ညံၚ်လေဝ်ပေန်၊ မာတ်ချ်(၂)
တိဍာ်ဗော်သွးကောန်ဂကူကရေၚ် KNU ကဝ်ဒူလေဝ်ထိၚ်ဒဝ်လဝ်၊ ခရိုၚ်ညံၚ်လေဝ် ဒပ်မဟာ(၃)၊ မၞိဟ်တြုံကောန်ဒေသ (၂)တၠ ဒၟံၚ်ကွာန်ညံၚ်ပေန်တာ ကောန်ဒပ်ကံၚ်ဇြဳပၞာန် ပြိုက်ဂစိုတ်ဏာလဝ်ရဂှ် KNU လလောၚ်တြးလဝ် ပ္ဍဲဂိတုမာတ်ချ် စၟတ်တ္ၚဲ(၁)ဂှ်ရ။
ဇွကိုဝ်ကျဝ်မိုဝ်ဝေန် ကေုာံဥူကျာပဝ် ကောန်ကွာန်ညံၚ်ပေန်တာ ဒးဒုၚ်ဂစိုတ်လဝ်ဂှ် ညးဒေသပါဲဘဲပၞာန်တအ် ဃောကလေၚ်စဴကေတ်ဇွောံမ ပ္ဍဲကဵုကွာန် ပ္ဍဲဂိတုဖေဖဝ်ဝါရဳ စၟတ်တ္ၚဲ(၂၇)ဂှ် ဂွံဆဵုကေတ် ချိုတ်ဒၟံၚ်ရ။
နူဂိတုဖေဖဝ်ဝါရဳ စၟတ်တ္ၚဲ (၂၄)တုဲ ဟိုတ်နူဒပ်ကံၚ်ဇြဳပၞာန်ပန်ဖျေံဒၟံၚ်လွဟ်ဇၞော် ပ္ဍဲကွာန်တအ်တုဲ ညးဒေသကွာန်ညံၚ်ပေန်တာ ဒးဂြိပ်ဒဴပါဲဓလေတ်ဒၟံၚ် ပ္ဍဲဂြိုပ်ဒဵု ဒၞာဲဗၠးဘဲတအ်ရ။
ပ္ဍဲကွာန်ညံၚ်ပေန်တာ ပွိုၚ်ဍုၚ်မူ KNU ဂှ် လၟိဟ်သ္ၚိမၞုံ (၁၆၁) မတုဲ လၟိဟ်မၞိဟ် (၄၀၀၀)တၠပြၚ်မံၚ်တန်တဴဒၟံၚ်ကီုလေဝ် ဟိုတ်နူဒပ်ကံၚ်ဇြဳပၞာန် ပန်ဖျေံဒၟံၚ်လွဟ်ဇၞော်တုဲ ဒးဂြိပ်ဒဴဒၟံၚ် ကြပ်ဗ္ဒာဲအလုံမွဲကွာန်ရ။
အတိုၚ်တၚ်ဂၞၚ် ဇာနှိက်အထံက်အရီုပရေၚ်ၜိုဟ်လလံကရေၚ် KPSN လလောၚ်တြးလဝ်မ္ဂး နူအခိၚ်ဒပ်ပၞာန်သီအဝဵုတုဲ စဵုကဵုဂိတုဖေဖဝ်ဝါရဳ သၞာံဏံအိုတ်ဂှ် ညးဍုၚ်ကွာန် ဒးပါဲဒဴဒၟံၚ်ဘဲပၞာန် ပ္ဍဲတိဍာ် KNU ထိၚ်ဒဝ် စဵုကဵု ၅၃၀,၀၀၀ ပြၚ်နွံကၠုၚ်ဒၟံၚ်တုဲ ပ္ဍဲကဵုခရိုၚ်ညံၚ်လေဝ်ပေန် KNU သက်က်ဂှ် ညးဍုၚ်ကွာန်ပါဲဒဴဘဲပၞာန် ထပ်ဂၠိုၚ်တိုန် စဵုကဵု ၁၄၀,၀၀၀ ရဂှ် ဟီုသ္ဂးလဝ်ရ။
ညးဍုၚ်ကွာန်ပါဲဒဴဘဲပၞာန် ဒးဂြိပ်ဒဴဒၟံၚ်လၟုဟ်ဏံဂှ် ဟိုတ်နူပေါဲဗတိုက် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA KNDO တအ် ပေါဲဗတိုက်သၠဲတိတ်ကၠုၚ်ဒၟံၚ်ကီု၊ ဟိုတ်နူဒပ်ကံၚ်ဇြဳပၞာန် ပန်ဖျေံလွဟ်ဇၞ်ော ပ္ဍဲကွာန်တအ်ကီု။ ဟိုတ်နူပန်ပှော်ကၠုၚ် နကဵုက္ၜၚ်ကျာ ဆက်နွံကၠုၚ်ဒၟံၚ်ကီုဂှ်ရ နွံဒၟံၚ်ပၟိက်ကဵု အရီုဗၚ်ထံက်ပၚ်ပရေၚ်မၞိဟ် ဗွဲမဂၠိုၚ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြး KPSN ဂှ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – KNU