မတ်မလီု၊ မာတ်ချ်(၂)
ကောန်ဒပ်ဗၠာဲသၟိၚ် သၟဝ်တဲကံၚ်ဇြဳပၞာန် ပ္ဍဲတွဵုရးဍုၚ်မန် လတူဍုၚ်မတ်မလီုဂှ် ဗက်ရပ်ဒၟံၚ်သၟတ်တအ် အခိၚ်ဗ္တံတုဲ ဘပဠအာတ်မိက်ဒၟံၚ်သြန် အဆက်က်ရဂှ် ကောန်ဍုၚ်မတ်မလီုဂမၠိုၚ် ဟီုကဵု ဌာန်ပရိုၚ်သြန်လောန်တိုၚ်(မ်)ရ။
ပ္ဍဲဍုၚ်မတ်မလီုဂှ် ၜိုန်ရတိတ်လဝ်အမိၚ် တိတ်မ္ၚးအခိၚ်ဗ္တံဟွံဂွံ နူ(၁၂)နာဍဳ စဵုကဵု(၄)နာဍဳနူဂယးကီုလေဝ် ကောန်ဒပ်ဗၠာဲသၟိၚ်ကံၚ်ဇြဳပၞာန်တအ်ဂှ် နူကဵုအခိၚ် အကြာ(၁၁)နာဍဳဂှ် ဗက်ဂၠာဲရပ်ဒၟံၚ် သၟတ်နွံဒၟံၚ်ပ္ဍဲသ္ၚိ ဗ္ဒာဲဗ္ဒာဲဇကုတအ်ဂှ်ရ။
သၟတ်ရပ်ကော်ဏာလဝ်တအ်ဂှ် ဗၠာဲသၟိၚ်ကံၚ်ဇြဳပၞာန် ကော်ပၠုပ်ဏာပ္ဍဲဗ္ဒပ်တုဲ အခိၚ်နူဂယးဂှ် စကာကဵုညးလုပ်ဂကောံသ္ၚိကၟိန်တအ် ကၠုၚ်နုက်ပ္တိတ်ကေတ်ဒၟံၚ်ကီု မၞိဟ်(၁)တၠမ္ဂး သြန်နူ (၁)ကိုတ် စဵုကဵု (၂)ကိုတ် အာတ်မိက်ကေတ်ဒၟံၚ်ရဂှ် ကောန်ဍုၚ်မတ်မလီုတအ် ဟီုသ္ဂးလဝ်ရ။
ဗၠာဲသၟိၚ်ကံၚ်ဇြဳပၞာန်ဂှ် အာတ်သြန်တုဲ ဒဒှ်ရဗလးကဵုဒၟံၚ်သၟတ်တအ်ဂှ် ယဝ်ရပရိုၚ်မံက်တိတ်တုဲ ကလေၚ်ရပ်ဂွံမ္ဂး သီုဒးဒုၚ်ကေတ်အရေဝ် နကဵုသၞောဝ်ဥပဒေပ္ကီုပရာပ်ရောၚ် ဘပဠလဝ်နွံဒၟံၚ်ရဂှ် ဂွံတီကေတ်ရ။
သၟတ်ဒးဒုၚ်ရပ်လဝ်ဂှ် ဗၠာဲသၟိၚ်ကံၚ်ဇြဳပၞာန် အာတ်မိက်သြန် ကဵုထ္ပက်စၟတ်တဲဒုၚ်ဝန်တုဲ ကလေၚ်ဗလးကဵုလဝ် နွံဒၟံၚ်ကီုလေဝ် သၟတ်ကဵုသြန်ဟွံမာန်လ္ၚဵုဂှ်မ္ဂး ဆက်ရပ်လဝ်ရဂှ် သၟတ်ကလေၚ်ဗၠးတိတ်ကၠုၚ်လဝ်မွဲတၠ ဟီုသ္ဂးလဝ်ရ။
အတိုၚ်ညးဍုၚ်ကွာန်တအ်ဟီုဂးလဝ်မ္ဂး ဗၠာဲသၟိၚ်ကံၚ်ဇြဳပၞာန်ဂှ် အခိၚ်ဂေတ်ဒၟံၚ်ကၚ်ဗ္တံ နကဵုတၚ်ထ္ၜးဟိုတ်ပရေၚ်ဂီုကၠီုဂှ် မွဲမွဲတ္ၚဲမ္ဂး ရပ်ကေတ်ဒၟံၚ် သၟတ် နူ (၅)တၠ စဵုကဵု(၁၀)တၠနွံဒၟံၚ်ရဂှ် ဟီုသ္ဂးလဝ်ရ။
ပ္ဍဲဍုၚ်မတ်မလီု ကြဴနူဒပ်ပၞာန်သီအဝဵုတုဲ ကောန်ဒပ်ဗၠာဲသၟိၚ်ကံၚ်ဇြဳပၞာန် ဂေတ်ဒၟံၚ်ကၚ်အရိုဟ်ဒဒှ်တ္ၚဲကီု ပ္ဍဲကဵုဒၞာဲဒှ်အဓိကပရေၚ်ဂီုကၠီုတအ်လေဝ် ကၟာတ်လဒဵုစၟဳစၟတ် နွံကၠုၚ်ဒၟံၚ်ရ။
အတိုၚ်ဂကောံမၚ်မွဲရံၚ်စံၚ် ကောန်ထံၚ်ပရေၚ်ဍုၚ်ကွာန် AAPP ဟီုသ္ဂးလဝ်မ္ဂး ပ္ဍဲမွဲကာလဒပ်ပၞာန်သီအဝဵုဏံ မၞိဟ်ဒးဒုၚ်ရပ်လဝ် ဟွံဗဗွဲဓဝ် ဗ္ဒာဲ ၂၀၀၀၀ တၠ နွံကၠုၚ်ဒၟံၚ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြး ဂိတုဖေဖဝ်ဝါရဳ စၟတ်တ္ၚဲ (၂၈)ဂှ် ရ။
ပရိုၚ်-သြၚ်လောန်တိုၚ်(မ်)