ဟံၚ်ဂံၚ်၊ မာတ်ချ် (၁)
ပ္ဍဲဟံၚ်ဂံၚ် ကြဴနူစၟတ်ထောံ စေဝ်ပၞောန်ကဝ်ဝေဒ်မတေၚ်ဂြတ် လလအ်ပွိုၚ်ပိသၞာံတုဲဂှ် အခိၚ်လၟုဟ် ကလေၚ်ဖအောန်ဖျေံလဝ် နဒဒှ်ဗီုပြၚ်ဘဝမၞိဟ်ဓမ္မတာယျ မဒှ်ရ။
တၚ်သၞောတ်ဗ္ၜတ် မ္ဒးစုတ်ယာတ်ကၟာတ်မုဟ်ပါၚ်ဂှ် ပ္ဍဲဂိတုမာတ်ချ် (၁) ဏံ စဖအောန်ဖျေံကဵုလဝ်တုဲ ကၠောန်သ္ပကလေၚ်ဘိက်ဒၟံၚ် ကၟုဲထဳတံကဵု သၟာပရေၚ်ဍုၚ်ကွာန်တံယျဂှ် ဇၞော်သ္ကိုပ်အလဵုအသဳဟံၚ်ဂံၚ် ဟီုဂးလဝ်ရ။
ပ္ဍဲကဵုဒေသပရေၚ်အုပ်ဓုပ်ဗွဲတၟေၚ်ဟံၚ်ဂံၚ် မဖျေံစၟတ်လဝ်စေဝ်ပၞောန် မ္ဒးစုတ်ဒၟံၚ်ယာတ်ကၟာတ်မုဟ်ပါၚ်ဖိုဟ်ဂှ် အစဳဇန်ဏံဝွံ ပ္ဍဲဂိတုမာတ်ချ် (၁) ဏံ လမျီုစလုပ်အာရောၚ်ဂှ် ဇၞော်သ္ကိုပ်ဟံၚ်ဂံၚ် လဳ ဟီုဂးလဝ် ပ္ဍဲပေါဲသောၚ်ကလးလိက်ပရိုၚ်ရ။
ဟံၚ်ဂံၚ် ကေုာံ မာကာအဵု သီုၜါဍုၚ်ဂှ်ဝွံ အပ္ဍဲပိသၞာံလောန်ကၠုၚ်တေံဂှ် ဒ္ဂေတ်ဗက်ကၠုၚ်လဝ် မူဝါဒကဝ်ဝေဒ်ဇြဳရိုဝ် ဍုၚ်ကြုက်ရ။ စနူသၞာံ ၂၀၂၀ တုဲ ဟံၚ်ဂံၚ် မစၞောန်ပျးလဝ် သွက်ဂွံစုတ်ယာတ်ကၟာတ်မုဟ်ပါၚ်ဂှ်ဝွံ စေဝ်ပၞောန်ကဝ်ဝေဒ် မတေၚ်ဂြတ်တံဂှ် ပ္ဍဲသၞာံတုဲကၠုၚ်တေံ စဖအောန်ဖျေံလဝ်ရ။
“သွက်ဂွံဖျေံ တၚ်သ္ဂုတ်သွာတ်ဏံဂှ် ဒှ်အခိၚ်ခိုဟ်အိုတ်ရောၚ် အဲဒုၚ်ဂိုၚ်ကေတ်ရ။ ဒှ်ဂလာန်ဗ္ကန် ပိုတ်တ်သ္ကုတ်တ် ထ္ၜးပျးစ ဒဒှ်ရဟံၚ်ဂံၚ် ကလေၚ်ဒှ်ဒၟံၚ်သၞောတ်တြေံယျဂှ်ရောၚ်” သာ်ဝွံ လဳ ဟီုလဝ်ရ။
ဆ္ဂး ပ္ဍဲကဵုဒၞါဲမဒှ်အန္တရာယ်မာန် ညံၚ်ရဴရုၚ်ဂဥုဲတံဂှ် တၚ်သၞောတ်ဗ္ၜတ် ညးယိုက်ဝန် ကေုာံ ကၟုဲထဳဂမၠိုၚ် သွက်သ္ဂောံစုတ်ယာတ်ကၟာတ်မုဟ်ပါၚ်ဂှ် သၟိၚ်တၠပရေၚ်အုပ်ဓုပ် မဆေၚ်စပ်တံ သ္ဂုတ်သွာတ်မာန်ရောၚ်ဂှ် သ္ဂးရ။
ပ္ဍဲဒေသပရေၚ်အုပ်ဓုပ်ဗွဲတၟေၚ် မာကာအဵု ဍုၚ်ဇိုၚ်ဝုတ်ဒိုဟ်ဂှ် ပါဲနူကဵုရုၚ်ဂဥုဲ၊ ဒၞါဲပရေၚ်ပလံၚ်ဗစိုပ်ညးဍုၚ်ကွာန်ဂမၠိုၚ် ကေုာံ ဒၞါဲလ္ၚဵုလ္ၚဵုတံဂှ်တုဲ သွက်ဒၞါဲဗွဲမဂၠိုၚ်ဂှ် ဖအောန်ဖျေံအာကဵု ဒဒှ်မဒးစုတ်ယာတ်ကၟာတ်မုဟ်ပါၚ် မဆေၚ်စပ်ကဵု ကဝ်ဝေဒ် ၁၉ တံရောၚ်ဂှ် ပ္ဍဲဂိတုဖေဖဝ်ဝါရဳ (၂၆) တေံ ဟီုဂးလဝ်ရ။
သွက်ကမၠောန်ပရေၚ်ပိုန်ဒြပ် မဒးဒေါအ်ဒေၚ်လဝ် နူသၞာံ ၂၀၂၀ တေံဂှ် နဒဒှ်သ္ဂောံကလေၚ်ကော် ညးအာတရဴတံကဵု ကမၠောန်ပရေၚ်ပိုန်ဒြပ်တံဂှ်တုဲ ကြဴနူစလဝ် ပရေၚ်ချဳဒရာၚ်ပရိုဝ်မိုဝ်ယှေန် မကော်ဂး “Hello Hong Kong” တုဲဂှ် တၚ်လလောၚ်တြး သွက်ဂွံပါဲပ္တိတ်ယာတ်ကၟာတ်မုဟ်ပါၚ်တံ မံက်တိတ်ကၠုၚ်လဝ်ရ။
Ref; Reuters