လ္ဂုၚ်၊ မာတ်ချ် (၂)
ဗော်ညးဍုၚ်ကွာန် ဥူကိုဝ်ဝ်ကျဳ တၞောဝ် ၈၈ မပါလုပ်လဝ် ပ္ဍဲကလိုက်ကၟဵုဒ္စါံပန်မ မပၠတရဴဂှ် ပတှ်ေကေတ်ဂၠံၚ်တရဴပရေၚ်ဍုၚ်ကွာန် ဟွံပကီုပရာပ် ဗွဲမခိုၚ်ကၠိုက်တုဲ သွက်ဂွံဆက်ဒတူလိုၚ် နဒဒှ်ဗော်ပရေၚ်ဍုၚ်ကွာန်ဂှ် သ္ဂုတ်သွာတ်လဝ်ရောၚ် ပ္ဍဲဂိတုဖေဖဝ်ဝါရဳ (၂၈) တေံ လလောၚ်ပ္တိတ်လဝ်ရ။
ကောံဓရီုကမ္မတဳဗဟဵု ဗော်ညးဍုၚ်ကွာန် အလန်ဒုတိယဂှ် ကၠောန်ဗဒှ်လဝ် ပ္ဍဲဂိတုဖေဖဝ်ဝါရဳ (၂၇) ကဵု (၂၈) တုဲ ပ္ဍဲအခိၚ်တ္ၚဲဏံ သွက်ဂွံသောၚ်ကလး ပဋိပက္ခလ္ပာ်ပၞာန်၊ လ္ပာ်အရာပ် ကေုာံ အခေါၚ်စၞောန်ပျးအပိုၚ်၊ အခေါၚ်ပရေၚ်တုပ်သၟဟ်ကောန်ဍုၚ်အရၚ်တံ နကဵုဂၠံၚ်ဍာန်ပရေၚ်ဍုၚ်ကွာန်မာန်ဂှ် ဒှ်အခိၚ်ကာလတၚ်ကော်ချဴ သ္ကာတ်မြဟ်အိုတ်ရောၚ် ဗော်ညးဍုၚ်ကွာန် သ္ဂးရ။
သွက်ဂွံသောၚ်ကလးပြသၞာပရေၚ်ဍုၚ်ကွာန် ဍုၚ်ဏံအိုဿီုမာန်ဂှ် ဗော်ပရေၚ်ဍုၚ်ကွာန် ကဆံၚ်ကၟိန်ဍုၚ် မဒတူလိုၚ်အာ လ္တူပရေၚ်ဒဳမဝ်ကရေဇြဳ၊ ပရေၚ်ဖေဝ်ဒရာတံ ခိုၚ်ၚ်ကၠိုက်က်မွဲ သွက်ဂွံနွံဂှ် နွံပၟိက်ရောၚ် ဗော်ညးဍုၚ်ကွာန် ဒဒှ်ရပတှ်ေစှ်ေစိုတ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
နကဵုအလုံကၟိန်ဍုၚ်မွဲ နဇြဟတ်မၞိဟ်၊ နဇြဟတ်သြန်၊ နဇြဟတ်ကသပ်ညာဏ် ၜိုတ်သၟဟ်အစောံ သွက်ဂွံပံၚ်တောဲပါလုပ်ကဵုအိုတ်ဂှ်လေဝ် ဗော်ညးဍုၚ်ကွာန်ဂှ် ဖ္တိုက်ဖ္အောဝ်လဝ် ပ္ဍဲတၚ်လလောၚ်တြးဂှ်ရ။
စပ်ကဵုသၞောဝ်ပ္တိုန်စရၚ်ဗော် သီုကဵုပါလုပ် တၚ်သ္ဂုတ်သွာတ် သွက်ဗော်ဂွံဆက်ဒတူလိုၚ်ဂှ်တုဲ နူကဵုသြၚ်လောန်တိုၚ်(မ်) ၜိုန်ရဆက်စၠောံသၟာန်သၟုက်လဝ် ဥက္ကဌဗော်ညးဍုၚ်ကွာန် ဥူကိုဝ်ဝ်ကျဳ ဟွံအောန်နူကဵု (၄) ဝါကီုလေဝ် ဒုၚ်တဲသှ်ကဵုလဝ်ဂှ် ဟွံမွဲရ။
အမာတ် NLD တြေံ မအူပေန်ဇြုၚ်ဝေန် မဒှ်ဥက္ကဌ ဗော်ဒဳမဝ်ကရေတ်တေတ်ညဳသၟဟ်ဂကူဂှ်လေဝ် ဒဒှ်ရပံၚ်တောဲထောံကဵု ဗော်ညးဍုၚ်ကွာန်ဂှ် ချူထ္မံက်ထ္ၜးလဝ် နူကဵုအကံက် Facebook ညးရ။
အခိၚ်လၟုဟ်ဂှ် ဗော်ပရေၚ်ဍုၚ်ကွာန် မပ္တိုန်လဝ် အခေါၚ်အာတ်ပ္တိုန်စရၚ်တံကဵု အခေါၚ်ဒက်ပ္တန်ဗော် ဇရေၚ်ကဝ်မယှေန်ပေါဲရုဲမာဲကၟိန်ဍုၚ်ဂှ် နွံဒၟံၚ် (၁၃) ဗော်တုဲ ဗော်ပရေၚ်ဍုၚ်ကွာန် မစန်ဒက်အာ အလုံကၟိန်ဍုၚ်ဂှ် နွံဒၟံၚ် (၅) ဗော်ရောၚ် လလောၚ်ပ္တိတ်လဝ် ပ္ဍဲလိက်ပရိုၚ်တြးဝါဒ ကံၚ်ဇြဳပၞာန်တံရ။
သ္အာၚ်နူဂှ်ပၠန် ဗော်ပရေၚ်ဍုၚ်ကွာန် မစန်ဒက်အာ အပ္ဍဲရးဒေသဇၞော် ဟွံသေၚ်မ္ဂး အပ္ဍဲတွဵုရးမွဲမွဲတံဂှ် နွံဒၟံၚ် စဵုကဵု (၈) ဗော်တုဲ သွက်အခေါၚ်ဒက်ပ္တန်ဗော်တံဏံကဵု သွက်ပရေၚ်သ္ဂောံပ္တိုန်စရၚ်မာန်ဂှ် ကဝ်မယှေန်ပေါဲရုဲမာဲကၟိန်ဍုၚ်တံ စဳစောတ်ရေၚ်တၠုၚ်ဒၟံၚ်ရောၚ်ဂှ် သ္ဂးလဝ်ရ။
ပရိုၚ်−သြၚ်လောန်တိုၚ်(မ်)