မနဳလာ၊ မာတ်ချ် (၃)
ပ္ဍဲဗလးၜဳမှာသၟိတ် ဗ္ဒါဲတွဵုဒၞက်ဍုၚ်ဖဳလေတ်ဖေန်ဂှ် က္ၜၚ်ဖ္ဍိုက်ကၠေၚ်ဍေန်ဗြံအာလဝ်တုဲ ကၠေၚ်စက် မဖ္ဍိုက်နၚ် ဗၞတ် (၈၀၀၀၀၀) လဳတာ ဒဇူအာလဝ် အပ္ဍဲၜဳမှာသၟိတ်ဂှ် သၟိၚ်တၠအဝဵုတံ ဟီုဂးလဝ် ပ္ဍဲဂိတုမာတ်ချ် (၂) တေံရ။
က္ၜၚ် မၞုံယၟု Princess Empress ဂှ်ဝွံ တိတ်ကၠုၚ် နူကဵုခရိုၚ်ဒေသန္တရဗာတ်တာန် မၞုံဗ္ဒါဲဍုၚ်ဇၞော် မနဳလာဂှ်တုဲ ပ္ဍဲအခိၚ်မတိတ်ကၠုၚ် ခရိုၚ်ဒေသန္တရသ္ကုတ်လဒေါဝ်ဂှ် ဟိုတ်နူကဵုလပှ်ၜဳထတ်တုဲ စက်မ္ဒးယောၚ်ယာအာလဝ်ရ။
အတိုၚ်တၚ်လလောၚ်တြး ဂကောံဒပ်မၚ်မွဲရေၚ်ၜဳဖဳလေတ်ဖေန် ပြဟ်ဟ်တေံဂှ်မ္ဂး ပ္ဍဲကဵုကၠေၚ် မဒဇူအာတံဂှ် ဒှ်ကၠေၚ်ဒဳဇြေဝ် မသုၚ်စောဲ သွက်ယာန်ဂမၠိုၚ်တုဲ ဒဒှ်ရကၠေၚ် အရပ်စပ်သွက်ကမၠောန်ကွတ်စက်တံဟွံသေၚ်ဂှ် ပါလုပ်ရ။
ဆ္ဂးကီုလေဝ် အတိုၚ်သွဟ်စမ်ၜတ်ဍာ်ကိုပ်ကၠာတံဂှ်မ္ဂး ကၠေၚ်မဒဇူအာတံဂှ်ဝွံ ဒဇူအာလဝ် အပ္ဍဲတွဵုဒၞက်ဍာ် နာအူဂျာန် Naujan မြူနဳသပေဝ်ပိုၚ်ဂှ်ရောၚ် ဂကောံဒပ်မၚ်ပြၚ်ၜဳတံ ဟီုဂးလဝ်တုဲ သ္ကဵုက္တဵုဒှ်လဝ်ဂွိၚ်ဂွါဲ သွက်တၟံလးခရေၚ် ကေုာံ သတ်ဍာ်ဂမၠိုၚ်ရ။
ဒဒှ်မကၠေၚ်စၞပၟတ်တံ ဒဇူဂှ်ဝွံ ဗျာပ်တြးအာ (၂၄) ပန်ကၠၚ်ကဳလောမဳတာဂှ် ဂကောံဒပ်မၚ်မွဲပြၚ်ၜဳတံ ဟီုဂးလဝ်ကီုလေဝ် ပ္ဍဲကဵုဍာ်ဂှ် ကၠေၚ်ဒဳဇြေဝ် ကေုာံ ကၠေၚ်စက် နွံဗၞတ်ၜိုတ်လဵုရောဟီုဂှ် ဟွံဂွံတီကေတ်ဏီရ။
က္ၜၚ်ဖ္ဍိုက်က္ၜၚ်ကျာ မဗၠိုက်ဒၟံၚ် သၟဝ်ဗလးဍာ်ၜဳ (၄၆၀) မဳတာဂှ် ဂၠိုက်ဂၠါဲဒၟံၚ်ဖိုဟ်တုဲ သွက်ဂွံဗဒေါအ် နူပွမကၠေၚ်ဒဇူဂှ် ဒဒှ်ရဂ္စါန်ဒၟံၚ်ဖိုဟ်ဂှ် သ္ကိုပ်အုပ်ဓုပ် ခရိုၚ်ဒေသန္တရ က္ၜၚ်မဗၠိုက်အာလဝ်ဂှ် ဟီုရ။
ကောန်က္ၜၚ် (၂၀) နူကဵုလ္တူက္ၜၚ် မဗြံအာဂှ် ဟံၚ်ပြာ်ဂွံလဝ်တုဲ ဒဒှ်ရဇီုကပိုက်ဒး ဟွံမွဲပုဟ်ဂှ်လေဝ် ဂွံတီကေတ်ရ။
Ref; CNA