ရေဝ်၊ ဂျူလာၚ် ၃
အပ္ဍဲတွဵုရးမန် ပွိုၚ်ဍုၚ်ရေဝ်ဂှ် ဒပ်ပၞာန်သီအဝဵု သုၚ်စောဲဇြဟတ်ပေၚ်ၚ် ဍိုက်ထပက်မံၚ်ကရောၚ်ပၞာန်တံတုဲ ပေါဲဗတိုက်ၜါလပါ်သကာတ်မြဟ်တိုန်မာန်ရောၚ် ရဲဒပ်ပၠန်ဂတးတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
စနူဂိတုဂျောန် ၂၆ တုဲကၠုၚ်တေံရ ပ္ဍဲကဵုပွိုၚ်ဍုၚ်ရေဝ် သၟဝ်ကျာ၊ သၠုၚ်ကျာကဵု တိဍာ်ဗော်ဍုၚ်မန်တၟိတံဂှ် ဒပ်ပၞာန်သီအဝဵုနကဵုဇြဟတ်ပေၚ်ၚ် ဍိုက်ထပက်မံၚ်ကရောၚ်ပၞာန်တံ မဒှ်ရ။
ကရောၚ်ပၞာန်ပိကရောၚ် ထပက်အာမံၚ်အကြာတိဍာ်ဗော်ဍုၚ်မန်တၟိတံဂှ် ပြဟ်ဟ်ဏံ စိုပ်မံၚ်ဗ္ဒာဲ ကွာန်ကြုၚ်လံၚ်တြေံ၊ ဝါဇြေန်ကဵု လပါ်ကာန်နဳတံရောၚ်။
တုဲပၠန် အတိုၚ်မွဲဒမြိပ် ဂၠံၚ်ကွဳစက် ရေဝ်-ဇြပ်ဗု ပ္ဍဲကွာန်နှေဟ်ခြေၚ်၊ ကၞေၚ်တၟအ်၊ အံၚ်တပျေကဵု ၝောံလမုတံဂှ် ဒပ်ပၞာန်သီအဝဵု ထပ်ထပက်မံၚ်ကရောၚ်ပၞာန်မွဲလပါ်ပၠန် မဒှ်ရ။
ပရေၚ်ထပက်ကရောၚ်ပၞာန်ဏံဂှ် ဒုဂဥုပ်ပၞာန် သ္ကိုပ်ပၞာန်ဇၞော် ကျဝ်သွာလေန် အာလဝ်ဍုၚ်ဗိက် ဂိတုဂျောန် ၂၄ တေံတုဲ ဟိုတ်နူညးကဵုလဝ်အမိၚ် သွက်ဂွံဗတိုက်သၠေက်ၚးတးအာဒပ်ပၠန်ဂတးတံ ဒၞာဲသကုတ်ဂၠံၚ် စနူရေဝ် စဵုကဵုကအ်သံၚ်ချိုတ်တ်ပၠိုတ်တ်နွံတုဲ ပရေၚ်ကရောၚ်ပၞာန်ထပက်မံၚ်တံဏံ ဒှ်ကၠုၚ်လဝ်ရောၚ် ပရေၚ်သ္ၚဳဂၠိပ်တံ နွံမံၚ်ရ။
ယဝ်ရကရောၚ်ပၞာန်ဒပ်ပၞာန်ဗမာတံ ထပ်ထပက်ပဵုဂၠိုၚ်တိုန်ကၠုၚ်မ္ဂး ပေါဲဗတိုက်တံသကာတ်မြဟ်တိုန်မာန်ရောၚ် ညးတာလျိုၚ်ဒပ်စဵုဒၞာ ညးဍုၚ်ကွာန် ပွိုၚ်ဍုၚ်ရေဝ် YPDF ဗိုလ်ယျာန်နိုၚ် ဟီုကဵုဌာန်ပရိုၚ် သြၚ်လောန်တိုၚ်မ်ရ။
မွဲလပါ်ပၠန် ကရောၚ်ပၞာန်ထပက်မံၚ် အကြာတိဍာ်ဗော်ပ္တန်ဍုၚ်မန်တၟိတံဂှ် သွက်ဂွံတိုန်အာဍုၚ်ကျာ်ပိ တွဵုရးကရေၚ်တုဲ ညံၚ်ဂွံဂွံအခေါၚ်တတ်ကၠောံအာနူတိဍာ်ဗော်ဂှ် ကၠောန်မံၚ်ပရေၚ်ပ္ညဳပ္ညပ်တံနွံရောၚ် နူဌာန်ပရိုၚ်သြၚ်လောန်တိုၚ်မ် ဂွံတီကေတ် ရ။
ဟိုတ်နူဒပ်ပၞာန် ထပက်မံၚ်ကရောၚ်ပၞာန်တုဲ ညးဒေသ ၂၀၀၀ ပြၚ် နူကွာန်ကြုၚ်လံၚ်တြေံ၊ ဝါဇြေန်၊ ဝါဗိုၚ်ကဵု ကွာန်အကျာံ အပ္ဍဲတိဍာ် ဗော်ပ္တန်ဍုၚ်မန်တၟိတံဂှ် ဒးဂြိပ်ပါဲဒဴမံၚ်ဒၞာဲဗၠးဘဲမာန် ပ္ဍဲအကြာဒဵုအကြာကၠအ်တံကီုရ။
ပရိုၚ် – သြၚ်လောန်တိုၚ်မ်
Photo – Social Media