လ္ဂုၚ်၊ မာတ်ချ် (၄)
ဗော်ဒဳမဝ်ကရေဇြဳကောန်ဂကူ (NLD) ပ္တိတ်ထောံလဝ် ကောန်ဗော် (၄) တၠ သီုကဵုပါလုပ် ဥူဖျဵုမေန်တုၚ် သ္ကိုပ်ဝန်ဇၞော်ရးလ္ဂုၚ် ကေုာံ ဒဝ်စန္ဒာမေန် ပံၚ်တောဲကဵုကံၚ်ဇြဳပၞာန်တုဲ မဟီုဂးဒုၚ်လဝ်သက်သဳတံဂှ်ရောၚ်ဂှ် လလောၚ်ပ္တိတ်လဝ်ပရိုၚ် နကဵုစၟတ်တ္ၚဲ ဂိတုမာတ်ချ် (၃) ရ။
တၚ်သ္ဂုတ်သွာတ်ဏံဂှ် ကမ္မတဳဗော်ဗဟဵု သ္ဂုတ်သွာတ်လဝ် ပ္ဍဲကောံဓရီုမာတ်ချ် (၂) တေံရောၚ်ဂှ် သ္ဂးလဝ်ရ။
ညးတံဝွံ ဒစဵုဒစး ကုတၚ်ဒတူလိုၚ်ဗော်တုဲ မ္ၚးနူကဵုကၠောန်ၜိုတ်သ္ပထောံယၟုဗော်ဆဆဵုဂှ် သီုကဵုရေၚ်တၠုၚ်ဒ္ဂေတ်ဗက် အတိုၚ်ပၟိက်ကံၚ်ဇြဳပၞာန်တုဲ ဟိုတ်နူကၠောန်ၜိုတ်ဂၠါဲဒၟံၚ်ဖဵုသွက်ဇကုသၟးဂှ်ရ ပ္တိတ်ထောံဗီုလၟုဟ်ရောၚ်ဂှ် ထ္မံက်ထ္ၜးပါလုပ် ပ္ဍဲတၚ်လလောၚ်တြးဂှ်ရ။
ညးမဒးဒုၚ်ပ္တိတ်ထောံ နူကဵုဗော်ဂမၠိုၚ် ဥူဖျဵုမေန်တုၚ်၊ ဒဝ်စန္ဒာမေန်၊ ဥူတိုဝ်လွေန် ကေုာံ ဥူဝေန်မျေတ်အံၚ်တံဝွံ မ္ၚးနူပွမရှ်ေသှ်ေဆန္ဒညးဍုၚ်ကွာန်တံဟွံမွဲဂှ် သက်သဳမကၠောန်သ္ပလဝ် ပရေၚ်ဟီုဂးဒုၚ်သက်သဳဟွံဍာံဟွံပြ လ္တူဥက္ကဌ ဒဝ်အံၚ်သာန်သုကျဳဂှ်လေဝ် ကလိဂွံလဝ် ခိုၚ်ၚ်ကၠိုက်က်ရောၚ်ဂှ် NLD သ္ဂးလဝ်ရ။
လ္ဂောံကဵုတၚ်ပ္တိုန်ထ္ၜး သွက်ဂွံကေတ်ကဵုအရေဝ် ကုညးမကရဴစး ဆန္ဒညးဍုၚ်ကွာန်တံတုဲ မကၠောန်ၜိုတ်ဒစဵုဒစးဒၟံၚ်ကဵု မူဝါဒဗော်တံဂှ်တုဲ ပ္တိတ်ထောံလဝ် နူကဵုနဒဒှ်ကောန်ဗော်တံဂှ်တုဲ တၚ်ရေၚ်တၠုၚ်ဟီုဂးညးတံဂှ်ဝွံ ဟွံဆက်စပ်ကဵုဗော် NLD လးလးပုဟ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ကြဴနူဒပ်ပၞာန်သီအဝဵုတုဲ ဒပ်ပၞာန် ထ္ၜးဟိုတ်နာနာသာ်တုဲ ရပ်ဒက်ဝန်ဇၞော် ကဆံၚ်တွဵုရး ကေုာံ ကဆံၚ်ကၟိန်ဍုၚ် ဗော် NLD တံတုဲ ဖျေံစၟတ်လဝ် ဒဏ်ထံၚ်သၞာံဂၠိၚ်တံကီုလေဝ် ကုဥူဖျဵုမေန်တုၚ် မဟီုဂးဒုၚ်လဝ်ကဵုသက်သဳ လ္ပာ်ကံၚ်ဇြဳပၞာန်ဂှ် ကံၚ်ဇြဳပၞာန် ဖျေံစၟတ်လဝ် ဒဏ်သြန် (၁) ကိုဋ်ဒ္ကေဝ်ဓဝ်ရ။
စပ်ကဵုအကာဲအရာဏံတုဲ နူကဵုသြၚ်လောန်တိုၚ်(မ်) ၜိုန်ရဆက်စၠောံသၟာန်သၟုက်လဝ် ကမ္မတဳဗော်ဗဟဵု ကေုာံ ဥူဖျဵမေန်တုၚ် ကေုာံ ဒဝ်စန္ဒာမေန် မဒးဒုၚ်ပ္တိတ်လဝ် နူကဵုဗော်တံဂှ်ကီုလေဝ် ဆက်စၠောံဟွံဂွံလဝ်ရ။
ပရိုၚ်−သြၚ်လောန်တိုၚ်(မ်)