လှာဒကှ်၊ မာတ်ချ် (၄)
တွဵုရးကရေၚ်၊ ပ္ဍဲပွိုၚ်ဍုၚ်လှာဒကှ်ဂှ် KNU/KNLA ကေုာံ ဒပ်ပၞာန်စဵုဒၞါညးဍုၚ်ကွာန်တံ ပံၚ်တောဲတုဲ ပံက်လဝ်ဗ္ဒမ်ဂဥုဲမွဲဂှ် ဌာနလလောၚ်ပရိုၚ် ဒေသပၞာန်ပါ် စၟတ် (၃) ၊ ဒေသပၞာန်သ္ကုတ်သၠုၚ်ကျာ၊ ဌာနဝန်ဇၞော်ကာစဵုဒၞါ၊ အလဵုအသဳညဳသၟဟ်ဂကူ လလောၚ်ပ္တိတ်လဝ် ပ္ဍဲဂိတုမာတ်ချ် (၃) တေံရ။
ဒပ်ပၞာန်စဵုဒၞါညးဍုၚ်ကွာန် နူကဵုဂကောံအုပ်ဓုပ်ညးဍုၚ်ကွာန်၊ ပွိုၚ်ဍုၚ်လှာဒကှ်ဂှ်ကဵု မဟာမိတ် KNU/KNLA တံ ပံၚ်တောဲပံက်လဝ်တုဲ ပ္ဍဲကဵုဗ္ဒမ်ဂဥုဲဂှ် ရီုဗၚ်မၚ်မွဲကဵု ကိစ္စပရေၚ်ထတ်ယုက် ညးဍုၚ်ကွာန်ဒေသတံကဵု ကောန်သ္ဂံၚ်ဒပ်ပၞာန်စဵုဒၞါညးဍုၚ်ကွာန်တံဂှ်ကီု ကေုာံ ရီုဗၚ်ရေၚ်တၠုၚ်ကဵုဒၟံၚ် ကိစ္စပရေၚ် ကဵုလညာတ်ပညာ ပရေၚ်ထတ်ယုက်တံ နွံဂှ် ပါလုပ် ပ္ဍဲတၚ်လလောၚ်တြးဂှ်ရ။
သ္အာၚ်နူဂှ်ပၠန် သၞာံ ၂၀၂၃ ဂိတုဂျာန္နဝါရဳ ပွိုၚ်မွဲဂိတုဂှ် ဟိုတ်နူကဵုပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်တံကဵု အရီုဗၚ်ပန်ပှော်တရဴကျာတံ ပန်ပှော်လဝ်ကြာန်န်တံဂှ်ရ ညးဍုၚ်ကွာန်ဒေသ (၁၆၀၀၀) ပြၚ် နူကဵုကွာန် (၂၂) ကွာန် မၞုံအပ္ဍဲပွိုၚ်ဍုၚ်လှာဒကှ်တံ ဒးပါဲဒဴလဝ်ဘဲပၞာန်တုဲ ကုညးဍုၚ်ကွာန်ပါဲဒဴဘဲပၞာန်တံဂှ်လေဝ် ဂကောံအုပ်ဓုပ်ညးဍုၚ်ကွာန်ပွိုၚ်ဍုၚ်တံ ကဵုလဝ်အထံက်အပၚ်အရီုဗၚ် မနွံပၟိက်ဂမၠိုၚ်၊ ပရေၚ်မၚ်မွဲပရေၚ်ထတ်ယုက်တံရောၚ်ဂှ် လလောၚ်ပ္တိတ်လဝ်ရ။
ဆ္ဂး ပ္ဍဲကဵုဗ္ဒမ်ဂဥုဲ ဂကောံအုပ်ဓုပ်ညးဍုၚ်ကွာန်ပွိုၚ်ဍုၚ်လှာဒကှ်တံ မပံက်လဝ်ဂှ် တၚ်ခက်ခုဲ အေန်တာနိတ်တံ ကေုာံ နွံပၟိက်ဒၟံၚ်ကဵု အရီုဗၚ်ဂဥုဲဇဗတံရောၚ်ဂှ် ဂွံတီကေတ် နူကဵုတၚ်လလောၚ်တြး ဌာနလလောၚ်ပရိုၚ် ဒေသပၞာန်ပါ် စၟတ် (၃) ၊ ဒေသပၞာန်သ္ကုတ်သၠုၚ်ကျာတံရ။
ပွိုၚ်ဍုၚ်လှာဒကှ် မၞုံဒၟံၚ်အပ္ဍဲတိဍာ်ဒပ်မဟာ (၆) ဗော်သွးကောန်ဂကူကရေၚ် KNU ဂှ်ဝွံ ဒှ်ပွိုၚ်ဍုၚ် ဒပ်ကံၚ်ဇြဳပၞာန် လလောၚ်လဝ် ပရေၚ်အုပ်ဓုပ်ပၞာန်မွဲတုဲ နူကဵုပရေၚ်ပၞာန်ကြံၚ်မ္ၚိုဟ် အကြာဒပ်ပံၚ်တောဲ KNLA, PDF တံကဵု ဒပ်ကံၚ်ဇြဳပၞာန်တံဂှ် မွဲဏှမွဲဏှဟီုဂွံ ပေါဲဗ္တိုက်တံ က္တဵုဒှ်ဒၟံၚ်ရ။
ပရိုၚ်−သြၚ်လောန်တိုၚ်(မ်)