လံၚ်လုၚ်၊ ဂျူလာၚ် ၃
အပ္ဍဲကဵုရးတနၚ်္သဳ ကရပ်ဗ္ဒာဲဍုၚ်လံၚ်လုၚ် ကွာန်သေတ်ပြေဝ်ဂှ် အကြာဒပ်ပၞာန်သီအဝဵုကဵုဒပ်ပၠန်ဂတးတံ ပေါဲဗတိုက်ထပ်က္တဵုဒှ်မံၚ်ပၠန်ဂှ် ရိုဟ်ကၞက်ပရိုၚ်တိဍာ်တံ ဟီုလဴကဵုဌာန်ပရိုၚ်သြၚ်လောန်တိုၚ်မ်ရ။
အပ္ဍဲဂိတုဂျူလာၚ် ၁ အခိၚ်နူဂယး ၁၀ နာဍဳ အကြာကရောၚ်ပၞာန်ဒပ်ပၞာန်ဗၟာကလေၚ်လုပ်ကၠုၚ် ကွာန်သေတ်ပြေဝ်ကဵု ဒပ်ပံၚ်တောဲပၠန်ဂတးတံ ပေါဲဗတိုက်ၜါလပါ်က္တဵုဒှ်လဝ် ကရပ်ဗ္ဒာဲဘာလကျာ် ကွာန်သေတ်ပြေဝ်ဂှ်ရောၚ်။
ဟိုတ်နူပေါဲဗတိုက် အကြာဒပ်ၜါလပါ်က္တဵုဒှ်လဝ် အပ္ဍဲကွာန်သေတ်ပြေဝ် ဂှ်တုဲ ညးဒေသကလေၚ်စဴကၠုၚ်မံၚ်ကွာန် တံဂှ်လေဝ် ဓဝါဲဂှ်မွဲအလန်ဓဝ်ဒးထပ်ကလေၚ်ဂြိပ်ပါဲဒဴတိတ်အာ နူကွာန်ပြဟ်ဟ်ပၠန် သ္ဂးရ။
ကရောၚ်ပၞာန်ဒပ်ပၞာန်တံဂှ် စနူဂိတုဂျောန်တုဲကၠုၚ်တေံ နူလတူဍုၚ်လံၚ်လုၚ်မွဲကဆံၚ် လုပ်စိုပ်ကၠုၚ်ကွာန်ဗ္ဒာဲဗ္ဒာဲ သေတ်ပြေဝ်၊ ညှေန်မဝ်၊ ဍာ်ဗုသၟဝ်၊ ဂအ်အေန်တံဂှ် လုပ်မွဲကွာန်တိတ်မွဲကွာန် ထပက်ကရောၚ်ပၞာန် အာကၠုၚ်မံၚ်ရောၚ် ညးဒေသတံ ဟီုရ။
ကရောၚ်ပၞာန်ဏံဂှ် ကြဴနူပေါဲဗတိုက်က္တဵုဒှ်လဝ် ဂိတုဂျောန် ၁၄ တေံတုဲ ကလေၚ်ဆုတ်တိုန်အာ လတူဍုၚ်လံၚ်လုၚ်ကီုလေဝ် ပကောံထပ်ဗပေၚ်စုတ်လွဟ်မကမ် စၞစဇွောံမနာနာတံတုဲ ပ္ဍဲအကြာဒဵု၊ ကၠအ်တဵုလွဳလဝ် ဗ္ဒာဲဗ္ဒာဲကွာန်နွံမံၚ်လပါ်သၟဝ်ဍုၚ်တံဂှ် အာကၠုၚ်မံၚ်မဒှ်ရ။
ပေါဲဗတိုက်က္တဵုဒှ်လဝ် ပ္ဍဲဘာလကျာ် ကွာန်သေတ်ပြေဝ်ဂှ် နူလပါ်ဒပ်ပၞာန်သီအဝဵုတံ အကာဲအရာ ပရေၚ်ဒးဝပ်ချိုတ်အာလဝ် ချိုတ်တ်ပၠိုတ်တ်တံဂှ် နူဌာန်ပရိုၚ်သြၚ်လောန်တိုၚ်မ် သ္ပဒတန်တၞဟ်ခြာ ဟွံမာန်ဏီရ။
ပ္ဍဲဂိတုဂျောန် ၁၄ တုဲကၠုၚ်တေံ အပ္ဍဲကဵုပေါဲဗတိုက်ၜါလပါ်က္တဵုဒှ်လဝ် ပ္ဍဲကွာန်သေတ်ပြေဝ်ဂှ် ကရောၚ်ပၞာန်ဒပ်ပၞာန်ဗမာတံစံၚ်ပလီုထောံ သ္ၚိဌာန်အပ္ဍဲကွာန် ၉ မနွံရောၚ် ဂွံတီကေတ်ရ။
ပရိုၚ် – သြၚ်လောန်တိုၚ်မ်
Photo – Social Media