ယျေသဂျိုဝ် -မာတ်ချ်(၁)
ပ္ဍဲရးဒေသဇၞော်မဂွေ ပွိုၚ်ဍုၚ်ယျေသဂျိုဝ်ဂှ် ပန်ပသောၚ်သ္အးလဝ် ပျူသဝ်ထဳ(၅)တၠရဂှ် က္ဍိုပ်သ္ကိုပ်ဂကောံ Myingyan Black Tiger ဗိုလ်မိုက်ခေဝ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲဂိတုဖေဖဝ်ဝါရဳ စၟတ်တ္ၚဲ (၂၇) တုဲကၠုၚ်တေံဂှ် ဒှ်မၞိဟ် ပံၚ်ကဵုဒပ်ကံၚ်ဇြဳပၞာန်တုဲ သွက်ဂွံဖျေံသ္ဇိုၚ်ဗ္ဒပ် ပ္ဍဲကဵုကွာန်ဂေါတ်ဂျဳ၊ ဂကောံကွာန်အဠေဝ်တောၚ်အဓိကရဂှ် သ္ဂးလဝ်ရ။
“လ္ပာ်ဂှ်တှ်ေ ကွာန်ပျူသဝ်ထဳတအ်ရ။ ပျူသဝ်ထဳ သီုကွာန်ရ။ ညးမွဲလေဝ် ဟွံဂံၚ်ပသောၚ်ပုဟ်။ သွက်ဒပ်ပၞာန်ဂွံဖျေံဗ္ဒပ် ပ္ဍဲကွာန်ဍေံတအ်ဂှ် ပတိုန်လဝ်လိက်၊ အကြာလပါ်ဂိတုဏံတှ်ေ ပျူဍေံတအ်ကဵု ဒပ်ပၞာန်ပံၚ်တောဲတုဲ သွက်ဂွံဖျေံဗ္ဒပ်ရ။ ဒၟာနူဂှ်ရ ဒးအာပသောၚ်လဝ် ဍေံတအ်ရ” ဂှ် ဗိုလ်မိုက်ခေဝ် ဟီုသ္ဂးလဝ်ရ။
အခိၚ်အာစိုပ်ပသောၚ်သ္အးလဝ် ပျူသဝ်ထဳ သၟဝ်တဲကံၚ်ဇြဳပၞာန်တအ်ဂှ် ဂွံနၚ်လဝ်တၚ်ဂၞၚ်ဍေံတအ်ဂေတ်ကၚ်ကီု၊ စရၚ်ပျူသဝ်ထဳ ကေုာံ တၞးလိက်ကသုက် တိကၠအ်ညးဍုၚ်ကွာန်ပိုၚ်ပြဳ သီကေတ်လဝ်တအ်ရဂှ် ညးဟီုသ္ဂးလဝ်ရ။
ဂိတုဖေဖဝ်ဝါရဳ စၟတ်တ္ၚဲ(၂၆)ဂှ်လေဝ် ၜိုန်ရအာပန်ပှော်လဝ် ကောန်ဒပ်ကံၚ်ဇြဳပၞာန်ဖျေံလဝ်ဗ္ဒပ် ပ္ဍဲရုၚ်တိုက်သြန် ဍုၚ်ယျေသဂျိုဝ်တအ်ဂှ် နကဵုလွဟ်ဇၞော်ကီုလေဝ် အကာဲအရာဇီုကပိုက်ချိုတ်ဂျိုၚ် သ္ပဒ္တန်ဟွံမာန်ဏီရဂှ် ဂကောံ Myingyan Black Tiger ဟီုသ္ဂးလဝ်ရ။
သ္အာၚ်နူဂှ်ပၠန် ပ္ဍဲဂိတုဖေဖဝ်ဝါရဳ စၟတ်တ္ၚဲ (၂၁)ဂှ်လေဝ် ပန်ပှော်လဝ် ကောန်ဒပ်ကံၚ်ဇြဳပၞာန် ဖျေံလဝ်ဗ္ဒပ် ပ္ဍဲအရာပ်ဇြဳပေန်တာယျာ ယျေသဂျိုဝ် စၟတ်(၂)ဂှ် နကဵုလံၚ်ချာတ္ၚိန်ပၞး ပန်ဌာန်ဇမ္ၚောဲဂှ်ရ ဟွံအောန်နူ(၃)တၠ ဒးဇီုကပိုက် ဂွံလဝ်ဘဲဝပ်ရ။
ဂိတုဖေဖဝ်ဝါရဳ တုဲကၠုၚ် စၟတ်တ္ၚဲ (၁၃)ဂှ်လေဝ် ဒပ်ပံၚ်ကောံ ပါလုပ်သီု MBT တအ် လုပ်ဗတိုက်လဝ် ဗ္ဒပ်ညုၚ်ချာန်ဇြာနဳ ပွိုၚ်ဍုၚ်ယျေသဂျိုဝ်တုဲ လပါ်ကံၚ်ဇြဳပၞာန် ဟွံအောန်နူ (၁၅)တၠ ချိုတ်အာလဝ်ရဂှ် ဂကောံဒပ်စဵုဒၞာတအ် ဟီုသ္ဂးလဝ်ရ။
ပရိုၚ်-သြၚ်လောန်တိုၚ်(မ်)