လွိုၚ်ကဝ်၊ မာတ်ချ် (၃)
ကရောၚ်ပၞာန်ကံၚ်ဇြဳပၞာန် ပ္ဍဲပယျဵုတွဵုရးကရေၚ်ဍာဲကဵု တွဵုရးသေံတံဂှ် ဂကောံပၞာန်ညးဍုၚ်ကွာန်ပအိုဝ် မပြံၚ်လှာဲလဝ်လွေဟ် နူကဵုဒပ်ပၞာန်ကောန်ဂကူပအိုဝ် PNO/PNA တံ ပံၚ်တောဲပါလုပ် ချဳဒရာၚ်ကၠုၚ်ဂှ် တမ်ရိုဟ်ပရိုၚ် ပရေၚ်ပၞာန်တွဵုရးကရေၚ်ဍာဲတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ဂိတုဖေဖဝ်ဝါရဳ (၂၇) တေံ ဒပ်ပံၚ်ကောံ ကံၚ်ဇြဳပၞာန် ကေုာံ PNA တံ ထ္ပက်ကၠုၚ်ကရောၚ်ပၞာန် ပ္ဍဲပွိုၚ်ဍုၚ်ဖေဝ်ခုၚ် ပယျဵုကရေၚ်ဍာဲ−သေံဂှ်တုဲ ပ္ဍဲလဒေါဝ်တ္ၚဲဂှ် အကြာဂကောံဒပ်ပံၚ်ကောံစဵုဒၞါညးဍုၚ်ကွာန် KA, KNDF, PDF တံ က္တဵုဒှ်လဝ် ပေါဲဗ္တိုက်ရ။
ပ္ဍဲကဵုပေါဲဗ္တိုက်ဏံဂှ် ကံၚ်ဇြဳပၞာန် ကဵု ဂကောံပံၚ်ကောံ PNA တံ (၉) တၠ ချိုတ်တုဲ လ္ပာ်ဒပ်စဵုဒၞါညးဍုၚ်ကွာန်တံ သီဂိုၚ်ဂွံလဝ် M-16 (၃) ဇကိုအ်၊ AK (၁) ဇကိုအ်၊ 9MM (၄) ဇကိုအ် ကေုာံ မကမ်ဂမၠိုၚ်ရောၚ်ဂှ် သ္ဂးလဝ်ရ။
ပ္ဍဲကဵုကောန်ပၞာန် မချိုတ်အာတံဂှ် ဟိုတ်နူကယျိုၚ်ယူနဳဝှမ်တံ ပါဒၟံၚ်ဂှ်ရ PNA ဝွံ ပံၚ်တောဲကဵု ကံၚ်ဇြဳပၞာန်တုဲ ထ္ပက်ကၠုၚ်ကရောၚ်ပၞာန်ဂှ် သ္ပဒတန်မာန်ရောၚ် သေန်တာတၚ်နၚ်ပရိုၚ် ပရေၚ်ပၞာန်ကရေၚ်ဍာဲ KMIC ဟီုရ။
PNO/PNA ဝွံ နူကဵုသီအဝဵုတုဲဂှ် ပရေၚ်ချဳဒရာၚ်ပရေၚ်ပၞာန်ပံၚ်တောဲ ကုကံၚ်ဇြဳပၞာန် ပ္ဍဲပယျဵုကရေၚ်ဍာဲ−သေံတံ နွံလဝ်ဂှ် ပရိုၚ်ကေၚ်တိတ်လဝ်ရ။
ပ္ဍဲဂိတုမေ သၞာံတုဲတေံဂှ်လေဝ် ပ္ဍဲအခိၚ်ဗ္တိုက် ဗ္ဒိုပ်ကွာန်ထဳရိကျေ ဒပ်ကံၚ်ဇြဳပၞာန် မဖျေံလဝ်ဒပ် ပ္ဍဲပွိုၚ်ဍုၚ်ညံၚ်ယှိုဲ တွဵုရးသေံဂှ်လေဝ် ကောန်ဒပ် PNA လ္ၚဵု ဟိုတ်နူနွံဒၟံၚ်အပ္ဍဲဗ္ဒိုပ်ဂှ်ရ ချိုတ်အာလဝ်တံ ကေၚ်နွံလဝ်ရ။
ပ္ဍဲကဵုအခိၚ်တုဲကၠုၚ်တေံ အခိၚ်သြၚ်လောန်တိုၚ်(မ်) ဆက်စၠောံသၟာန်သၟုက် ကုဂကောံ PNO ဂှ် ကောန်ပၞာန်သ္ဇိုၚ်ရေၚ်သ္ကအ် ပံၚ်တဲသ္ပဒတဴဒၟံၚ်တုဲ ဂွံဆဵုကေတ် ယူနဳဝှမ် PNA ပ္ဍဲကဵုကရောၚ်ပၞာန်ကံၚ်ဇြဳပၞာန်ဂှ်ဝွံ လ္ပာ်ကံၚ်ဇြဳပၞာန် ကေတ်လ္တက်လဝ်ရောၚ်ဂှ် ကေၚ်သှ်လဝ်ရ။
ဂကောံ PNO/PNA တံဂှ် ကဵုသၟတ်ဂမၠိုၚ် နူအပ္ဍဲဒေသပအိုဝ်တံ ပ္ကတ်ပ္ကေၚ်ပရေၚ်ပၞာန်ကီု၊ မွဲသ္ၚိ ကံက်သြန် (၃) ဠက်ဒ္ကေဝ်တံဂှ် ကၠောန်ၜိုတ်ဒၟံၚ်အဓမ္မရောၚ် ညးဒေသတံ ဟီုရ။
စပ်ကဵုအကာဲအရာဏံတုဲ နူကဵုသြၚ်လောန်တိုၚ်(မ်) ၜိုန်ရဆက်စၠောံ ကုညးမၞုံတာလျိုၚ် PNO တံ ဂၠိုၚ်ကဵုဝါကီုလေဝ် ဒုၚ်တဲသှ်ကဵုလဝ်ဂှ် ဟွံမွဲရ။
ပရိုၚ်−သြၚ်လောန်တိုၚ်(မ်)
ဗီုရုပ် – KMIC