ကဝ်တူလေဝ်၊ မာတ်ချ်(၁)
အပ္ဍဲတိဍာ်အုပ်ဓုပ်ကဝ်တူလေဝ် ဗော်သွးကောန်ဂကူကရေၚ် KNU ဂှ် ဟိုတ်နူပွချဳဒရာၚ်ပရေၚ်ပၞာန် ဒပ်ကံၚ်ဇြဳပၞာန်တံကဵု ပွမဖံက်ပ္ကဝ်အခေါၚ်အရာမၞိဟ်တံဂှ်ရ ညးဍုၚ်ကွာန်ပါဲဒဴဘဲပၞာန် မဒးဂြိပ်ဒဴပါဲဒလေတ်ဒၟံၚ်တံ ထပ်ဂၠိုၚ်တိုန်ကၠုၚ် စဵုကဵု (၅၃၀၀၀၀) ပြၚ်ဂှ် ဇာဇၞိက်အထံက်အရီုပရေၚ်ၜိုဟ်လလမ်ကရေၚ် KPSN လလောၚ်ပ္တိတ်လဝ်ရ။
အတိုၚ်တၚ်လလောၚ်တြး KPSN တံဂှ်မ္ဂး လၟိဟ်ဏံဝွံ ဒှ်ညးဂြိပ်ဒဴပါဲဒဴဘဲပၞာန် စနူအခိၚ်ဒပ်ပၞာန်သီအဝဵု စဵုကဵုဂိတုဖေဖဝ်ဝါရဳ သၞာံဏံဂှ်တုဲ ပ္ဍဲကဵုခရိုၚ်ညံၚ်လေဝ်ပေန် KNU မွဲဓဝ်ဂှ် ညးဍုၚ်ကွာန်ပါဲဒဴဘဲပၞာန် နွံကၠုၚ် စဵုကဵု ၁၄၀,၀၀၀ ပြၚ်ဂှ် သ္ဂးရ။
ညးဍုၚ်ကွာန်ပါဲဒဴဘဲပၞာန်တံဝွံ ဟိုတ်နူပေါဲဗ္တိုက် အကြာဒပ်ကံၚ်ဇြဳပၞာန်ကဵု ဂကောံပံၚ်ကောံ KNLA, KNDO တံ ဆက်က္တဵုဒှ်ဒၟံၚ် ဗွဲမသၠဲလးဂှ်ကီု၊ ဟိုတ်နူဒပ်ကံၚ်ဇြဳပၞာန် ပန်ပှော်လွဟ်ဇၞော် အပ္ဍဲကွာန်ဂမၠိုၚ်ကီု ကေုာံ ဟိုတ်နူဗ္တိုက်ဂြာတ်မခတိုဟ် နကဵုက္ၜၚ်ကျာတံတုဲ လၟိဟ်မ္ဒးဂြိပ်ဒဴပါဲဒလေတ်တံ ထပ်ဂၠိုၚ်တိုန်ကၠုၚ်ရဂှ် ညးမၞုံအခေါၚ်ဟီုဂး PSN သဝ်လေဝ်ကပဝ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“လၟိဟ်ညးပါဲဒဴဘဲပၞာန်ဂှ် အပ္ဍဲပွိုၚ်ပန်ဂိတုဏံဂှ် တီတီဒှ်ဒှ်ရ။ ဗွဲတၟေၚ် ပ္ဍဲညံၚ်လေဝ်ပေန်ဂှ် ဂၠိုၚ်တိုန်ကၠုၚ် တီတီဒှ်ဒှ်ရ။ လ္တုန်တုဲကၠုၚ်တေံ ပ္ဍဲညံၚ်လေဝ်ပေန်ဂှ် လၟိဟ်ပိုယ်တံတော်လဝ်ဂှ် နွံဂၞန်ကဵုဠက်ညိကီု။ လၟုဟ်မ္ဂး မွဲကိုဋ်ပန်ဠက်ပြၚ်။ အကာဲအရာဗီုဏံရ။ ဣဏံ မူဟိုတ်ရောဟီုတှ်ေ အခိၚ်ကံၚ်ဇြဳပၞာန် လုပ်ပ္ဍဲကွာန်ဂှ် ပရူဒဒှ်ဗက်ရပ်စပ်ဒၟံၚ်မၞိဟ် ၜိုတ်ဆဵုဂှ်ကီု၊ ရပ်တုဲမှ ဍဵုဍိုက်ဘပဠတံဂှ် နွံရ။ မိၚ်ရမျာၚ်ကံၚ်ဇြဳပၞာန်ဗက် သီုညးဖအိုတ်ဂြိပ်တိတ်အိုတ်ရ။ မွဲပၠန်ဂှ် ဍေံတံကၠုၚ်ကဵုက္ၜၚ်ကျာတုဲမှ ဂြာတ်မခတိုဟ်၊ ပန်ပှော်လွဟ်ဇၞော် အပ္ဍဲကွာန်တံ ဟွံပိုတ်သ္ကုတ်ဂှ် နွံရ။ ဟိုတ်ဂှ်ရ ဒးဂြိပ်ဂှ် ဂၠိုၚ်ကၠုၚ်။ ဗ္တိုက်ကဵုဒရုၚ် နွံ။ ဟီုမ္ဂး ဟိုတ်နူဘပဠဒၟံၚ်ညးဒေသတံ နကဵုနဲကဲစုၚ်ဇဳဂှ်ရ အကာဲအရာလၟုဟ်ဂှ် ဟိုတ်ပရူပရာ ပ္ဍဲခရိုၚ်ညံၚ်လေဝ်ပေန် ဂွံဒှ်ကၠုၚ် ဂၠိုၚ်အိုတ်မွဲရောၚ်ဂှ် အဲညာတ်ရ” ရဴဝွံ သ္ဂးရ။
တၚ်နွံပၟိက် ညးပါဲဒဴဘဲပၞာန် မ္ဒးဂြိပ်ဒဴပါဲဒလေတ်ဒၟံၚ် အပ္ဍဲတိဍာ်အုပ်ဓုပ်ကဝ်တူလေဝ် KNU တံဂှ် ဂကောံဗော်သွးပရေၚ်မၞိဟ် ညးဒေသတံ၊ က္ဍိုပ်သ္ကိုပ် ကေအာန်ယူတံကဵု ဂကောံမှာဇန်တၞဟ်ဟ်တံ ပံၚ်တောဲရေၚ်တၠုၚ်ရီုဗၚ်ကဵုဒၟံၚ်ကီုလေဝ် တၚ်နွံပၟိက်ဗွဲမဂၠိုၚ် က္တဵုဒှ်ဒၟံၚ်ဂှ် ဂွံတီကေတ်ရ။
သဝ်လေဝ်ကပဝ်ဂှ် ဟိုတ်နူလၟိဟ်ညးဍုၚ်ကွာန်ပါဲဒဴဘဲပၞာန် ထပ်ဂၠိုၚ်တိုန်ကၠုၚ်ဂှ်ရ ဂဥုဲဇဗ၊ စၞစသုၚ် ကေုာံ သွက်ဂွံမံၚ်စံၚ် ဂီုဂီုကၠီုကၠီုမာန်ဂှ် နွံပၟိက်ဒၟံၚ်ကဵု အရီုဗၚ်အထံၚ်အပၚ်တံ တၟာဂလိုၚ်နွံဂှ် သ္ဂးရ။
“ပ္ဍဲကဵုအကာဲအရာ ရုမ်မ်ဂပ်ပ်ဟွံမွဲဒၟံၚ်ဂှ် ဗီုပြေပြံၚ် ဒးမံၚ်စံၚ်၊ စသုၚ်ဒၟံၚ်တံ နွံရ။ ဒှ်ဒၟံၚ်ဒဒိုက်ကွေံကွေံဏောၚ်။ လ္တူဏံဂှ် စၞစသုၚ်၊ သွက်ဂွံမံၚ် ဂီုဂီုကၠီုကၠီုမာန်ဂှ် နွံမံၚ်ပၟိက် ပရေၚ်ရီုဗၚ်ထံၚ်ပၚ်တံ တၟာဂလိုၚ်ရ” သာ်ဝွံ ဟီုဂးလဝ်ရ။
သွက်ညးပါဲဒဴဘဲပၞာန်တံဂှ် နူကဵုဒေသပယျဵုမွဲကဆံၚ် ပြံၚ်လှာဲဗျူဟာတုဲ သွက်ဂွံထံက်ပၚ်ကဵု အရီုဗၚ်ပရေၚ်ဗ္စာရဏာမၞိဟ်တံ ဂၠိုၚ်ၚ်ဂှ်ကီု၊ နူကဵုဂကောံ CSO အပ္ဍဲဍုၚ်တံကဵု ဂကောံရပ်လွဟ်ကောန်ဍုၚ်အရၚ် ERO တံဂှ်မွဲကဆံၚ် သွက်ဂွံကဵုတိုက်ရိုက်ဂှ်ကီု၊ နကဵုအလဵုအသဳသေံ သွက်ဟွံဂွံကလေၚ်ပလံၚ်ဖျဴဌာန်ဒၟံၚ် ကုညးဒဒိုက် မပါဲဒဴကၠုၚ်ဘဲပၞာန်တံ အတေၚ်အဓမ္မဂှ်ကီု၊ သွက်ဂွံပံက်ကဵု ဗ္ဒိုပ်မံၚ်စံၚ်ယာယဳမာန်တံဂှ် KPSN အာတ်မိက်လဝ်ရ။
နကဵုဂကောံဗော်သွးဍုၚ်သ္အာၚ်တံလေဝ် ကယျာန်ပါဲကၠေံ ဒဒှ်မလုပ်သၞောဝ် ဂကောံပၞာန်တံ ပေၚ်ၚ်ဂှ်တုဲ သွက်ဂွံဆက်ကၠောန်အာ ပရေၚ်ကဵုဇြဟတ်ဂရိုဟ် ကုကံၚ်ဇြဳပၞာန်တံဂှ် နွံပၟိက်တုဲ အိုဿီုကဵုပရေၚ်ထံက်ပၚ် ပရေၚ်ဘဏ္ဍာ၊ ပရေၚ်ဍုၚ်ကွာန် လ္တူဂကောံပၞာန်တံဂှ် ဒေါအ်ဒေၚ်တုဲ သွက်ဂွံကေတ်အရေဝ် ကုကမ္ပဏဳဒပ်ပၞာန်ပိုၚ်သီုဖအိုတ်မာန်ဂှ်ကီု၊ သွက်ဂွံကၟာတ်လဒဵု ဒဒှ်မရာန်ကၠေၚ်က္ၜၚ်ကျာ ကေုာံ လွဟ်လက်နက်တံဂှ်ကီု၊ သွက်ဂွံကဵုအရီုဗၚ် ပရေၚ်ဗ္စာရဏာမၞိဟ် သွက်ဍုၚ်ဗၟာ တံဒှ်တမ် တၚ်နၚ်တံဏံဂှ် KPSN အာတ်မိက်လဝ်ရ။
ပရိုၚ်−သြၚ်လောန်တိုၚ်(မ်)