လ္ဂုၚ်၊ မာတ်ချ် (၃)
ပ္ဍဲကဵုဘာဗ္တောန်လိက်အောန်လာၚ် အလဵုအသဳညဳသၟဟ်ဂကူ NUG မဒက်ပ္တန်ပံက်လဝ်တံဂှ် ယဝ်ရအပ်ဘာမ္ဂး ကေတ်အာအရေဝ် ကုမိမကွးဘာတံ နကဵုသၞောဝ်ဗ္တိုက်သ္အးပကီုပရာပ်ရောၚ်ဂှ် ကံၚ်ဇြဳပၞာန် ဘပဠလဝ်ရ။
ကြဴနူကံၚ်ဇြဳပၞာန် ကၠောန်သ္ပစဳစောတ် ပရေၚ်ပရူတၚ်နၚ်ကွးဘာ (၅၀၀) ပြၚ် မအပ်လဝ်ဘာ ပ္ဍဲကဵု Free Online Educational Institution Myanmar (FOEIM) မဒှ်ဘာဗ္တောန်လိက်အောန်လာၚ် မံက်တိတ်အာတုဲဂှ် ဘပဠကၠုၚ် သာ်ဏံရ။
ကံၚ်ဇြဳပၞာန်ဂှ် နကဵုမိမကွးဘာဂမၠိုၚ် ဒစဵုဒစးပွဳပွူ ဟွံမာန်ကဵုဒှ်၊ ဟွံတီဟွံကၠိုဟ်တုဲကဵုဒှ် ဒဒှ်ရဒးဒုၚ်ကေတ်အရေဝ် နကဵုသၞောဝ်ဗ္တိုက်သ္အး ပကီုပရာပ်ရောၚ်ဂှ်ကီု၊ သွက်ဂွံပအပ်ဘာ ပ္ဍဲကဵုဘာဗ္တောန်လိက် အလဵုအသဳကံၚ်ဇြဳပၞာန်ဂှ်ကဵု ဘာဗ္တောန်လိက် အလဵုအသဳသ္ပစၟတ်သမ္တီတံသၟးဂှ် လလောၚ်ပ္တိတ်လဝ် ပ္ဍဲဂိတုမာတ်ချ် (၁) တေံရ။
မိမကွးဘာမွဲတၠ မပအပ်လဝ် ကောန်ၚာ်ၜါ ပ္ဍဲကဵုဘာဗ္တောန်လိက်အောန်လာၚ် NUG တံဂှ် ဟိုတ်နူကၠောန်သ္ပဘပဠ ကေုာံ ထ္မံက်ပ္တိတ် ကုကွးဘာ မဗ္တောန်ဒၟံၚ်လိက်တံ၊ မိမတံဂှ်ရ ၜိုန်ရပွမဂွိၚ်ဂွါဲတံနွံကီုလေဝ် ဟွံစွံဘာ ပ္ဍဲကဵုဘာဗ္တောန်လိက် ကံၚ်ဇြဳပၞာန်တံပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ကံၚ်ဇြဳပၞာန်ဂှ် ကၠောန်ကၠုၚ် ပွမဘပဠ ကုမိမ၊ ကောန်ၚာ် မဗ္တောန်ဒၟံၚ်လိက် ပ္ဍဲဘာတံဏံဂှ်ရ။ ထ္မံက်ပ္တိတ်ကၠုၚ် မိမ၊ ကောန်ၚာ် မတိုန်ဒၟံၚ် ပ္ဍဲဘာအောန်လာၚ်တံ နွံကၠုၚ်ဂှ်ရ နကဵုမိမဂမၠိုၚ် ပရေၚ်ဒှ်ဓဝိၚ်တံ နွံကၠုၚ်ရ။ ဟိုတ်ဂှ်ရ ပြဟ်ဟ်ဏံ သွက်ဂွံဗ္တောန်လိက် ပ္ဍဲဘာတံဏံဂှ် ဒးချပ်ရဏောၚ်။ သွက်အနာဂတ်ကောန်ၚာ် ဗီုလဵုဂွံစွံရောဟီုဂှ်။ ပြဟ်ဟ်ဏံဂှ်တှ်ေ တန်ဗ္တောန်အေန်ဂလိက်တံ၊ တန်ဗ္တောန်တၞဟ်ဟ်တံ၊ တန်ဗ္တောန် မဆက်စပ်ကဵု ကောန်ၚာ်တံဂမၠိုၚ် ကောန်ၚာ်တံ ညံၚ်ဂွိုအ်ပိုတ်အာ ကဵုလိက်ဂှ် ဒးကၠောန်တွဵုဏောၚ်။ ဆ္ဂး ပ္ဍဲကဵုဘာဗ္တောန်လိက် ကံၚ်ဇြဳပၞာန်တံ ပံက်ဂှ် ပိုယ်တံ စွံအာလးလး ဟွံသေၚ်ပုဟ်” ဂှ် ညးသ္ဂးရ။
ကံၚ်ဇြဳပၞာန်ဂှ် ဘာဗ္တောန်လိက်အောန်လာၚ် NUG သ္ပစၟတ်သမ္တီဂှ် ပံက်လဝ် (၆၂) ဘာရောၚ် ၜိုန်ရလလောၚ်တြးလဝ်ကီုလေဝ် ၜိုတ် (၃) ဘာဟေၚ် သက်သဳပံက်ဗ္တောန်ဒၟံၚ်တံ ထ္မံက်ပ္တိတ်ဂွံဆဵုကေတ်ဂှ် သ္ဂးလဝ်ရ။
ညးလ္ၚတ်သ္ၚဳဂၠိပ် ပရေၚ်ဍုၚ်ကွာန် ဥူတာန်သဵုနာၚ်ဂှ်လေဝ် ပ္ဍဲသၟဝ်ပရေၚ်အုပ်ဓုပ်ကံၚ်ဇြဳပၞာန်ဂှ် ညံၚ်ကၠောန် ကိစ္စပရေၚ်ပညာတံ ဟွံဂွံ ညံၚ်ဟွံဂံၚ်ပါလုပ်တုဲ ကၠောန်ဒၟံၚ် နကဵုသၞောဝ်အမိၚ်တံဂှ်ဝွံ ဒှ်ဒၟံၚ်ဗီုပြၚ် ပလီုပလာ်ဒၟံၚ် ဘဝညးဍုၚ်ကွာန်တံ လၟေၚ်ဒဒှ်တ္ၚဲဏောၚ်ဂှ် သ္ၚဳဂၠိပ်လဝ်ရ။
“အကာဲအရာကၠောန် ကမၠောန်ပရေၚ်ပညာ၊ ပရေၚ်ထတ်ယုက် ပ္ဍဲသၟဝ်အုပ်ဓုပ်ဍေံတံ(စကစ)ဟွံမာန်ဂှ် ညးတၞဟ်သ္အာၚ်တံလေဝ် ညံၚ်ကၠောန်ကလောန်ဏံ ဟွံဂွံ၊ ညံၚ်ဟွံဂံၚ်ပါလုပ်ဂှ် ကၠောန်ၜိုတ်ဒၟံၚ် နကဵုသၞောဝ်အမိၚ်၊ တၚ်သၞောတ်ဗ္ၜတ်နာနာ နတဲတံဂှ် ဂွံၜါသၞာံယျ။ ဆ္ဂး ပရေၚ်ပညာ၊ ပရေၚ်ထတ်ယုက်တံဂှ်ဝွံ ဒှ်တၚ်နွံပၟိက် ညးဍုၚ်ကွာန်သာမညတံ ဟွံမွဲဟွံဂွံတုဲ ပလီုပလာ်ဒၟံၚ်ညအ်ဂှ် စကစဝွံ ဒက်ပ္တန်ဒၟံၚ်ဍုၚ်ဟွံသေၚ် ပလီုပလာ်ဒၟံၚ် ဘဝညးဍုၚ်ကွာန်တံ လၟေၚ်ဒဒှ်တ္ၚဲဏောၚ်ဟီုဂှ် ထ္ၜးထောံဗီုပြၚ်ဂှ် ထေၚ်ကေတ်ရ” သာ်ဝွံ ညးသ္ဂးရ။
ဘာဗ္တောန်လိက်အောန်လာၚ် FOEIM ဝွံ ရန်ကဵုပရေၚ်ဂီုကၠီု ကွးဘာ၊ အ္စာ၊ အ္စာၝောံတံဂှ်တုဲ စနူဂိတုမာတ် (၁) တုဲ ကၟာတ်ထောံဘာယျ ၜိုန်ရလလောၚ်တြးလဝ်ကီုလေဝ် ပရေၚ်ကေတ်လျိုၚ် လ္တူတၚ်နၚ်မံက်တိတ်အာတံဂှ် လလောၚ်ပ္တိတ်လဝ် ဟွံမွဲဏီရ။
အ္စာဘာ ဗ္တောန်ကဵုဒၟံၚ် ဘာသာသၚ်္ချာ ပ္ဍဲဘာဗ္တောန်လိက်အောန်လာၚ် NUG သ္ပစၟတ်သမ္တီမွဲဂှ်လေဝ် ဗက်ကၟာတ်ဂဒဵုစဵုဒၞါဒၟံၚ် ပရေၚ်ဗ္တောန်လိက်တံဂှ်ဝွံ နကဵုကံၚ်ဇြဳပၞာန် ပလီုပလာ်ဒၟံၚ် သၞောဝ်ဒ္ဂေတ်ဒဳမဝ်ကရေဇြဳတံဏောၚ်ဂှ် ပါ်ပါဲလဝ်ရ။
“ဍေံတံ စၞးဗက်ကၠောန်ဒၟံၚ် သာ်ဏံတံဂှ် ယဝ်ရကၠောန်ထောံ ၜိုတ်အစောံစရာဲဍေံတံ နွံဂှ်မ္ဂး ပဵုဟွံခိုဟ်ပုဟ်ဟာ။ ဗီုဏံရ ဒှ်ထေက်ဂှ် အဲညာတ်ရ။ ပ္ဍဲဘာဍေံတံဂှ် ရံၚ်အာမ္ဂး ဍေံတံကၠောန်သ္ပ Brainwash ကုကောန်ၚာ်တံဏံဏောၚ်။ ကောန်ၚာ်မုဟွံတီ စပ်ကဵုပရေၚ်ပရူပကီုပရာပ်တံမုတံ ဗီုအခိၚ်လၟုဟ်တံဂှ် ဗက်စုတ် Mindset ဗီုတံဏံဏောၚ်။ တုဲပၠန် ဒးဟီုသောၚ်ၚ်မ္ဂး ဍေံတံ ပလီုပလာ်ဒၟံၚ် သၞောဝ်ဒ္ဂေတ်ဒဳမဝ်ကရေဇြဳတံရောၚ်ဂှ် အဲညာတ်ရ” သာ်ဝွံ ညးသ္ဂးရ။
ဘာ FOEIM ဝွံ ကြဴနူဒပ်ပၞာန်သီအဝဵုတုဲ ဒှ်သၞောတ်ပရေၚ်ပညာအခိၚ်ကာလအကြာ မသက္ကုၚုဟ် မမံက်တိတ်ကၠုၚ်မွဲဂှ်တုဲ ဗ္တောန်ကဵုဒၟံၚ် ကွးဘာ နူတန်မူလ၊ တန်လဒေါဝ်၊ စဵုကဵုတန်သၠုၚ် ပွဳပွူ (၂) ဠက်ပြၚ်ရ။
ပ္ဍဲသၞာံ ၂၀၂၂ တုဲကၠုၚ်တေံဂှ် သွက်ၚုဟ်တိုန်ဘာ ပွိုၚ်မွဲသၞာံဂှ် ဗက်ကဵုကဆံၚ်သ္ဇိုၚ်ပညာတံဂှ်တုဲ နူသြန်ၝာတ် (၁၀၀၀) စဵုကဵု (၃၀၀၀) ကံက်လဝ်တုဲ ပရေၚ်ရပ်စပ်သြန် ညးမပ္တန်ဘာ FOEIM ဟွံဒးကဵုဒၞါဲတံ မံက်တိတ်ကၠုၚ်လဝ်တုဲ က္တဵုဒှ်လဝ်ပြသၞာကယျာန်ဓဝါန် ကုဂကောံရုၚ်တံဏီရ။
ပရိုၚ်−သြၚ်လောန်တိုၚ်(မ်)