခိုၚ်ယျေ ဗော်ပရေၚ်ဍုၚ်ကွာန် ဒပ်ပၞာန်ထံက်ကဵုဒၟံၚ်လကြဴ (USDP) ကေုာံ ဗော်ညဳသၟဟ်ကောန်ဍုၚ်အရၚ်တအ်ဂှ် ပံက်လဝ်ရုၚ် ပ္ဍဲပွိုၚ်ဍုၚ် မၞုံပ္ဍဲကၟိန်ဍုၚ်ဗွဲမဂၠိုၚ်ရ ။
ပ္ဍဲကဵုသၞောဝ်ဥပဒေ ပတိုန်စရၚ်စၟတ်သမ္တီဗော်ပရေၚ်ဍုၚ်ကွာန်ကံၚ်ဇြဳပၞာန်ဂှ်မ္ဂး ယဝ်ရဒှ်ဗော်ပရေၚ်ဍုၚ်ကွာန်စန္ဒက်အလုံမွဲကၟိန်ဍုၚ်မ္ဂး နူကဵုတ္ၚဲ ပတိုန်စရၚ်စၟတ်သမ္တီတုဲ ပ္ဍဲအခိၚ် ပွိုၚ်(၉၀)တ္ၚဲ လၟိဟ်ကောန်ဗော် အောန်အိုတ်ဒးနွံ (၁၀၀,၀၀၀)တၠကီု သြန်ဂအုမ်ဗော် ဒးနွံ (၁၀၀၀) ကိုတ်ရောၚ်ဂှ် ပျးဌာန်လဝ်ရ။
ယဝ်ဒှ်ဗော် စန္ဒက်ပ္ဍဲရးဒေသဇၞော် ဟွံသေၚ်မ္ဂး ပ္ဍဲတွဵုရးမွဲမွဲမ္ဂး လၟိဟ်ကောန်ဗော်အောန်အိုတ် (၁၀၀၀)တၠ ဒးနွံတုဲ သြန်ဂအုမ်ဗော် (၁၀၀) ကိုတ်ဂှ် ဒးပံက်စွံလဝ် ပ္ဍဲလိက်အုပ်တိုက်သြန် မျာန်မဇြဳပွာယျေ မွဲမွဲဒၞာဲတုဲ ဒးနွံကဵုသက်သဳသာဓကရောၚ်ဂှ် သ္ဂးလဝ်နွံရ။
ပ္ဍဲဗော်ပတိုန်လဝ်စရၚ် အခေါၚ်ဒက်ပ္တန်ဗော် ကေုာံအခေါၚ်ပ္တိုန်စၟတ်သမ္တီဗော်တအ်ဂှ် ဗော်ကျခိုၚ်ယျေ (USDP) ဗော်ဖေတ်ဒရေဝ်ဒဳမဝ်ကရေတ်တေတ်၊ ဗော်ဒဳမဝ်ကရေဇြဳကၟိန်ဍုၚ်၊ ဗော်ဒဳမဝ်ကရေတ်တေတ်ညးဍုၚ်ကွာန်ဗၟာ(MPD) ဗော်ဂကောံဇြဟတ်ဒဳမိုဝ်ကရေတ်တေတ်၊ ဗော်ကွးဘာပတုဲဖိုလ်ညးဍုၚ်ကွာန် ကေုာံဗော်ဒဳမဝ်ကရေဇြဳကောန်ဂကူတၟိတအ် မဒှ်ရ။
သ္အာၚ်နူဂှ်ပၠန် ဗော်ကောန်ဂကူပအိုဝ်(PNO)၊ ဗော်ဒဳမဝ်ကရေဇြဳတၟိ(ကချေၚ်)၊ ဗော်ဒဳမဝ်ကရေဇြဳဖလုမ်သဝဝ်၊ ဗော်က္ဍိုက်က္ဍိုပ်ကောန်ဂကူရခေၚ် ကေုာံဗော်ညဳသၟဟ်ကောန်ဍုၚ်အရၚ် မဒှ်ဗော်ပရေၚ်ဍုၚ်ကွာန် ကောန်ဍုၚ်အရၚ်တအ်လေဝ် ပါလုပ်ဒၟံၚ်ရ။
ပရိုၚ်-သြၚ်လောန်တိုၚ်(မ်)