မတ်မလီု၊ ဂျူလာၚ် ၃
အပ္ဍဲတွဵုရးမန် စပ်ကဵုပရေၚ်သွက်ရုဲစှ်အာ သ္ကိုပ်အုပ်ဓုပ်အရာပ်/ကွာန်တံဂှ် ဟွံရုဲစှ်အာအတိုၚ်ဥပဒေ၊ ညးတံကဵုညးတံ ကၠတ်ခါန်ကၞက်ကေတ်မံၚ်သ္ၚိတ်တ်တုဲ ကဵုမံၚ်တန်ဗတောန်တံဂှ် နူကဵုစၠတ်ထဝ် သွက်ဂွံပလံၚ်လိက်သၟာန်အာ ဂကောံအလဵုအသဳတွဵုရးမန်တံနွံမံၚ်ရောၚ် ဂွံတီကေတ် နူညးစၞးစၠတ်ထဝ်တံရ။
ဒပ်ပၞာန်ပြံၚ်လဝ်ဗီုပြၚ်အလဵုအသဳတွဵုရးမန်ဂှ် ဟွံကလေၚ်ရုဲစှ်သ္ကိုပ်ပရေၚ်အုပ်ဓုပ်တၟိတံတုဲ သ္ကိုပ်အုပ်ဓုပ်တြေံ အတိုၚ်ကၠာကၠာတေံကီု ညးကြပ်ကဵုဗွိုၚ်ဗော်ပျဳခိုၚ်ဖျိုဝ်တံကီု ပါဲနူဂှ်ပၠန် ကောန်ရဲတဝ်သွာ ဂကောံပရေၚ်အုပ်ဓုပ်အလဵုအသဳတံဂှ်ရ ခါန်ကၞက်ကေတ်မံၚ်သ္ၚိတ်တ်အိုတ်ရ။
စပ်ကဵု သ္ကိုပ်ပရေၚ်အုပ်ဓုပ် ခါန်ကၞက်ကေတ်လဝ်သ္ၚိတ်တ်တံဂှ် စနူဂိတုဂျူလာၚ် ၁ စဵုကဵု ၂၈ ဂှ် စဳဇန်လဝ် သွက်ဂွံကဵုအာတန်ဗတောန် သၠုၚ်ပတိုန်အစောံစရာဲ ပရေၚ်ကမၠောန်သ္ကိုပ်ပရေၚ်အုပ်ဓုပ်တံဂှ် ဖန်ဇန်လဝ်ရ။
လတူပရေၚ် ဟွံကလေၚ်ရုဲလဝ်သ္ကိုပ်ပရေၚ်အုပ်ဓုပ်တံတုဲ ကဵုမံၚ်တန်ဗတောန်ဂှ် ပ္ဍဲအကြာတ္ၚဲတံဏံ နူစၠတ်ထဝ်မွဲကဆံၚ် ပလံၚ်လိက်သွက်ဂွံသၟာန်အာနွံမံၚ်ရောၚ် ညးစၞးစၠတ်ထဝ်တွဵုရး ပွိုၚ်ဍုၚ်ကျာ်မြဟ် ဥူတဇြဝ် ဟီုရ။
တုဲပၠန် လတူပရေၚ်ဟွံကလေၚ်ရုဲစှ်လဝ် သ္ကိုပ်ပရေၚ်အုပ်ဓုပ်တံတုဲ ကဵုမံၚ်တန်ဗတောန်ဂှ်လေဝ် စိုပ်ကောံဓရီုစၠတ်ထဝ်ဂတဏံမ္ဂး သွက်ဂွံသၟာန်ဂလာန် ဟွံသေၚ်မ္ဂး ပတိုန်ထ္ၜးဂလာန်နွံမံၚ်ရောၚ် သ္ဂးရ။
အတိုၚ်ဥပဒေအုပ်ဓုပ်အရာပ်/ ဂအုံကွာန် ပတိတ်လဝ်ပ္ဍဲသၞာံ ၂၀၁၂ တေံမ္ဂး အလဵုအသဳတၟိဂှ် အတိုၚ်ဆန္ဒညးဍုၚ်ကွာန်တံနွံ ဒးကလေၚ်ရုဲစှ်ပတိုန်အာသ္ကိုပ်ပရေၚ်အုပ်ဓုပ်အရာပ်/ ကွာန် ဆေၚ်စပ်တံ သီုဖအိုတ်ရောၚ်။
ဆဂး ပရေၚ်အလဵုအသဳတွဵုရးမန် အတိုၚ်ကၠောန်မံၚ်ဗီုဏံဂှ်တှ်ေ ဒှ်မံၚ်ပရေၚ်ဖံက်ပကဝ် ဥပဒေတန်ကြန်မံၚ်လၟုဟ်ဏံ ကၠးမးမံၚ်ရောၚ် ပရေၚ်ပါ်ပါဲမံၚ်တံလေဝ်နွံရ။
အလုံမွဲကၟိန်ဍုၚ် ပ္ဍဲပွိုၚ်ဍုၚ်လ္ၚဵုတံမ္ဂး စပ်ကဵုပရေၚ်ရုဲစှ် သ္ကိုပ်ပရေၚ်အုပ်ဓုပ် အရာပ်/ကွာန်တံဂှ် ကလေၚ်ရုဲစှ်အာမံၚ် အတိုၚ်ဥပဒေကီုလေဝ် အလဵုအသဳတွဵုရးမန်ဂှ် ဟွံကလေၚ်ရုဲစှ်ကဵုသ္ကိုပ်ပရေၚ်အုပ်ဓုပ်တံတုဲ ကဵုမံၚ်အခေါၚ်တာလျိုၚ်ကု ညးထံက်ဂလာန်မံၚ်ကဵု ညးတံရ။
စပ်ကဵုပရေၚ်ကလေၚ်ရုဲစှ်အာ သ္ကိုပ်အုပ်ဓုပ်တံတုဲ အပ္ဍဲကောံဓရီုစၠတ်ထဝ်တွဵုရးမန် ဂိတုဂျောန် ၁၆ တုဲကၠုၚ်တေံဂှ် ညးစၞးစၠတ်ထဝ်တွဵုရး ပွိုၚ်ဍုၚ်ၜဳကလေၚ် လၟိဟ် (၂) ဥူတေန်ယဳ သၟာန်လဝ်ဂလာန်ကီုလေဝ် နူလပါ်အလဵုအသဳဒပ်ပၞာန်တံဂှ် သှ်ကဵုလဝ်သွဟ် ချိုတ်တ်ပၠိုတ်တ်ဟၟဲပုဟ်။
ပရိုၚ် – သြၚ်လောန်တိုၚ်မ်
Photo – MOI