မတ်မလီု၊ မာတ်ချ် (၂)
ပ္ဍဲကဵုပရေၚ်ပ္တိုန်စရၚ် အခေါၚ်ရပ်လွဟ် မကဵုလဝ်အခေါၚ် မၞိဟ်မွဲတၠ စဵုကဵုသေနာတ်ပိဇကိုအ်ဂှ် တၠကမၠောန်ပရေၚ်ပိုန်ဒြပ် အပ္ဍဲတွဵုရးဍုၚ်မန်တံ ပါလုပ်ကၠုၚ်ကီုဂှ် ဂွံတီကေတ် ဇရေၚ်သၞာဲဒဴကံၚ်ဇြဳပၞာန်ဂမၠိုၚ် ဟွံမိက်ထ္မံက်ယၟု ဒၟါနူပရေၚ်ဂီုကၠီုတံရ။
အခေါၚ်ရပ်လွဟ်လက်နက်တံဂှ် ကောန်အရာပ်၊ ညးဒုၚ်ကာကၟိန်ဍုၚ် ကေုာံ ကောန်ပၞာန်ဂမၠိုၚ် အာတ်ပ္တိုန်စရၚ်မာန်ရောၚ် ပ္ဍဲဂိတုဂျာန္နဝါရဳ (၃၁) တုဲကၠုၚ်တေံ နူကဵုဌာနဝန်ဇၞော်အပ္ဍဲဍုၚ်ကံၚ်ဇြဳပၞာန် လလောၚ်တြးတုဲဂှ် ပ္တိုန်ကၠုၚ်လဝ်စရၚ် သာ်ဏံရ။
ပ္ဍဲကဵုမပ္တိုန်ကၠုၚ်စရၚ် အခေါၚ်ရပ်လွဟ် အပ္ဍဲဍုၚ်ဂှ် ကောန်သ္ဂံၚ်တြေံတြေံဂမၠိုၚ်၊ ကောန်ဗော်ကျခိုၚ်ယျေဂမၠိုၚ်၊ တၠကမၠောန်ပရေၚ်ပိုန်ဒြပ်တံကဵု ရဲအုပ်ဓုပ်တံလေဝ် ပါလုပ်ဂှ် သ္ဂးရ။
ကောန်ဂကောံဒပ်ဗၠာဲသၟိၚ် ဇြဳဒဳအာမ် ကိုဝ်အေမေန်ထောန်ဂှ် ဒဒှ်ရဂွံမိၚ်ကေတ်ဒၟံၚ် ပ္တိတ်ကဵုဒၟံၚ်လွဟ် ကုတၠကမၠောန်ပရေၚ်ပိုန်ဒြပ် မဒတူလိုၚ်ဒၟံၚ် လ္ပာ်ကံၚ်ဇြဳပၞာန်တံသၟးဟွံက သီုကဵုမၞိဟ်မဗၠးကၠုၚ် နူထံၚ်ဂမၠိုၚ် နကဵုအမှုကၠတ်ဂၠံက်၊ ဂဥုဲၜူမာဲတံလေဝ် ပါလုပ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“အတိုၚ်ပိုယ်ဂွံတီလဝ်ဂှ်တှ်ေ ကောန်သ္ဂံၚ်တြေံတြေံတံဂှ် ပ္တိတ်ကဵုဏောၚ်။ တုဲတှ်ေ ကောန်ဂကောံဗော်ကျခိုၚ်ယျေတံဂှ် ပ္တိတ်ကဵုဏောၚ်။ တၠကမၠောန်ပရေၚ်ပိုန်ဒြပ် မဒတူလိုၚ်ဒၟံၚ် လ္ပာ်ဍေံတံ (စကစ) ဂှ်လေဝ် ပ္တိတ်ကဵုဏောၚ်ဂှ် ဂွံတီကေတ်ရ။ မွဲပၠန် တၟေၚ်ဟ်ဒၟံၚ်ညိညဂှ် ကုကမၠတ်၊ ရဲဇြောတ်ဂဥုဲ မဗၠးကၠုၚ်နူထံၚ်တံဂှ်လေဝ် အခေါၚ်ရပ်လွဟ်ဂှ် ပအပ်ကဵုနကဵုလာၚ်ဇြေန်ဟွံသေၚ်ပုဟ်၊ နဒဒှ်ကောန်ဒပ်ဍေံတံဂှ် ပအပ်ကဵုလွဟ်တံတုဲ စကာအနိၚ်အပိုၚ်တံဏောၚ်ဂှ်လေဝ် ပိုယ်တံ ဂွံတီကေတ်ရ” သာ်ဝွံ ညးသ္ဂးရ။
နကဵုညးမပ္တိုန်လဝ်စရၚ် အခေါၚ်ရပ်လွဟ်ဂမၠိုၚ် ဒးဒှ်မၞိဟ် နွံပၟိက်သ္ဂောံဒးရပ်သေနာတ်တံ ဍာံဍာံဏောၚ်တုဲ ဒှ်မၞိဟ်မသ္ပပလာပ်ပထုဲမာန် ကုပရေၚ်ဂီုကၠီုကၟိန်ဍုၚ်၊ ပရေၚ်ဂီုကၠီု ဒေသမဆေၚ်စပ်၊ ပရေၚ်သၞောဝ်ဓဝ်အုပ်လဒံ ကေုာံ ပရေၚ်ညိၚ်ဝတ်တံ ဟွံဂွံပုဟ်ဂှ် ကံၚ်ဇြဳပၞာန် သ္ဂးလဝ်ရ။
ပ္ဍဲတွဵုရးဍုၚ်မန် ကြဴနူဒပ်ပၞာန်သီအဝဵုတုဲ ဂကောံဒပ်ပၠန်ဂတးတံ ပန်ပှော်ပသောၚ်ဒၟံၚ် ရဲထံက်ဂလာန် ကံၚ်ဇြဳပၞာန်တံ၊ ကောန်ဗော်ကျခိုၚ်ယျေတံ ကေုာံ ညးကဵုပရိုၚ်တံဂှ်လေဝ် နွံဒၟံၚ်ရ။
ပ္ဍဲကဵုမူ အခေါၚ်ရပ်လွဟ်ကံၚ်ဇြဳပၞာန်ဂှ် နကဵုကောန်အရာပ်ဂမၠိုၚ် ဒးအာတ်ပ္တိုန်စရၚ် နကဵုလာၚ်ဇြေန်တုဲ ဂကောံဂီုကၠီုဒေသန္တရ၊ ပၞာန်ညးဍုၚ်ကွာန် ကေုာံ ဂကောံဒစဵုဒစး ရဲက္တဵုသပုန်တံဂှ် ဒးအာတ်ပ္တိုန်စရၚ် အခေါၚ်ရပ်လွဟ် နကဵုပါမေတ်ရောၚ်။
ပ္ဍဲကဵုဂကူလွဟ်သေနာတ် ကဵုအခေါၚ်ရပ် နကဵုလာၚ်ဇြေန်တံဂှ် သၞာတ်(ဆုံလည်) ပါၚ်ပၠံၚ်ဍေံ ၃၈ ၝောံတဲကဵု ဍောတ်နူဂှ်တံ၊ ပေတ်သတဝ်၊ သေနာတ်ဂၠေံဂၠေံ (ပြောၚ်းချော)၊ သေနာတ်လၟ ကေုာံ သေနာတ်ကျာတံ ပါလုပ်ရ။
သ္အာၚ်နူဂှ်ပၠန် ပ္ဍဲကဵုဂကူသၞာတ် မကဵုလဝ်အခေါၚ်ရပ် နကဵုပါမေတ်တံဂှ် သၞာတ်ပေတ်သတဝ် ပါၚ်ပၠံၚ်ဍေံ (၃၈) ၝောံတဲကဵု ဇၞော်နူဂှ်တံ၊ သၞာတ်ရိုၚ်ဖေဝ် ကေုာံ သၞာတ်လုပ်ဂကောံ သၞာတ်စက်တံပါလုပ်ဂှ် ထ္မံက်ထ္ၜးလဝ်ရ။
ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်ဂမၠိုၚ်ဂှ် ဒဒှ်မကဵုအခေါၚ်ရပ်လွဟ်ဂှ်ဝွံ နကဵုကံၚ်ဇြဳပၞာန် ကဵုဂီုကၠီု လ္တူမၞိဟ်မဆက်စပ် ထံက်ဂလာန်ကဵုဇြဟတ် ကုဍေံတံ ဟွံမာန်ဂှ် စၞောန်ထ္ၜးဒၟံၚ်တုဲ အကြာညးဍုၚ်ကွာန်ရေၚ်သ္ကအ် ညံၚ်ဂွံစိုပ်အာဗီုပြၚ်ပဋိပက္ခဂှ် ဒှ်ပွဖန်ဗဒှ်လဝ် နကဵုတၚ်ရန်တၟံနွံနွံရောၚ်ဂှ် ပါ်ပါဲထံက်ထ္ၜးလဝ်ရ။
ပရိုၚ်−သြၚ်လောန်တိုၚ်(မ်)