ထဝါဲ၊ မာတ်ချ်(၄)
ပဋိပက္ခက္တဵုဒှ်ဒၟံၚ် ပ္ဍဲအကြာ KNU ဒပ်မဟာ (၄) ကဵု KTLA ပ္ဍဲရးဒေသဇၞော်တၞၚ်သဳ၊ ခရိုၚ်ထဝါဲဂှ် ဟွံဂၠာဲသွဟ် နကဵုဂၠံၚ်တရဴနဲကဲပရေၚ်ပၞာန်တုဲ သွက်ဂွံပ္ညဳပ္ညပ်သဳကၠဳ ဂၠာဲအာသွဟ်ဂှ် ဂကောံဇြဟတ်ပရေၚ်ဍုၚ်ကွာန် မၞုံပ္ဍဲရးဒေသဇၞော်တၞၚ်သဳ (၁၀)ဂကောံတအ် အာတ်မိက်ကၠုၚ် ပ္ဍဲဂိတုမာတ်ချ် စၟတ်တ္ၚဲ(၂)ဂှ်ရ။
ဗော်သွးကောန်ဂကူကရေၚ် KNU ဒပ်မဟာ(၄)ကဵု ဒပ်ပၞာန်ကဝ်ဒူလေဝ် KTLA တအ်ဂှ် နူကဵုပရေၚ်စောတ်စောဲ ပ္ဍဲလတူကောန်အရာပ်ဒးဒုၚ်ဂစိုတ်လဝ် ပါလုပ်သီုပရေၚ်ပၞာန် ပရေၚ်အုပ်ဓုပ်တုဲ ပဋိပက္ခသ္ကာတ်မြဟ်ကၠုၚ် စဵုကဵုပေါဲဗတိုက်ၜါလ္ပာ် ဒးက္တဵုဒှ်ကၠုၚ်ရ။
ပဋိပက္ခပရေၚ်ပၞာန် က္တဵုဒှ်ဒၟံၚ် အကြာဒဟ်ရပ်လွဟ်ကရေၚ် (၂)ဂကောံဂှ် အလုံညးဍုၚ်ကွာန် ဟၟဲပၟိက်ကဵုတၠအဝဵုပၞာန် မပါလုပ် သီုကောန်ဍုၚ်အရၚ် ကောန်ဂကူကရေၚ် မၞုံပ္ဍဲရးဒေသတၞၚ်သဳတအ် ဒးဒှ်ဒၟံၚ်ဓဝိၚ်ရဂှ် ဟီုသ္ဂးလဝ် ပ္ဍဲကဵုတၚ်လလောၚ်တြး လစွံစိုတ်ဂကောံဇြဟတ်ပရေၚ်ဍုၚ်ကွာန် (၁၀)ဂကောံဂှ်ရ။
ဟိုတ်ဂှ်ရ ပဋိပက္ခက္တဵုဒှ်ဒၟံၚ် ပ္ဍဲအကြာ KNU ဒပ်မဟာ (၄)ကဵု KTLA တအ်ဂှ် ဟွံဂၠာဲသွဟ် ကဵုနဲကဲဂၠံၚ်ဍာန်ပရေၚ်ပၞာန်တုဲ ညံၚ်ဂွံဂၠာဲအာသွဟ် ၜိုဟ်ဟ်သြိုဟ်ဟ်ကီု ပံၚ်တောဲတုဲ ညံၚ်ဂွံဗတိုက်သရိုဟ်အာ သၞောတ်တၠအဝဵုပၞာန် ညဳညဳသာသာ ကောံကောံ ကလောံကလောံဂှ် အာတ်မိက်ကၠုၚ်လဝ်ရ။
ပဋိပက္ခဂကောံရပ်လွဟ်ကရေၚ် (၂)ဂကောံဂှ် သ္အာၚ်နူ က္တဵုဗဒှ်ကဵုအခက်ခုဲ သွက်ညးဍုၚ်ကွာန် ပ္ဍဲဒေသတအ်ဂှ် ဟိုတ်နူဇီုကပိုက်ဒးဒၟံၚ် သွက်ပရေၚ်ပၠန်ဂတးတၠအဝဵုပၞာန် ဗွဲမဂၠိုၚ်ဂှ်ရ ဒးအာတ်မိက်ကၠုၚ်သွက်ဂွံဆဵုဂဗသဳကၠဳရဂှ် ညးမၞုံအခေါၚ်ဟီုဂး ဂကောံဇြဟတ်ပရေၚ်ဍုၚ်ကွာန် ရးတၞၚ်သဳ ကိုဝ်ဟုၚ်ထေတ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဒၟာနူပဋိပက္ခ အကြာဂကောံရပ်လွဟ် ကရေၚ်(၂)ဂကောံ သာတုဲသ္ကာတ်မြဟ်ကၠုၚ်ဒၟံၚ်ဂှ်ရ သွက်ဂွံဂၠာဲသွဟ်ၜိုဟ်ဟ်သြိုဟ်ဟ်ဂှ် ပါဲနူဂကောံကောန်ဍုၚ်အရၚ်တုဲ ဂကောံဇြဟတ်ပရေၚ်ဍုၚ်ကွာန်တအ်လေဝ် အာတ်မိက်ကၠုၚ် နွံဒၟံၚ်ရ။
KNU ဒပ်မဟာ(၄) ကေုာံ KTLA တအ်ဂှ် နူကဵုပရေၚ်ဟီုဂးစောတ်စောဲရေၚ်သ္ကအ် ဂတးဂတန်တုဲဂှ် ပ္ဍဲဂိတုဖေဖဝ်ဝါရဳ စၟတ်တ္ၚဲ(၁၇) ကေုာံ စၟတ်တ္ၚဲ(၂၀)ဂှ် ပေါဲဗတိုက်က္တဵုဒှ်လဝ်တုဲ ဗ္ဒပ် KTLA မွဲဗ္ဒပ်ဒးဒုၚ်သီကေတ်လဝ်ကီု ကောန်ဒပ်ၜါလ္ပာ်လေဝ် ဇီုကပိုက် ဒးချိုတ်အာလဝ် နွံကၠုၚ်ဒၟံၚ်ရ၊
ဒပ်ပၞာန်ကဝ်ဒူလေဝ် KTLA ဂှ် သ္ကိုပ်ပၞာန် သ္ကိုပ်ဗိုလ်သဝ်နေဝ်ဒါမျ ညးမဒှ်ကောန် က္ဍိုပ်သ္ကိုပ် KNU တြေံဗိုလ်မျ ဒက်ပ္တန်လဝ် ဒပ်စဵုဒၞာကောန်ဂကူကရေၚ် KNDO ရ။
ပရိုၚ်-သြၚ်လောန်တိုၚ်(မ်)