မတ်မလီု-မာတ်ချ်(၃)
ပၞောဝ်ကဵုဗ္တောန်လိက် ပ္ဍဲဗလးတိ ကေုာံပ္ဍဲအောန်လာၚ် မံက်တိတ်ကၠုၚ် ကြဴနူဒးဒုၚ်သီအဝဵုတုဲတအ်ဂှ် Free Online Education Institution Myanmar (FOEIM) မဒှ်ဘာယၟုဇၞော်မွဲဘာ ကၟာတ်ကၠုၚ်လဝ် ပ္ဍဲဂိတုမာတ်ချ် စၟတ်တ္ၚဲ(၁) ရုပ်ရဂှ် လလောၚ်တြးလဝ် ပ္ဍဲဇာနှိက်ပရေၚ်မၞိဟ်ညးတအ်ရ။
တၚ်ဂၞၚ်ပရေၚ်ပရူကွးဘာ နူဘာ FOEIM တအ်ဂှ် ပ္ဍဲဂိတုဖေဖဝ်ဝါရဳ စၟတ်တ္ၚဲ (၂၁)ဂှ် မံက်ပြးတိတ်အာ လ္ပာ်မ္ၚးရ။
ထံက်ရံၚ်ကဵုပရေၚ်ဂီုကၠီုကွးဘာ ကေုာံအ္စာ/အ္စာၝောံတအ်တုဲ ဒးကၟာတ်အာဘာရောၚ်ဒှ်တုဲ ဒၟာနူပရေၚ်ဟွံပြေပြံၚ်က္တဵုဒှ်ကၠုၚ်လဝ်ဂှ် ဒုဏ်ဏာဂုဏ်ဇြိုဟ်ဟ်နက်က်ရဂှ် ဓမံက်ထ္ၜးလဝ်ပ္ဍဲတၚ်လလောၚ်တြးဂှ်ရ။
ပ္ဍဲကဵုတၚ်ဂၞၚ်မံက်ပြးတိတ်အာတအ်ဂှ် ယၟုကွးဘာ၊ ယၟုမိမကွးဘာ ကေုာံဂၞန်ဖုၚ်တအ် ပါလုပ်ဒၟံၚ်တုဲ ပ္ဍဲကဵုချာန်နေဝ်တေဝ်လဳဂရာမ် တြးဝါဒကံၚ်ဇြဳပၞာန်ဂှ် စုတ်လဝ်က္ဍိုပ်နာနာသာ်တုဲ ချူပတိုန်လဝ်ဂှ်လေဝ် ဂွံညာတ်ကေတ်ဒၟံၚ်ရ။
အလဵုအသဳပရေၚ်ညဳသၟဟ်ကောန်ဂကူ ကံက်ကေတ်လဝ်စရိတ်ဂိတုဘာတုဲ ကေတ်အာအရေဝ်ကဵု ညးဒက်ပ္တန်လဝ်ဘာ ကိုဝ်ခဒူ ဟၟဲကဵုပရေၚ်ကေတ်လျိုၚ်သြန် ကေုာံညးကၠောန်ဒၟံၚ် ညံၚ်ပရေၚ်ပညာဘာဂွံလီုလာ်အာတအ်ရောၚ်ဂှ် လလောၚ်တြးလဝ် ပ္ဍဲဂိတုဖေဖဝ်ဝါရဳ စၟတ်တ္ၚဲ(၁၀)ဂှ်ရ။
ပ္ဍဲကဵုသၞာံတုဲကၠုၚ်တေံလေဝ် ပရေၚ်ပရောသြန် ဘာ Kaung For You ကေုာံတၚ်ဂၞၚ်အ္စာ၊ အ္စာၝောံတအ် မံက်ပြးတိတ်ကၠုၚ်လဝ်ဏီရ။
ကြဴနူပရေၚ်မံက်ပြးတိတ်တုဲဂှ် အ္စာ၊ အ္စာၝောံ ကေုာံကွးဘာ နူကဵုဘာ Kaung For You လ္ၚဵုဂှ် ကံၚ်ဇြဳပၞာန်ရပ်စပ်လဝ် နွံကၠုၚ်ဒၟံၚ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – FOEIM (Facebook)