လ္ဂုၚ်၊ ဂျောန် ၃
အခိၚ်ပေါဲပၞာန်အပ္ဍဲဍုၚ်နိဂီုဗၟာ ကြဴနူဒပ်ပၞာန်သီအဝဵု ၂၀၂၁ ဏံဂှ် မၞိဟ် ၁ ကိုတ်ပြၚ် ချိုတ်အာလဝ်တုဲ ထမံက်ထ္ၜးမံၚ်ကဵု အကာဲအရာပရေၚ်ပရေံပရေံ လံအာကြပ်ပေၚ် ၅ သၞာံရ။
ဂကောံမၚ်ရံၚ်တၚ်နၚ် ဆေၚ်စပ်ကဵု ပရေၚ်ဒဒှ်ဒၞာဲဝါဲ ပဋိပက္ခရပ်လွဟ်တန်တဴ လ္ၚတ်တၠုၚ်လအာပဋိပက္ခ (ACLED) ချူထမံက်ထ္ၜးလဝ် ဒဒှ်ရကြဴနူကဵုပရေၚ်သီအဝဵု အပ္ဍဲဍုၚ်ဗၟာဏံတုဲ ညးချိုတ်အာ ဆေၚ်စပ်ကဵုပဋိပက္ခတံ နွံ ၁၀၀,၁၄၄ တၠရ။
စပ်ကဵု ပရေၚ်စရၚ်ချိုတ်အာလဝ်တံဏံဂှ် လလောၚ်တြးလဝ် ဗွဲမလုပ်သၞောဝ်ဟၟဲကီုလေဝ် ပေါဲပၞာန်အပ္ဍဲဍုၚ်ဗၟာဂှ် ဒှ်ပဋိပက္ခညးချိုတ်အာဂၠိုၚ်အိုတ် အပ္ဍဲအာယှရောၚ် ညးလ္ၚတ်တံ ဟီုရ။
ကြဴနူဒေသပါလေတ်သတိုၚ်တုဲ နိဂီုဍုၚ်ဗၟာဂှ် ဒှ်ဒေသပရေၚ်ဒုၚ်ဇီုကပိုက်ကဵု ပဋိပက္ခ ဒုတိယဂၠိုၚ်အိုတ် အပ္ဍဲဂၠးတိရောၚ် ဂကောံ ACLED သ္ဂးရ။
ပေါဲပၞာန်အပ္ဍဲဍုၚ်ဗၟာ ပါလုပ်မံၚ်ဂကောံရပ်လွဟ် ၁၂၀၀ ပြၚ်ဏံဂှ် ဒှ်ပေါဲပၞာန်ပရေၚ်ပါ်သရိုဟ် လီုလာ်ဂၠိုၚ်အိုတ် လတူဂၠးတိရောၚ် ညးလ္ၚတ်တံ ဟီုလဝ်အိုတ်ရ။
ဟိုတ်နူပေါဲပၞာန်အပ္ဍဲဍုၚ်ဗၟာတုဲ ညးဂြိပ်ဒဴဘဲပၞာန် နွံမံၚ် ၃ ဒသမ ၇ ပြကောဋိကိုတ်ပြၚ် ကုလသမဂ္ဂ ဟီုရ။
အပ္ဍဲမၞိဟ် ၅ တၠမ္ဂး ၁ တၠဂှ် ဒးဇီုကပိုက်မံၚ်ကဵု ပရေၚ်စၞစဇွောံမဟွံရုံဂပ်ဇၞော်ကဵုဇြဟတ်တုဲ အကာဲအရာပရေၚ်ပိုန်ဒြပ်လေဝ် ဆက်ပရေံစှ်ေမံၚ်ဖအိုတ်ရ။
ပေါဲဗတိုက်တံ ဆက်က္တဵုဒှ်မံၚ်လှဲလှဲလးလးတုဲ မွဲဏှမွဲဏှဂှ် ပရေၚ်ဗတိုက်ပၞာန်ကျာတံက္တဵုဒှ်မံၚ်တုဲ ပရေၚ်ပန်လွဟ်ဇၞော်တံ က္တဵုဒှ်မံၚ်ဇၞော်ကဵုပမာဏ အလုံမွဲကၟိန်ဍုၚ်ရ။
အပ္ဍဲပရေၚ်လဝေၚ်ပၞာန် ထပက်ပၞာန် ကြဴနူသၞာံ ၂၀၂၃ ဂှ် ဒပ်ပၠန်ဂတးတံ သီကေတ်မာန်လဝ် တိဍာ်ဗွဲမဂၠိုၚ်ထေၚ်ၚ်လဵုလဵု နွံကီုလေဝ် ဒပ်ပၞာန်ဂှ် ဂွံပရေၚ်အထံက်ပၚ်ဍုၚ်ကြုက်တုဲ ပ္ဍဲအခိၚ်လၟုဟ်ဏံ အသိၚ်ခိုဟ်တိုန်မံၚ် ညးလ္ၚတ်တံ ဟီုရ။
ဟိုတ်နူပေါဲပၞာန်တံတုဲ ပ္ဍဲဍုၚ်ပယျဵုဇိုၚ်ဝုတ်ဒိုဟ်တံလေဝ် ပြသၞာညးဒဒိုက်တံ ပဵုဂၠိုၚ်တိုန်မံၚ်တုဲ ပရေၚ်ဒုစရိုဟ်ၜက်ပယျဵုတံ၊ ပရေၚ်သွံရာန်ဂဥုဲၜူမာဲဒမၠုတံ ကေုာံ ပရေၚ်လီသြန်အန်လာၚ်တံလေဝ် ပဵုဂၠိုၚ်တိုန်မံၚ်ရ။
Ref: Intellinews