အယာဒဝ်၊ မာတ်ချ် (၃)
အပ္ဍဲကာလဒပ်ပၞာန်သီအဝဵု ပွိုၚ် (၂) သၞာံဂှ် ဒပ်ပၞာန်ဗၟာ ဂစိုတ်လဝ် ညးယိုက်ဝန်ပရေၚ်ထတ်ယုက် ဗ္ဒါဲ (၇၀) တုဲ ဗ္ဒါဲ (၉၀၀) ရပ်ဒက်လဝ်တုဲ (၇၈၀) ပြၚ်ဂှ်လေဝ် သ္ကဵုဇီုကပိုက်ကလိဂွံလဝ်ဝပ်ဂှ် ဌာနဝန်ဇၞော်ပရေၚ်ထတ်ယုက် အလဵုအသဳညဳသၟဟ်ဂကူ (NUG) လလောၚ်ပ္တိတ်လဝ် ပ္ဍဲဂိတုဖေဖဝ်ဝါရဳ (၂၈) တေံရ။
သၞာံဏံ နူဂိတုဂျာန္နဝါရဳ စဵုကဵုဂိတုဖေဖဝ်ဝါရဳ အပ္ဍဲပွိုၚ် (၂) ဂိတုဂှ် ဟွံမွဲကဵုဓဝ်ဗ္စာရဏာမၞိဟ်မွဲသာ် ဒပ်ပၞာန်ဗၟာ ကလိလောန်လဝ် ပွမဗ္တိုက်ကဵုက္ၜၚ်ကျာ လ္တူကဏ္ဍပရေၚ်ထတ်ယုက်တံဂှ်ကီု၊ ရပ်ဒက် ပျဲပျာံ ဂစိုတ်ဂယိုၚ် ကုသၞာဲဒဴပရေၚ်ထတ်ယုက်တံ ကေုာံ ပွပကီုပရာပ်တၞဟ်သ္အာၚ်တံဂှ် ထ္မံက်ထ္ၜးပါလုပ် ပ္ဍဲတၚ်လလောၚ်တြးဂှ်ရ။
ပ္ဍဲကဵုဏံဂှ် ပ္ဍဲဂိတုဂျာန္နဝါရဳ (၂၁) တုဲကၠုၚ်တေံ ဒပ်ပၞာန်ဗၟာ နူကဵုပန်ပှော်ဗ္တိုက်လဝ် နကဵုက္ၜၚ်ကျာသၞေၚ်ဝဲ ကုရုၚ်ဂဥုဲပွိုၚ်တိုက်ဗဟေန်၊ ပွိုၚ်ဍုၚ်မျာၚ်၊ ရးမဂွဵုဂှ် ညးဗြဴ အာယုက် (၆၂) သၞာံမွဲတၠ ဒးမကမ်ကလိဂွံလဝ်ဝပ်တုဲ စမြိုၚ်ရုၚ်ဂဥုဲဂမၠိုၚ် သီုကဵုပါလုပ် စက် X-ray တံ ဇီုကပိုက်လီုလာ်အာလဝ်ရ။
တုဲကၠုၚ် ပ္ဍဲဂိတုဖေဖဝ်ဝါရဳ (၁၉) တေံဂှ်လေဝ် ဒပ်ပၞာန်ဗၟာ လုပ်စိုပ်ဍိုက်ဗ္တိုက်လဝ် ကွာန်နဲအေန်၊ ပွိုၚ်ဍုၚ်ပဠေဝ်၊ ရးသက်ကိုၚ်တုဲ ဗ္ဒမ်ဂဥုဲ ဌာနပါ်ပရေၚ်ထတ်ယုက်ကွာန်ရး မၞုံပ္ဍဲကွာန်မွဲဓဝ်ဂှ် နကဵုတၚ်ရန်တၟံနွံနွံ စံၚ်ပလီုပလာ်လဝ်ရောၚ် NUG သ္ဂးလဝ်ရ။
ဒပ်ပၞာန်ဗၟာ ကြဴနူရပ်ဒက်ပျဲပျာံ အ္စာၝောံမိမိန် CDM မွဲတၠ မစဴကၠုၚ် နူကဵုလွဳမၞိဟ်ယဲသၠးဂဝ်ဂၞဴ ပ္ဍဲဂြိုပ်မွဲဒၞါဲ မၞုံရးဗဂေါ ပ္ဍဲဒၞါဲစၟဳစၟတ်တုဲဂှ် ပ္ဍဲဂိတုဖေဖဝ်ဝါရဳ (၁၆) ဂှ် သ္ပအဓမ္မ ပန်ဂစိုတ်လဝ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြး NUG ရ။
သ္အာၚ်နူဂှ်ပၠန် ဒပ်ပၞာန် မထ္ပက်ကၠုၚ်ကရောၚ်ပၞာန် ကွာန်မဵုဒါကျဳ၊ ပွိုၚ်ဍုၚ်ကတာဂှ် ရပ်ဒက် အ္စာၝောံမိမိန် ကဆံၚ်သၠုၚ် မသ္ပလဝ် CDM မွဲတၠတုဲဂှ် ပ္ဍဲဂိတုဖေဖဝ်ဝါရဳ (၂၁) ဂှ် ဂစိုတ်ထောံလဝ်ရောၚ် သ္ဂးလဝ်ရ။
ဗ္တိုက်ပကီုပရာပ်ဒၟံၚ် လ္တူကဏ္ဍပရေၚ်ထတ်ယုက် နကဵုတၚ်ရန်တၟံနွံနွံလၟုဟ်ဂှ်ဝွံ ကံၚ်ဇြဳပၞာန် ဖံက်ပ္ကဝ်ဒၟံၚ် ဂျဳနဳဗာကောန်ဝေန်ယှေန်၊ တၚ်သ္ဂုတ်သွာန် ကံၚ်ဇြဳဂီုကၠီု ကုလသမဂ္ဂ၊ သၞောဝ်ဍုၚ်နာနာတံကဵု သၞောဝ်အပ္ဍဲဍုၚ်တံ ထေၚ်ၚ်လဵုလဵုရောၚ်ဂှ် NUG သ္ဂးရ။
ဌာနဝန်ဇၞော်ပရေၚ်ထတ်ယုက် အလဵုအသဳညဳသၟဟ်ဂကူဂှ် ဖျေံကဝုဟီုဗျိပၠုတ် ကုပြဝပကီုပရာပ် ကံၚ်ဇြဳပၞာန်တံ ဗွဲမသ္ကာတ်မြဟ်တုဲ နကဵုဗွိုၚ်ဍုၚ်နာနာတံ ရပ်စပ်ဂၠံၚ်ဍာန် မဒှ်မာန်တံတုဲ သွက်ဂွံကေတ်ကဵုဒုဟ်တာဒၞါ ဗွဲမစိုပ်တရဴ ဗွဲမပြဟ်ဂှ် ဖ္တိုက်ဖ္အောဝ်လဝ်ရ။
ပရိုၚ်−သြၚ်လောန်တိုၚ်(မ်)
ဗီုရုပ် – NUG